ઇન્સ્ટાગ્રામ પર હવે ડાયરેક્ટ મેસેજમાં પણ શેર કરી શકાશે મ્યુઝિક, જાણો કેવી રીતે

Music Share Feature in Instagram DM: ઇન્સ્ટાગ્રામ હવે તેની મેસેજિંગ સર્વિસમાં નવા ફીચર્સ એડ કરી રહ્યું છે. એપલની આઇમેસેજ અને અન્ય થર્ડ-પાર્ટી મેસેજિંગ એપ્સની હરોળમાં આવવા માટે ઇન્સ્ટાગ્રામ દ્વારા તેના ડાયરેક્ટ મેસેજમાં નવા ફીચરનો સમાવેશ કરવામાં આવ્યો છે. આ ફીચર છે મ્યુઝિક શેરિંગનો. ઇન્સ્ટાગ્રામની મેસેજ સર્વિસમાં આ પહેલાં શક્ય નહોતું, પરંતુ હવે એ આપવામાં આવ્યું છે.

થોડી મર્યાદા સાથે લોન્ચ કર્યુ ફીચર

ઇન્સ્ટાગ્રામ દ્વારા આ ફીચરને લોન્ચ કરતાની સાથે જ એની કેટલીક મર્યાદા પર રાખવામાં આવી છે. આ માટે કોઈ પણ ગીત ઇન્સ્ટાગ્રામ પર ઉપલબ્ધ હોવું જરૂરી છે અને એ 30 સેકન્ડ પૂરતું જ લિમિટેડ છે. આ પ્રતિબંધને કારણે ઇન્સ્ટાગ્રામની ઓડિયો લાઇબ્રેરીમાં જેટલા સોન્ગ હશે એ જ શેર કરી શકાશે. આ ગીત વધુમાં વધુ 30 સેકન્ડ પૂરતું હોઈ શકે છે અને એને કોઈ પણ વ્યક્તિ અને ગ્રુપ બન્નેમાં શેર કરી શકાય છે. આ માટે સ્ટિકર સેન્ડ કરવામાં આવે છે એ ટેબ પર ક્લિક કરવાનું રહેશે અને ત્યાર બાદ મ્યુઝિક પર ક્લિક કરી સોન્ગ સેન્ડ કરી શકાશે.

અન્ય ફીચર્સ

ઇન્સ્ટાગ્રામ દ્વારા મ્યુઝિક શેરિંગની સાથે ટ્રાન્સલેશન ટૂલ અને મેસેજ પિનિંગ ફીચર્સ પણ લોન્ચ કરવામાં આવ્યાં છે. ઇન્સ્ટાગ્રામ પર હવે 99 ભાષામાં ભાષાંતર કરી શકાશે. આ માટે કોઈ પણ ભાષામાં મેસેજ આવ્યો હોય તો એના પર ટેપ કરવું અને ટ્રાન્સલેટ વિકલ્પને સિલેક્ટ કરવું. ત્યાર બાદ ઓરિજિનલ મેસેજની સાથે ભાષાંતર થયેલા શબ્દ પણ યુઝર્સને જોવા મળશે. આ સાથે જ કોઇ પણ મેસેજમાં ફોટો અથવા તો રીલ્સ અથવા તો મેસેજને પિન કરવા માટે એટલે કે એને સૌથી ઉપર રાખવા માટેનું પણ ઓપ્શન આપવામાં આવ્યું છે. આ માટે જે-તે મેસેજને ટેપ કરી એના પર પિન ઓપ્શનને પસંદ કરવાથી એ થઈ જશે. આ જ રીતે ડાયરેક્ટ મેસેજમાં પણ ફેવરિટ ચેટને પિન કરી શકાય છે.

આ પણ વાંચો: ગૂગલ પ્લે સ્ટોર પર સરકારે બેન કરી 119 મોબાઇલ એપ્લિકેશન, મોટાભાગની ચાઇનીઝ એપ્સ… જાણો કેમ

મેસેજ શેડ્યૂલ ઓપ્શન

ઇન્સ્ટાગ્રામ દ્વારા મેસેજ શેડ્યૂલ ઓપ્શન પણ આપવામાં આવ્યું છે. આ માટે જે-તે વ્યક્તિને મેસેજ મોકલવાનો હોય એની ચેટ ઓપન કરવી. ત્યાર બાદ મેસેજ ટાઇપ કરવું. આ મેસેજ ટાઇપ કર્યા બાદ સેન્ડનું બટન છે એ દબાવી રાખવું. આ બટન દબાવી રાખતાં શેડ્યૂલ મેસેજનું ઓપ્શન આવશે અને ત્યાર બાદ સમય અને તારીખ નક્કી કરી દેવી. આ માટે યુઝર 29 દિવસ એડ્વાન્સમાં મેસેજ શેડ્યૂલ કરી શકે છે. આ સાથે જ કોઈ પણ વ્યક્તિ હવે ગ્રુપ ચેટમાં કોઈને ઇનવાઇટ મોકલવા માટે QR કોડનો ઉપયોગ કરી શકે છે. એ કોડને સ્કેન કરતાં જ જે-તે વ્યક્તિ ગ્રુપમાં આવી જશે.