ડેટા સાચવતી મેમરીના પ્રકાર

આપણો સ્માર્ટફોન હોય કે કમ્પ્યૂટર, તેમાં આપણો ડેટા કેવી રીતે હેન્ડલ થાય છે એ થોડું જાણી લઇએ તો આ સાધનો પાસેથી કામ લેવાનું થોડું વધુ સરળ બની શકે.

આ સાધનોમાં આપણો ડેટા મુખ્યત્વે ત્રણ રીતે સ્ટોર થાય છે અને એ ત્રણ રીતે આપણે તેને એક્સેસ કરીએ છીએ.

આપણે સ્માર્ટફોનમાં કે કમ્પ્યૂટરમાં કોઈ એપ ઓપન કરીએ કે બ્રાઉઝિંગ કરીએ ત્યારે આ ત્રણમાંથી કોઈ એક રીતે સ્ટોર થયેલા ડેટા સુધી આપણે પહોંચીએ છીએ. ડેટા સ્ટોરેજ અને એક્સેસની આ ત્રણ રીત છે. (૧) કેશ (૨) મેમરી (૩) ડેટા ડ્રાઇવ.

૧. કેશ: આપણે પોતાના સાધનમાં જે કંઈ એક્સેસ કે ઓપન કરીએ એ બધું ફરીથી ઝડપથી ઓપન થાય એ માટે કેશ મેમરીમાં જમા થાય છે. આ પ્રકારની મેમરી સૌથી ઓછી હોય છે. તેથી તેમાં ડેટા સતત ઓવરરાઇટ થતો રહે છે.

૨. મેમરી: આ પ્રકારની મેમરીને આપણે રેન્ડમ એક્સેસ મેમરી (રેમ) તરીકે ઓળખીએ છીએ. સ્માર્ટફોન કે કમ્પ્યૂટરમાંના એક્ટિવ પ્રોગ્રામ અને પ્રોસેસનો ડેટા રેમમાં સ્ટોર થતો હોય છે. એટલે જ સ્માર્ટફોન કે કમ્પ્યૂટરમાં એક સાથે ઘણા બધા પ્રોગ્રામ કોઈ તકલીફ વિના ચલાવવા હોય તો તેમાં વધુ રેમ જોઇએ. જોકે આપણે પ્રોગ્રામ બંધ કરીએ એ સાથે રેમમાંનો ડેટા ભૂંસાઈ જાય.

૩. ડેટા ડ્રાઇવ: સ્માર્ટફોન/કમ્પ્યૂટરના પ્રોગ્રામની ફાઇલ, સેટિંગ્સની ફાઇલ્સ વગેરે ઉપરાંત આપણે પોતે ક્રિએટ કરેલ ડેટાની ફાઇલ ડેટા ડ્રાઇવમાં સ્ટોર થાય છે. આવી ડ્રાઇવ એચડીડી અથવા એસડીડી પ્રકારની હોય છે. તેમાં સ્ટોર થતો ડેટા એ ડ્રાઇવ બગડે નહીં ત્યાં સુધી તેમાં સચવાઈ રહે છે.