હાર્દિક પંડ્યાનો નો લૂક શોટ વાયરલ, યુઝર્સ બોલ્યાં - અમારી પાસે બોલવા માટે શબ્દો નથી....

IND Vs BAN T20I, Hardik Pandya : ભારત અને બાંગ્લાદેશ વચ્ચેની T20 સીરિઝની પહેલી મેચમાં ભારતે બાંગ્લાદેશને 7 વિકેટે હરાવ્યું હતું. આ સાથે ભારતે 3 મેચની સીરિઝમાં 1-0ની સરસાઈ મેળવી લીધી છે. આ મેચમાં હાર્દિક પંડ્યાએ શાનદાર બેટિંગ કરીને છેલ્લે છગ્ગો ફટકારીને ભારતને જીત અપાવવામાં મહત્ત્વનું યોગદાન આપ્યું હતું. તેણે પોતાની ઇનિંગ દરમિયાન એક અદ્ભુત શોટ રમ્યો હતો જેને 'નો લુક શોટ' કહેવામાં આવે છે. એટલે કે બેટર બોલને ફટકાર્યા પછી તેની સામે જોતો નથી. પંડ્યાના આ શોટ પર ચાહકો પ્રશંસા કરી રહ્યા છે.

હાર્દિક પંડ્યાએ ભારતીય ઇનિંગની 12મી ઓવરમાં તસ્કીન અહેમદના બોલ પર આ શોટ રમ્યો હતો. ત્યારે જીત મેળવવા માટે ભારતને માત્ર 9 રનની જરૂર હતી. તસ્કીને ઓવરનો ત્રીજો બોલ થોડો શોર્ટ નાખ્યો હતો જે પંડ્યાની કમરથી થોડો ઉપર હતો. જેને પંડ્યાએ વિકેટકીપરની ઉપરથી બાઉન્ડ્રી પાર મોકલી દીધો હતો. અને બોલ તરફ નજર પણ ન કરી.

આ પણ વાંચો : એક દિવસમાં બે જીત : ભારતે બાંગ્લાદેશને 7 વિકેટથી હરાવ્યું, હાર્દિક પંડ્યાની સિક્સરે અપાવી જીત

પંડ્યાના આ શોટને લઈને ક્રિકેટ ચાહકો તેની સ્ટાઇલના દિવાના થઈ ગયા છે. અને સોશિયલ મીડિયા પર તેના વખાણ કરી રહ્યા છે. IPLની એક ફ્રેન્ચાઇઝીએ પોસ્ટ કરી લખ્યું હતું કે, અમારી પાસે કોઈ શબ્દો નથી. જ્યારે એક યુઝરે લખ્યું હતું કે, "શું માપ છે, અને શું શોટ છે. બોલર વિચારી રહ્યો છે કે શું હું તારું મગજ લઈ શકું, હાર્દિક.' આ શોટ રમ્યા બાદ પંડ્યાની પ્રતિક્રિયા પણ વાયરલ થઈ રહી છે. શોટ રમ્યા બાદ ક્રિઝ પર ઊભો રહીને બોલર તરફ જોતો રહ્યો હતો.

આ મેચમાં હાર્દિક પંડ્યાએ 16 બોલ રમીને 39 રન કરીને અણનમ રહ્યો હતો. છેલ્લે તેણે છગ્ગો મારીને ટીમને જીત અપાવી હતી. આ સાથે જ T20માં છગ્ગો ફટકારીને જીત અપાવનાર ભારતીય બેટરોની યાદીમાં પહેલા નંબર પર આવી ગયો છે. તેણે પાંચમી વખત આવું કર્યુ છે. અત્યાર સુધી તે વિરાટ કોહલીની બરાબરી પર હતો. પરંતુ હવે તેણે કોહલીને પાછળ છોડી દીધો છે.