ચેમ્પિયન્સ ટ્રોફીથી લઈને એશિયા કપ સુધી... જુઓ ભારતીય ટીમનો વર્ષ 2025નો વ્યસ્ત કાર્યક્રમ

Indian cricket team's schedule for 2025 : ભારતીય ક્રિકેટ ટીમ માટે વર્ષ 2024 ઉતાર-ચઢાવથી ભરેલું રહ્યું હતું. અફઘાનિસ્તાન સામેની T20 સીરિઝ હોય કે પછી ઈંગ્લેન્ડ સામેની ઘરઆંગણે ટેસ્ટ સીરિઝ ભારતીય ટીમે પોતાની ક્ષમતા સાબિત કરીને શાનદાર પ્રદર્શન કર્યું હતું. આ પછી જૂનમાં T20 વર્લ્ડકપનો ખિતાબ જીતીને ટીમે ICCનો ખિતાબ ન જીતવાનો દુકાળ પણ ખતમ કરી નાખ્યો હતો. જો કે ન્યૂઝીલેન્ડ સામે ઘરઆંગણે ટેસ્ટ સીરિઝમાં પરાજય અને ઓસ્ટ્રેલિયા સામેની પાંચ મેચની ટેસ્ટ સીરિઝમાં પાછળ પડી ગયા બાદ ટીમ માટે આવનારા વર્ષ 2025માં ઘણાં મોટા પડકારોનો સામનો કરવો પડશે.

ભારતે વર્ષનો અંત હાર સાથે કર્યો

ભારતીય ટીમે વર્ષ 2024નો અંત હાર સાથે કર્યો હતો. મેલબર્નમાં ઓસ્ટ્રેલિયા સામે રમાયેલી ચોથી ટેસ્ટ મેચમાં ટીમને હારનો સામનો કરવો પડ્યો હતો, જેના કારણે ટીમ 5 મેચની બોર્ડર-ગાવસ્કર ટ્રોફીમાં 1-2થી પાછળ રહી ગઈ હતી. જો કે, ટીમે આગામી વર્ષની શરૂઆત ઓસ્ટ્રેલિયા સામેની પાંચમી ટેસ્ટથી જ કરવાની છે. આ મેચ 3 જાન્યુઆરીથી સિડનીમાં રમાશે. જે ભારત માટે કરો યા મરો મેચ હશે કારણ કે ભારત પાસે ટ્રોફી જાળવી રાખવાની સાથે સાથે વર્લ્ડ ટેસ્ટ ચેમ્પિયનશીપ (WTC) ફાઈનલ માટે તેમની તકોને જીવંત રાખવાની તક હશે.

ચેમ્પિયન્સ ટ્રોફી અને ઈંગ્લેન્ડ સામે રમશે ભારતીય ટીમ 

ભારતે ઘરઆંગણે આવતા વર્ષની શરૂઆતમાં ઈંગ્લેન્ડ સામે મર્યાદિત ઓવરોની સીરિઝ રમવાની છે. ભારત અને ઈંગ્લેન્ડ વચ્ચે 22 જાન્યુઆરીથી 12 ફેબ્રુઆરી સુધી 5 T20 અને 3 વનડે મેચોની સીરિઝ રમાની છે. આ પછી ભારતીય ટીમ વનડે ફોર્મેટમાં યોજાનારી ચેમ્પિયન્સ ટ્રોફીમાં ભાગ લેવાની છે. તે પાકિસ્તાનમાં આયોજિત થવાનું હતું, પરંતુ ભારતીય ક્રિકેટ કંટ્રોલ બોર્ડ (BCCI) એ પાકિસ્તાન પ્રવાસ કરવાનો ઇનકાર કરી દીધો હતો, જેના પછી ICCએ ભારતની મેચ દુબઈમાં યોજવાનો નિર્ણય લીધો હતો. ભારત છેલ્લે વર્ષ 2013માં ચેમ્પિયન્સ ટ્રોફી જીત્યું હતું અને વર્ષ 2017માં ફાઇનલમાં પાકિસ્તાન સામે હારી ગયું હતું.

