Watch: એક હાથમાં કોફીનો કપ, બીજા હાથથી ક્રિકેટ ફેન્સે પકડ્યો શાનદાર કેચ, વીડિયો થયો વાયરલ

નવી દિલ્હી,તા. 14 ફેબ્રુઆરી 2024, બુધવાર 

ઑસ્ટ્રેલિયાના પર્થમાં મંગળવારે વેસ્ટ ઇન્ડિઝ સામે રમાયેલી ત્રીજી અને છેલ્લી ટી-20માં યજમાન ટીમ ભલે હારી ગઈ અને ડેવિડ વૉર્નર ભલે આખા સ્ટેડિયમમાં છવાઈ ગયો, પણ આ સિવાય એક ઘટના એવી ઘટી  જેમાં એક પ્રૌઢ પ્રેક્ષકે બધાના દિલ જીતી લીધાં હતાં. આ ફેને સ્ટેડિયમમાં બેઠેલા હજારો પ્રેક્ષકો સહિત કરોડો ટીવી-દર્શકોના દિલ પણ જીતી લીધા હતા. 

ઓસ્ટ્રેલિયા અને વેસ્ટ ઈન્ડિઝ વચ્ચેની ત્રીજી T20 મેચ દરમિયાન ઓસ્ટ્રેલિયાના પર્થના એક ક્રિકેટ ચાહકે એક હાથે લીધેલા શાનદાર કેચને કારણે વાયરલ થયો છે. આ કેચ જોઇને દરેક ક્રિકેટ ફેન્સ ખુશ થઇ ગયો હતો.    

આ ઘટના ત્યારે બની જ્યારે શેરફેન રધરફોર્ડે સ્પેન્સર જોહ્ન્સનને ડીપ ફાઈન લેગ પર સિક્સ ફટકારી હતી. આ ચાહક કોફી પી રહ્યો હતો એક હાથમાં કોફીનો ગ્લાસ હતો, છતાં સીટ પરથી ઉભો થઇને એક સેકેન્ડમાં જ કેચ પકડી લીધો હતો. 

ઑસ્ટ્રેલિયન ક્રિકેટ બોર્ડના સત્તાવાર ટ્વિટર હૅન્ડલ પર આ અનોખી ઘટનાનો વીડિયો શૅર કરવામાં આવ્યો હતો.

મેચની વાત કરીએ તો પર્થના મેદાન પર વેસ્ટ ઈન્ડિઝે 37 રનથી જીત મેળવી હતી. વિન્ડીઝે 3 ટી20 મેચોની સિરીઝ ગુમાવી છે કારણ કે તેને સિરીઝની પ્રથમ 2 મેચમાં હારનો સામનો કરવો પડ્યો હતો. વેસ્ટ ઈન્ડિઝના ઓલરાઉન્ડર રોસ્ટન ચેઝ ઉપરાંત આન્દ્રે રસેલે વિન્ડીઝને જીત અપાવવામાં મુખ્ય ભૂમિકા ભજવી હતી. 

બેટિંગ દરમિયાન રસેલે 7 સિક્સરની મદદથી 71 રન બનાવ્યા અને પોતાની ટીમને 220 રન સુધી પહોંચાડી દીધી. જેના જવાબમાં ઓસ્ટ્રેલિયા વોર્નરના 81 રન હોવા છતાં માત્ર 183 રન બનાવી શક્યું હતું.

પ્લેઇંગ 11

વેસ્ટ ઈન્ડિઝ: કાયલ મેયર્સ, જોન્સન ચાર્લ્સ, નિકોલસ પૂરન (wk), રોસ્ટન ચેઝ, રોવમેન પોવેલ (c), શેરફેન રધરફોર્ડ, આન્દ્રે રસેલ, જેસન હોલ્ડર, રોમારીયો શેફર્ડ, અકેલ હોસીન, અલ્ઝારી જોસેફ.

ઓસ્ટ્રેલિયા: ડેવિડ વોર્નર, જોશ ઈંગ્લિસ, મિશેલ માર્શ (કેપ્ટન), ગ્લેન મેક્સવેલ, એરોન હાર્ડી, ટિમ ડેવિડ, મેથ્યુ વેડ (વિકેટકીપર), એડમ ઝમ્પા, ઝેવિયર બાર્ટલેટ, સ્પેન્સર જોન્સન, જેસન બેહરેનડોર્ફ.