ગોંડલમાં અઢી, જેતપુરમાં બે ઈંચ કંડોરણામાં ધીમીધારે એક ઈંચ વરસાદ

જેતપુરના વાળા ડુંગરા પાસેનો છાપરવાડી-ર ડેમ ઓવરફલો

જેતપુર, ગોંડલમાં મેળાના મેદાનમાં પાણી ભરાઈ જતાં રાઈડસ બંધ, વરસાદથી કૃષિ પાકોને મોટો ફાયદો થવાની ખેડૂતોને આશો

ગોંડલ માં ગત રાત થી મેઘરાજાની ધમાકેદાર એન્ટ્રી થઈ હતી.અને છેલ્લા ૨૪ કલાકમાં અઢી ઇંચ વરસાદ વરસ્યો હતો.વરસાદ ને કારણે ઠેરઠેર પાણી ભરાયા હતા.સંગ્રામસિંહ હાઈસ્કૂલનુ મેદાન પાણી પાણી થતા મેદાનમાં યોજાયેલ લોકમેળા નાં સ્ટોલ લથબથ બન્યા હતા.અલબત્ત વરસાદ ને કારણે મેળો ખાલીખમ્મ હતો. રાઇડ્સ ચાલુનાં હોય અને સતત વરસાદ હોય  મેળા નાં ધંધાર્થીઓ માટે આજે સાતમ ફેઇલ ગઈ હતી.

જેતપુર ગઈકાલે રાતથી મેઘરાજાની સવારી આવી પહોંચતાં બે ઈંચ પાણી પડી ગયું હતું.  જીમખાના મેદાનમાં જન્માષ્ટમીનો લોકમેળો વરસાદમાં ધોવાઈ ગયો હતો. વરસાદને કારણે મેળામાં ઠેર-ઠેર પાણીનાં ખાબોચિયાં ભરાઈ ગયાં હતાં. આ ઉપરાંત મોટી રાઈડસ પણ હજુ ચાલુ ન થતાં વેપારીઓમાં ભારે નારાજગી જોવા મળી રહી છે. પ્રથમ દિવસે ખૂબ જ ઓછા લોકોએ મુલાકાત લીધી હોવાનું જાણવા મળી રહ્યું છે. રાઈડ્સ વિનાના મેળામાં વરસાદને લીધે ધંધો ઠપ થઈ જતાં વરસાદ વિરામ લે અને મેળાના દિવસો વધારવામાં આવે એવી માગ કરવામા આવી રહી છે.

જેતપુર તાલુકાના ખીરસરા, જાંબુડી, પ્રેમગઢ, મેવાસા, હરીપર સહિત ગામોમાં ધોધમાર વરસાદ વરસ્યો હતો.  ધોધમાર વરસાદ વરસતા રોડ ઉપર પાણી વહેતા થયાં હતા. આ વખતે પડેલી ભારે ગરમી અને ઉકળાટ બફારા વચ્ચે પવન સાથે વરસાદનું આગમન થતા વાતાવરણમાં ઠંડક પ્રસરી હતી.

જેતપુરના વાળા ડુંગરા પાસેનો છાપરવાડી-૨ ડેમ ઓવરફલા થયો છે.

જામકંડોરણામાં ગત રાત્રીના ધીમીધારે વરસાદ શરૃ થયો હતો. જે જે સતત ધીમીધારે ઝરમર વરસાદ ચાલુ છે. ગતરાત્રીથી આજે સાંજ સુધીમાં જામકંડોરણામાં ર૪ મી.મી. (એક ઈંચ) વરસાદ પડયો હતો. આ વરસાદથી ખેતીના પાકોને ફાયદો થશે જેથી ખેડૂતોમાં ખુશીનો માહોલ જોવા મળેલ છે હજુ પણ વરસાદી માહોલ છવાયેલો છે અને ધીમીધારે ઝરમર વરસાદ ચાલુ છે.