Arshad Nadeem: પાકિસ્તાનને એકમાત્ર ગોલ્ડ અપાવનાર અરશદને ભારતની સરખામણીમાં કેટલા રૂપિયા મળશે?

પાકિસ્તાનની ઓલિમ્પિક ગોલ્ડ મેડલ વિજેતા અરશદ નદીમે 8મી ઓગસ્ટની રાત્રે પોતાના દેશ માટે ઈતિહાસ રચ્યો હતો. અરશદ પાકિસ્તાન માટે વ્યક્તિગત ગોલ્ડ મેડલ જીતનાર પ્રથમ એથ્લેટ બની ગયો હતો. તેણે પાકિસ્તાનને 32 વર્ષ બાદ ઓલિમ્પિકમાં મેડલ પણ અપાવ્યો હતો. એટલું જ નહીં અરશદે 92.97 મીટર થ્રો સાથે ગોલ્ડ મેડલ જીત્યો હતો. જે પોતે ઓલિમ્પિક રેકોર્ડ પણ છે. અરશદે બે વખત 90 મીટરથી વધારે લાંબો થ્રો કરી દીધો હતો.

આ મેડલ જીત્યા બાદ અરશદે તેના સોશિયલ મીડિયા એકાઉન્ટ પર એક પોસ્ટ કરી હતી જેમાં તેણે લખ્યું હતું કે, ' 'સૌપ્રથમ, હું આ ખાસ સફળતા માટે અલ્લાહનો આભાર માનું છું. મારા પરિવારની પ્રાર્થના, સમગ્ર રાષ્ટ્રની પ્રાર્થના અને ખાસ કરીને મારા કોચ સલમાન ઇકબાલ બટ્ટના અથાક પ્રયાસો અને ડૉ. અલી શેર બાઝવાની મદદથી મેં આ સિદ્ધિ હાંસલ કરી છે. આપ સૌનો આભાર.'

તમને જણાવી દઈએ કે, અરશદે 92.97 મીટર થ્રો કરીને ઓલિમ્પિક રેકોર્ડ પણ બનાવ્યો હતો. આ પહેલાનો રેકોર્ડ નોર્વેના એન્ડ્રેસ થોર્કિલસનના નામે હતો. તેણે બેઇજિંગ ઓલિમ્પિકમાં 90.57 મીટરનો થ્રો કર્યો હતો. આ ઓલિમ્પિકમાં અરશદના ગોલ્ડ બાદ સિલ્વર મેડલ નીરજ ચોપરાને મળ્યો હતો. ઓલિમ્પિકમાં નીરજનો સર્વશ્રેષ્ઠ થ્રો 89.45 હતો જે તેનો સિઝન બેસ્ટ સ્કોર પણ હતો.

અરશદને કેટલા રૂપિયા મળશે?

પેરિસ ઓલિમ્પિકમાં ગોલ્ડ મેડલ જીતવા બદલ અરશદ નદીમને 50 હજાર ડોલર એટલે કે ભારતીય ચલણ પ્રમાણે 41 લાખ રૂપિયા અને પાકિસ્તાની કરન્સી પ્રમાણે 1 કરોડ 40 લાખ રૂપિયા મળશે.

ઇનામોની વર્ષા

પાકિસ્તાનમાં નદીમ પર ઇનમોની વર્ષ કરવામાં આવી હતી. સિંધ સરકાર અને તેના ગવર્નરે અરશદ માટે ઈનામની રકમની જાહેરાત કરી છે. અત્યાર સુધી કરવામાં આવેલી જાહેરાતો પ્રમાણે અરશદને કુલ મળીને છ કરોડ પાકિસ્તાની રૂપિયા મળવાના છે. જે ભારતીય ચલણ પ્રમાણે 1,53,66,058 રૂપિયા થાય છે. 

પાકિસ્તાની ન્યૂઝ ચેનલોના અહેવાલ પ્રમાણે સિંધ રાજ્યની સરકાર પાંચ કરોડ પાકિસ્તાની રૂપિયા (1.5 કરોડ ભારતીય રૂપિયા) આપવા જઈ રહી છે. આ ઉપરાંત સિંધના ગવર્નરે એક્સ પર 10 લાખ પાકિસ્તાની રૂપિયા ( 3 લાખ ભારતીય રૂપિયા) આપવાની જાહેરાત કરી હતી. આ સિવાય સિંગર અલી ઝફરે પણ નદીમને 10 લાખના ઇનામની જાહેરાત કરી હતી. આટલું જ નહીં કરાચીના મેયર મુર્તઝા વહાબે જાહેરાત કરી હતી કે કરાચીમાં અરશદ નદીમના નામે એક સ્પોર્ટ્સ એકેડમી ખોલવામાં આવશે.

વિનેશને ચાર કરોડ

જ્યાં ગોલ્ડ બદલ અરશદને દોઢ કરોડ રૂપિયાની જાહેરાત થઈ છે ત્યાં રેસલિંગની ફાઇનલમાં ડિસ્કવોલિફાય થનાર વિનેશ ફોગાટને હરિયાણા સરકારે 4 કરોડ રૂપિયાનું ઈનામ આપવાની જાહેરાત કરી છે. આ સિવાય હોકી ટીમને બ્રોન્ઝ મેડલ જીતવા બદલ કરોડોના ઈનામ મળશે. 

ભારતીય હોકી ટીમને બ્રોન્ઝ બદલ કેટલા રૂપિયા મળશે?

પંજાબ સરકારે ઓલિમ્પિક બ્રોન્ઝ મેડલ જીતનાર ટીમના દરેક ખેલાડીને એક એક કરોડ રૂપિયા ઈનામ આપવાની જાહેરાત કરી છે. ઓડિશા કે જે હોકી ટીમને સ્પોન્સર કરે છે તેની સરકારે પણ દરેક ખેલાડીને 15-15 લાખ અને સપોર્ટ સ્ટાફને 10-10 લાખ રૂપિયાનાં ઇનામની જાહેરાત કરી છે. આ સિવાય ઓડિશાના ખેલાડી અને ટીમના મજબૂત ડિફેન્ડર અમિત રોહિદાસને 4 કરોડના ઇનામની જાહેરાત કરી છે.