વેલેન્ટાઈન વીકના પ્રારંભની સાથે યુવાઓમાં ખરીદીનો ધમધમાટ વધ્યો

- બ્રાન્ડેડ આર્ટીકલ્સના સ્ટોકનો સંગ્રહ કરાયો

- શહેરના બ્રાન્ડેડ શોરૂમ તેમજ મોલમાં યુવાઓને ખરીદી અર્થે આકર્ષવા માટે મનોહર સુશોભન અને શણગાર કરાયા

આગામી તા.૧૪ ફેબુ્રઆરીના રોજ વેલેન્ટાઈન ડે ઉજવાશે. તે પહેલા ગોહિલવાડમાં તા.૭ ને બુધવારથી રોઝ ડેના સેલીબ્રેશન સાથે કોલેજીયન્સ યુવાઓ દ્વારા વેલેન્ટાઈન વીકની ઉજવણીનો પરંપરાગત રીતે પ્રારંભ કરાયો હતો. ફેબુ્રઆરી માસને કોલેજીયન યુવાઓ દ્વારા વેેલેન્ટાઈનનો મહિનો તરીકે ઓળખાવે છે અને આ માસની લવબર્ડસ કાગડોળે પ્રતિક્ષા કરતા હોય છે. તા.૭ થી લઈને તા.૧૪ સુધીના વેલેન્ટાઈન વીક અંતગર્ત દરરોજ અલગ-અલગ દિવસ યુવાઓ દ્વારા ઉત્સાહભેર મનાવવામાં આવશે. પ્રેમનો એકરાર કરવાના આ ખાસ સપ્તાહ દરમિયાનના દરેક દિવસનુ યુવાઓમાં ખાસ મહત્વ રહેલુ છે. જેમાં તા.૮ ને ગુરૂવારે પ્રપોઝ ડે, તા.૯ ને શુક્રવારે ચોકલેટ ડે, તા.૧૦ ને શનિવારે ટેડી ડે, તા.૧૧ ને રવિવારે પ્રોમીસ ડે, તા.૧૨ ને સોમવારે હગ ડે, તા.૧૩ ને મંગળવારે કીસ ડે તેમજ વીકના અંતિમ દિવસ તા.૧૪ને બુધવારે વેલેન્ટાઈન ડે મનાવવામાં આવશે. આ દિવસે યુવા મિત્રો દ્વારા પરસ્પર ફ્રેન્ડશીપ બેલ્ટ સહિતની મનપસંદ ગીફટ આર્ટીકલ્સ સહિતની ચીજવસ્તુઓની સરપ્રાઈઝ ગીફટની  આપ-લે કરવામાં આવશે. વેલેન્ટાઈન વીકનો પ્રારંભ થતાની સાથે જ શહેરના ઉપરોકત વિવિધ વ્યાપારી વિસ્તારોમાં, નામાંકિત શોરૂમ, ફલાવર શોપ, મોલ તેમજ હોટલ, રેસ્ટોરન્ટ, ફાર્મહાઉસ સહિતના સ્થળોએ યુવાઓની સારી એવી ભીડ દ્રશ્યમાન થઈ રહી છે. આ યુવાઓને આકર્ષવા માટે બ્રાન્ડેડ કંપનીઓના સંચાલકો દ્વારા વેલેન્ટાઈન વીકને અનુલક્ષીને વિશેષ સુશોભન અને શણગાર કરાયા છે. એટલુ જ નહી ઉપરોકત અનેક સ્થળોએ ગીફટ આર્ટીકલ્સની સાથે વેલેન્ટાઈનને લગતા મનોહર લખાણ સાથેના આકર્ષક કવર, શો-પીસ, આકર્ષક ગીફટ પેકીંગ ઉપર હેપી વેલેન્ટાઈનના ડિઝાઈનર લોગોઝના સ્ટીકર એટેચ કરાઈ રહ્યા છે.

જરા હટકે ગીફટ આર્ટીકલ્સનો ક્રેઝ વધ્યો

અન્ય મહાનગરોની જેમ ગોહિલવાડમાં પણ  યુવાનો દ્વારા મનપસંદ વ્યકિતને જરા હટકે ગીફટ આપવાનો ક્રેઝ વધી રહ્યો છે. સરપ્રાઈઝ ગીફટની યાદીમાં ઈંગ્લિશ ગુલાબ અને કાર્ડની સાથોસાથ આકર્ષક પેકીંગમાં ઈયરફોન, હેન્ડસફ્રી, પાવરબેન્ક સહિતની મોબાઈલની આવશ્યક એસેસરીઝ ઉપરાંત કાંડા ઘડીયાળ, સાઈડ બેગ, ટ્રેકશુટ, ફોટોફ્રેમ, ટ્રીમીંગ કીટ, એલ.ઈ.ડી., હાર્ટ શોપીસ, બ્રાન્ડેડ ચશ્મા, ગારમેન્ટ સહિતની ચીજવસ્તુઓ સામેલ છે. આ સંદર્ભે સોશ્યલ મિડીયામાં પણ ઓનલાઈન માર્કેટમાં વિશેષ વળતર, ડિસ્કાઉન્ટ સાથે માર્કેટમાં ધૂમ પ્રચાર થઈ રહ્યો છે.