એપલના એરડ્રોપને ટક્કર આપશે માઇક્રોસોફ્ટ, હવે એન્ડ્રોઇડ અને વિન્ડોઝ વચ્ચે ફાઇલ શેરિંગ પણ સરળ

Android File Share: માઇક્રોસોફ્ટ હવે ડાઇરેક્ટ એપલને ટક્કર આપવા જઈ રહ્યું છે. એપલની ડિવાઇઝ વચ્ચે ફાઇલ શેર કરવું ખૂબ જ સરળ છે. આઇફોન અને મેકબૂક વચ્ચે જો ફાઇલ શેર કરવું હોય તો એરડ્રોપનો ઉપયોગ કરી શકાય છે. આથી હવે માઇક્રોસોફ્ટે તેની વિન્ડોઝ પ્રોડક્ટમાં કેટલાક બદલાવ કર્યા છે. આ બદલાવને કારણે હવે એન્ડ્રોઇડ યુઝર્સ ખૂબ જ સરળતાથી તેમના વિન્ડોઝ લેપટોપની સાથે ફાઇલ શેર કરી શકશે. આ માટે વિન્ડોઝ તેનું નિયરબાય શેર ફીચરનો ઉપયોગ કરી રહ્યું છે. નિયરબાય શેર, વિન્ડોઝ ફોન લિન્ક અને લિન્ક ટૂ વિન્ડોઝ ફીચરની મદદથી એન્ડ્રોઇડ યુઝર માટે હવે ફાઇલ ટ્રાન્સફર કરવું ખૂબ જ સરળ બની ગયું છે. આ ફીચર ઘણાં સમયથી હતું, પરંતુ તેની લેટેસ્ટ અપડેટ બાદ એને એકદમ સરળ બનાવવામાં આવ્યું છે.

આ પણ વાંચો: ગેમ રમવાના શોખીન છો તો જાણો કેવી રીતે બંધ કરી શકાશે આઇફોનમાં એડ્સ

લેપટોપમાંથી એન્ડ્રોઇડમાં કેવી રીતે શેર કરશો?

1. એક વાર મોબાઇલને લેપટોપ સાથે લિન્ક કર્યા બાદ એ લેપટોપના નિયરબાય શેર ઓપ્શનમાં જોવા મળશે.
2. આ માટે લેપટોપમાં જે પણ ફાઇલ શેર કરવી હોય એના પર રાઇટ ક્લિક કરવાનું રહેશે.
3. ત્યાર બાદ નિયરબાય શેર ઓપ્શન પર ક્લિક કરીને એન્ડ્રોઇડ મોબાઇલનું નામ દેખાશે એના પર ક્લિક કરવું.
4. આ ક્લિક કર્યા બાદ મોબાઇલની સ્ક્રીન પર એક રીક્વેસ્ટ આવશે. ફાઇલને સેન્ડ કરવા માટે મોબાઇલમાં એક્સેપ્ટ બટન પર ક્લિક કરવું જરૂરી છે.
5. ફાઇલ ટ્રાન્સફર થઈ ગયા બાદ લેપટોપની સ્ક્રીન પર નોટિફિકેશન દ્વારા એ જણાવવામાં આવશે. આ ફાઇલ એન્ડ્રોઇડમાં ડાઉનલોડ ફોલ્ડરમાં જોવા મળશે. આ ફીચર વિન્ડોઝ 10 અને 11માં જ ઉપલબ્ધ છે.

મોબાઇલમાંથી લેપટોપમાં કેવી રીતે શેર કરશો?

1. આ માટે મોબાઇલ અને લેપટોપ પહેલેથી કનેક્ટ હોવા જરૂરી છે.
2. એન્ડ્રોઇડ ફોનમાં જે-તે ફાઇલને સિલેક્ટ કરો અને એના મેન્યુમાં જઈને શેર ઓપ્શન પર ક્લિક કરો.
3. એમાં લિન્ક ટૂ વિન્ડોઝ- સેન્ડ ટૂ પીસી ઓપ્શનને પસંદ કરો.
4. આ ઓપ્શન પસંદ કર્યા બાદ પ્રોસેસને ફોલો કરો. જો લેપટોપમાં ફાઇલને મેળવવા માટે એક્સેપ્ટનું ઓપ્શન આવે તો એના પર ક્લિક કરવું.
5. એ કરતાંની સાથે જ ફાઇલ નિયરબાય શેર માટેના ડિફોલ્ટ ફોલ્ડરમાં સેવ થઈ જશે.

આ પણ વાંચો: રિસ્કી છે પિક્સેલ ફોન, મોટાભાગના એન્ડ્રોઇડ ફોનમાંથી ગૂગલ કાઢશે આ એપ્લિકેશન

સેમસંગ યુઝર માટે વધુ સરળ

સેમસંગ ગેલેક્સી મોબાઇલનો ઉપયોગ કરતાં યુઝર્સ પાસે સેમસંગનું ગેલેક્સી બૂક હોય તો તેમના માટે ફાઇલ શેર કરવું ખૂબ જ સરળ છે. આ માટે સેમસંગમાં ક્વીક શેર ફીચર આપ્યું છે. આ ફીચરની મદદથી સેમસંગની ડિવાઇઝ વચ્ચે ખૂબ જ સરળતાથી ફાઇલની આપ-લે કરી શકાય છે.