IND vs ENG : રાજકોટ ટેસ્ટમાં ભારતને મોટો ફટકો, સદી બાદ ભારતીય ઓપનર યશસ્વી જયસ્વાલ થયો રિટાયર્ડ હર્ટ

Yashasvi Jaiswal Century : ભારત અને ઈંગ્લેન્ડ વચ્ચે પાંચ મેચની ટેસ્ટ શ્રેણીની ત્રીજી મેચ રાજકોટમાં રમાઈ રહી છે. આ મેચના ત્રીજા દિવસે (17 ફેબ્રુઆરી) ભારતીય ઓપનર યશસ્વી જયસ્વાલે શાનદાર બેટિંગ કરી અને સદી ફટકારી. યશસ્વી જયસ્વાલે 122 બોલમાં સદી ફટકારી હતી, જેમાં 9 ચોગ્ગા અને 5 છગ્ગાનો સમાવેશ થાય છે. યશસ્વીની ટેસ્ટ કારકિર્દીની આ ત્રીજી સદી હતી.

જોકે, યશસ્વી જયસ્વાલ સદી ફટકાર્યા બાદ લાંબા સમય સુધી મેદાન પર રહી શક્યા ન હતા, તેમને રિટાયર્ડ હર્ટ થવું પડ્યું હતું. યશસ્વી જયસ્વાલને બેટિંગ કરતી વખતે પીઠનો દુખાવો થતો હતો અને તેના ડાબા પગમાં ખેંચાણ થયું હતું.

રાજકોટ ટેસ્ટ મેચની પ્રથમ ઇનિંગમાં યશસ્વી જયસ્વાલ 10 બોલમાં 2 ચોગ્ગાની મદદથી માત્ર 10 રન આઉટ થઈને પેવેલિયન પરત ફર્યો હતો. જો કે યશસ્વી ફોર્મમાં હતો અને તેણે આ પહેલા વિશાખાપટ્ટનમ ટેસ્ટમાં બેવડી સદી ફટકારી હતી, પરંતુ તેના આઉટ થવાથી તે અને ટીમ બંને નિરાશ થયા હતા, પરંતુ તેણે બીજી ઈનિંગમાં સદી ફટકારીને પ્રથમ ઇનિંગમાં થયેલા નુકસાનની ભરપાઈ કરી હતી. આ સિવાય પોતાની ઇનિંગ્સના આધારે તેણે આ ટેસ્ટ સીરિઝમાં 400 રન પૂરા કર્યા અને આવું કરનાર પ્રથમ બેટર બન્યો હતો. યશસ્વી જયસ્વાલ 104 રન બનાવીને રિટાયર્ડ હર્ટ થયો હતો.

ચોગ્ગો ફટકારીને ફિફ્ટી પૂરી કરી

યશસ્વી જયસ્વાલે બીજી ઇનિંગમાં સાવધાનીપૂર્વક બેટિંગ કરી હતી અને સેટ થયા બાદ પોતાના શાનદાર ફોર્મની ઝલક બતાવી હતી અને આ પછી ઈંગ્લેન્ડના કેપ્ટન અને બોલર બંને ચિંતિત દેખાતા હતા. યશસ્વીએ આ ઇનિંગના પહેલા 80 બોલમાં પોતાની ફિફ્ટી પૂરી કરી હતી. આ દરમિયાન તેણે 2 છગ્ગા અને 5 ચોગ્ગા ફટકાર્યા હતા. તેણે આ ઇનિંગમાં પોતાની ફિફ્ટી પણ ચગ્ગો ફટકારીને પૂરી કરી હતી.

ઈંગ્લેન્ડ સામે બીજી સદી ફટકારી

યશસ્વી જયસ્વાલે ફિફ્ટી પૂરી કર્યા પછી ઝડપી ગતિએ રન બનાવવાનું શરૂ કર્યું અને 122 બોલમાં સદી પૂરી કરી હતી. પોતાની 100 રનની ઇનિંગ દરમિયાન યશસ્વીએ 5 છગ્ગા અને 9 ચોગ્ગા ફટકાર્યા હતા. જયસ્વાલના ટેસ્ટ ક્રિકેટ કરિયરની આ ત્રીજી સદી છે જ્યારે ભારતીય ધરતી પર ટેસ્ટમાં આ તેની બીજી સદી હતી. રાજકોટના મેદાન પર યશસ્વીએ ટેસ્ટ ક્રિકેટમાં પ્રથમ વખત સદી ફટકારી હતી, જ્યારે ઈંગ્લેન્ડ સામે આ તેની બીજી સદી હતી. આ ઉપરાંત આ ટેસ્ટ સીરિઝમાં આ તેની બીજી સદી હતી. યશસ્વીએ વર્ષ 2023માં વેસ્ટ ઈન્ડિઝ પ્રવાસ પર તેની પ્રથમ ટેસ્ટ સદી ફટકારી હતી.