WTC ફાઈનલમાં ભારત પહોંચશે તો જૂનમાં દ. આફ્રિકા સામે ટક્કર

ઓસ્ટ્રેલિયા સામેની સીરિઝમાં પાછળ પડ્યા બાદ ભારત માટે WTC ફાઈનલનો રસ્તો મુશ્કેલ બની ગયો છે. પરંતુ તેના દરવાજા સંપૂર્ણપણે બંધ નથી થયા. જો ભારતીય ટીમ ઓસ્ટ્રેલિયાને પાંચમી ટેસ્ટમાં હરાવશે તો ભારતે પ્રાર્થના કરવી પડશે કે ઓસ્ટ્રેલિયન ટીમ શ્રીલંકા સામેની બે મેચની ટેસ્ટ સીરિઝમાં હારી જાય. આ સ્થિતિમાં ભારત WTC ફાઈનલ માટે ક્વોલિફાઈ કરી શકે છે. જો ભારત આમ કરવામાં સફળ રહેશે તો ભારતીય ટીમ જૂનમાં લંડનમાં દક્ષિણ આફ્રિકા સામે ટાઈટલ મેચ રમશે. WTCની ફાઈનલ મેચ 11 થી 15 જૂન દરમિયાન રમાશે.

ભારતીય ટીમ ઈંગ્લેન્ડ-બાંગ્લાદેશનો પ્રવાસે જશે

જૂનથી ઓગસ્ટ દરમિયાન ભારતીય ટીમે પાંચ મેચોની ટેસ્ટ સીરિઝ માટે ઈંગ્લેન્ડના પ્રવાસે જવાની છે. ભારત અને ઈંગ્લેન્ડ વચ્ચે 20 જૂનથી 4 ઓગસ્ટ દરમિયાન યોજાનારી આ ટેસ્ટ સીરિઝ WTC 2025-2027 ચક્ર હેઠળ યોજાશે. ઈંગ્લેન્ડ પછી ભારતે ઓગસ્ટમાં 3 વનડે અને T20 મેચોની સીરિઝ માટે બાંગ્લાદેશનો પ્રવાસ કરવાનો છે. આ સીરિઝની તારીખ અને સ્થળની જાહેરાત કરવામાં આવી નથી.

ઘરઆંગણે ભારત વેસ્ટ ઈન્ડિઝની અને એશિયા કપ રમશે 

બાંગ્લાદેશ પ્રવાસ બાદ ભારતીય ટીમ 2 મેચની ટેસ્ટ સીરિઝ ઘરઆંગણે વેસ્ટ ઈન્ડિઝની સામે રમશે. આ માટે પણ હજુ તારીખ અને સ્થળની જાહેરાત કરવામાં આવી નથી, પરંતુ તે ઓક્ટોબરમાં રમાશે. વેસ્ટ ઈન્ડિઝ સામેની ટેસ્ટ સીરિઝ બાદ ટીમ T20 ફોર્મેટમાં યોજાનાર એશિયા કપમાં ભાગ લેશે. ઓક્ટોબર-નવેમ્બરમાં ભારત દ્વારા તેનું આયોજન કરવામાં આવનાર છે, જેમાં છ ટીમો ભાગ લેશે. ભારત આ ટુર્નામેન્ટનું ડિફેન્ડિંગ ચેમ્પિયન છે. વર્ષ 2026માં યોજાનાર T20 વર્લ્ડકપની તૈયારીઓને ધ્યાનમાં રાખીને આ ટુર્નામેન્ટ ખૂબ જ મહત્ત્વપૂર્ણ રહેશે.

આ પણ વાંચો : રોહિત શર્મા કેપ્ટન છે એટલે રમી રહ્યો છે, બાકી અત્યાર સુધી તો...: ઈરફાન પઠાણનો કટાક્ષ

ફરી ઓસ્ટ્રેલિયા સામે મુકાબલો 

ભારતને વર્ષ 2025ના અંતમાં ફરી એકવાર ઓસ્ટ્રેલિયા સામે રમવાની તક મળશે. ટીમ હવે નવેમ્બરમાં ઘરઆંગણે કાંગારૂ ટીમ સામે 3 વનડે અને 5 T20 મેચોની સીરિઝ રમશે.

વર્ષ 2025ના અંતમાં દક્ષિણ આફ્રિકા સામે ત્રણેય ફોર્મેટની સીરિઝ રમશે ભારત 

આ સિવાય વર્ષ 2025ના અંતમાં ભારતીય ટીમ દક્ષિણ આફ્રિકા સામે ત્રણેય ફોર્મેટમાં સીરિઝ રમશે. આ સિરીઝ ભારતમાં યોજાશે. ભારત નવેમ્બર-ડિસેમ્બર 2025માં દક્ષિણ આફ્રિકા સામે 2 ટેસ્ટ, ૩ વનડે અને 5 T20 મેચોની સીરિઝ રમશે.