IND vs ENG 2nd ODI: ભારતે બીજી વનડેમાં ઈંગ્લેન્ડને 4 વિકેટથી હરાવ્યું, રોહિત શર્માની શાનદાર સદી
Updated: Feb 9th, 2025
IND vs ENG 2nd ODI Live: રોહિત શર્માની કેપ્ટનશીપ હેઠળની ભારતીય ટીમે કમાલ કરી દીધી છે. ભારતીય ટીમે 3 મેચની ODI સીરિઝની બીજી મેચમાં ઇંગ્લેન્ડને 4 વિકેટથી હરાવ્યું. આ મેચ રવિવાર (9 ફેબ્રુઆરી) ના રોજ કટકના બારાબતી સ્ટેડિયમ ખાતે રમાઈ હતી. આ મેચ જીતીને ભારતીય ટીમે સીરિઝ પણ 2-0થી જીતી લીધી છે. આ પહેલા નાગપુર વનડે પણ ભારતીય ટીમે 4 વિકેટથી જીતી હતી.
કટક વનડેમાં ટોસ જીતીને પહેલા બેટિંગ કરીને ઇંગ્લેન્ડની ટીમે ભારતીય ટીમને 305 રનનો ટાર્ગેટ આપ્યો હતો. જેના જવાબમાં ભારતીય ટીમે માત્ર 44.3 ઓવરમાં 6 વિકેટ ગુમાવીને મેચ જીતી લીધી. ભારતીય ટીમ માટે કેપ્ટન રોહિત શર્માએ 90 બોલમાં 119 રનની તોફાની સદીની ઇનિંગ રમી. આ દરમિયાન તેણે કુલ 7 છગ્ગા અને 12 ચોગ્ગા ફટકાર્યા.
રોહિતે ગેઇલનો તોડ્યો રેકોર્ડ
ક્રિસ ગેઈલે વનડે ક્રિકેટમાં 331 સિક્સર ફટકારી, જે આંકડાની રોહિત શર્માએ પહેલાથી જ બરાબરી કરી લીધી છે. જોકે, રોહિત પહેલી વનડેમાં શરૂઆતમાં જ આઉટ થઈ ગયો હતો અને એક પણ સિક્સર ફટકારી શક્યો ન હતો. પરંતુ બીજી મેચમાં તેણે શાનદાર શરૂઆત કરી અને બીજી જ ઓવરમાં એટકિન્સનની બોલિંગ પર સિક્સર ફટકારી. આ સાથે ગેઇલનો રેકોર્ડ તોડ્યો. હવે રોહિત વનડેમાં સૌથી વધુ સિક્સર ફટકારનાર બીજો બેટ્સમેન બની ગયો છે. રોહિતે 259 ઇનિંગ્સમાં આ સિદ્ધિ મેળવી છે.
ભારતીય ટીમનું સ્કોરકાર્ડ
ઇંગ્લેન્ડે આપ્યો હતો 305 રનનો ટાર્ગેટ
ઇંગ્લેન્ડે ભારતને બીજી વનડે મેચ જીતવા માટે 305 રનનો ટાર્ગેટ આપ્યો હતો. ઇંગ્લેન્ડ માટે બેન ડકેટ અને જો રૂટે શાનદાર પ્રદર્શન કર્યું. બંનેએ અડધી સદી ફટકારી હતી. ડકેટ 65 રન બનાવીને આઉટ થયો હતો. જ્યારે રૂટ 69 રન બનાવીને આઉટ થઇ ગયો હતો. જોસ બટલરે 34 રનનું યોગદાન આપ્યું. હેરી બ્રુક 31 રન બનાવીને પેવેલિયન પરત ફર્યો હતો. આ રીતે આખી ટીમ 304 રન બનાવીને ઓલઆઉટ થઈ ગઈ હતી.
બીજી વનડેમાં ભારતીય ટીમની પ્લેઇંગ-11: રોહિત શર્મા (કેપ્ટન), શુભમન ગિલ, વિરાટ કોહલી, શ્રેયસ ઐયર, કેએલ રાહુલ (વિકેટકીપર), હાર્દિક પંડ્યા, અક્ષર પટેલ, રવીન્દ્ર જાડેજા, હર્ષિત રાણા, વરુણ ચક્રવર્તી, મોહમ્મદ શમી.
બીજી વનડેમાં ઇંગ્લેન્ડની પ્લેઇંગ-11: બેન ડકેટ, ફિલ સોલ્ટ (વિકેટકીપર), જો રૂટ, હેરી બ્રુક, જોસ બટલર (કેપ્ટન), લિયામ લિવિંગસ્ટોન, જેમી ઓવરટન, ગુસ એટકિન્સન, માર્ક વુડ, આદિલ રશીદ, સાકિબ મહમૂદ.
