એપલના નવા ચીફ ફાઇનાન્સિયલ ઓફિસર તરીકે મૂળ ભારતીયની નિમણૂક, જાણો આ હસ્તી કોણ છે

Apple New CFO: કેવન પારેખ હાલમાં નામ ખૂબ જ ચર્ચામાં છે. મૂળ ભારતીય કેવન પારેખને એપલે નવા ચીફ ફાઇનાન્સિયલ ઓફિસર તરીકે પસંદ કર્યા છે. તે પહેલી જાન્યુઆરીથી આ પદ સંભાળશે. ભારતીયો હાલમાં અમેરિકામાં અનેક કારણોસર ચર્ચામાં છે. ભારતીય મૂળના હોવાથી ભારતભરમાં ઘણાં લોકોને સવાલ થાય છે કે, આખરે આ હસ્તી છે કોણ?

નવી પ્રોડક્ટ લોન્ચ પહેલાં ફેરફાર

એપલ નવમી સપ્ટેમ્બરે આઇફોન 16 સીરિઝ, આઇવોચ 10 અને એરપોડ્સ સીરિઝ થ્રી લોન્ચ કરશે. આ લૉન્ચિંગ પહેલાં જ એપલે આ જાહેરાતના કારણે ચર્ચામાં છે. એપલે અમેરિકામાં સોમવારે જાહેર કર્યું હતું કે, હવે કંપની કેવન પારેખને ચીફ ફાઇનાન્સિયલ ઓફિસર તરીકે પ્રમોટ કરી રહી છે.

આ પણ વાંચો: માર્ચ સુધીમાં ભારતમાં છ લાખ જોબ ઊભી કરશે એપલ, ચીન થશે સાઇડલાઇન

કોણ છે કેવન પારેખ?

કેવન પારેખ મૂળ ભારતીય અમેરિકન છે. તેણે એપલ કંપનીને 2013માં જોઈન કરી હતી. ત્યારથી લઈને અત્યાર સુધી તેણે વિવિધ હોદ્દા પર કામ કરી ચૂક્યા છે. હાલ તેઓ એપલના વાઇસ પ્રેસિડન્ટ છે અને ફાઇનાન્સિયલ પ્લાનિંગ અને એનાલિસિસ, ઇન્વેસ્ટર રિલેશન્સ અને માર્કેટ રિસર્ચ ટીમને લીડ કરી રહ્યા છે. એપલમાં જ વર્લ્ડવાઇડ સેલ્સ, રિટેલ અને માર્કેટિંગ ફાઇનાન્સનો પણ તેઓ અનુભવ લઈ ચૂક્યા છે. એપલના પ્રોડક્ટ માર્કેટિંગ, ઇન્ટરનેટ સેલ્સ એન્ડ સર્વિસ અને એન્જિયરિંગ ટીમ ફાઇનાન્સિયલ સપોર્ટ દ્વારા તેમણે કારકિર્દીની શરૂઆત કરી હતી.

એપલ પહેલાં ક્યાં કામ કર્યું હતું?

એપલ કંપની જોઈન કરવા પહેલાં કેવન પારેખે થોમસોન રોઇટર્સ અને જનરલ મોટર્સમાં સિનિયર લીડરશિપનો રોલ સંભાળ્યો હતો. અભ્યાસ પૂરો કર્યા બાદ તેમણે ન્યૂ યોર્કની જનરલ મોટર્સની બ્રાન્ચમાં ડિરેક્ટર ઓફ બિઝનેસ ડેવલપમેન્ટની પોસ્ટ સંભાળી હતી. 2009માં તેઓ થોમસોન રોઇટર્સમાં ફાઈનાન્સ ડિપાર્ટમેન્ટમાં વાઇસ પ્રેસિડન્ટ તરીકે જોડાયા. આ જ કંપનીમાં તેમને કોર્પોરેટ ટ્રેઝરર તરીકે પ્રમોશન મળ્યું હતું. આ દરમિયાન તેમણે વર્ષ 2013માં એપલ જોઈન કરી હતી.

આ પણ વાંચો: આઇફોન 16ના લોન્ચ પહેલાં લીક થઈ કિંમત, ભારતમાં કેટલા રૂપિયામાં મળી શકે છે નવો મોબાઇલ?

કેવન પારેખનો શૈક્ષણિક અભ્યાસ 

હાઇસ્કૂલ અભ્યાસ પૂરો કર્યા પછી કેવન પારેખે મિશિગન યુનિવર્સિટી જોઈન કરી હતી. 1994માં તેણે ઇલેક્ટ્રિક એન્જિયરિંગમાં બેચલર ઓફ સાયન્સની ડિગ્રી મેળવી હતી. આ દરમિયાન તેણે ઘણાં પ્રોજેક્ટમાં કામ કર્યું હતુ જેને કારણે તેને તેના ફિલ્ડનું પ્રેક્ટિકલ નોલેજ મળ્યું હતું. 2000માં કેવન પારેખે યુનિવર્સિટી ઓફ શિકાગોમાંથી ફાઇનાન્સ એન્ડ સ્ટ્રેટેજિક મેનેજમેન્ટમાં માસ્ટર ઓફ બિઝનેસ એડમિનિસ્ટ્રેશનની ડિગ્રી મેળવી હતી.