Paralympics 2024: પેરિસ પેરાલિમ્પિકમાં ભારતની હેટ્રીક, પ્રીતિ પાલે 100 મીટર રેસમાં રચ્યો ઈતિહાસ

Paris Paralympics 2024, Preethi Pal Wins Bronze Medal: પેરિસ પેરાલિમ્પિક્સ 2024માંથી ભારત માટે વધુ એક સારા સમાચાર સામે આવી રહ્યા છે. પેરાલિમ્પિક્સમાં પ્રીતિ પાલે ભારત માટે ત્રીજો મેડલ જીતી લીધો છે. તેણે 100 મીટરની દોડમાં બ્રોન્ઝ મેડલ જીત્યો છે. 23 વર્ષીય પ્રીતિ મહિલાઓની 100 મીટર T-35 ફાઇનલમાં ત્રીજા સ્થાને રહી હતી. આ સાથે તે પેરાલિમ્પિકસમાં ટ્રેક ઈવેન્ટમાં મેડલ જીતનારી પહેલી ભારતીય બની ગઈ છે. આ સિવાય અવની લેખારાએ મહિલાઓની 10 મીટર એર રાઈફલ SH1 કેટેગરીમાં ફાઈનલ ઈવેન્ટમાં ગોલ્ડ મેડલ જીત્યો હતો જ્યારે મોના અગ્રવાલે બ્રોન્ઝ મેડલ જીત્યો હતો.

આ પણ વાંચો: Paralympics 2024: કોણ છે પેરા-શૂટર મોના અગ્રવાલ, પેરાલિમ્પિકસમાં બ્રોન્ઝ મેડલ જીતી વધાર્યું દેશનું માન

આ વર્ષ પ્રીતિ માટે સફળ સાબિત થઇ રહ્યું છે. તેણે માર્ચ 2024માં બેંગલુરુમાં આયોજિત 6મી ઈન્ડિયન ઓપન પેરા એથ્લેટિક્સ ચેમ્પિયનશિપમાં 2 ગોલ્ડ મેડલ જીતીને વર્ષની શરૂઆત ખૂબ જ સારી રીતે કરી હતી. આ પછી તેણે મે મહિનામાં જાપાનમાં યોજાયેલી વર્લ્ડ પેરા એથ્લેટિક્સ ચેમ્પિયનશિપમાં ત્રીજું સ્થાન મેળવીને બ્રોન્ઝ મેડલ જીત્યો હતો. આ મેડલના કારણે તેણે પેરિસ પેરાલિમ્પિક્સમાં પોતાનું સ્થાન નિશ્ચિત કરી લીધું હતું.