ખંભાળિયામાં રહેણાક મકાનમાંથી 72 હજારના મુદ્દામાલની ચોરી

હરસિધ્ધિ નગરમાં તસ્કરો ત્રાટક્યા

કબાટનું તાળું તોડી રોકડ, દાગીના ઉઠાવી ગયા

ખંભાળિયા: ખંભાળિયાનાં હરસિધ્ધિનગર વિસ્તારમાં મકાનનો નકુચો તોડી તસ્કરોએ અંદર પ્રવેશી કબાટનું તાળું તોડી રોકડ, દાગીના મળી ૭૨ હજારના મુદ્દામાલની ચોરી કરી જતાં ફરિયાદ નોંધાવાઇ છે.

ખભાળિયામાં હરસિધ્ધિનગર વિસ્તારમાં રહેતા ભાવેશભાઈ નટવરલાલ મર્દાનિયા નામના ૪૫ વર્ષનાં યુવાનના મકાનમાં તસ્કરોએ રાત્રિનાં સમયે ત્રાટકી, આ મકાનના દરવાજાનો નકુચો તોડીને અહીં બેડરૂમમાં રાખવામાં આવેલા કબાટનું તાળું તોડી પાડયું હતું. આ કબાટમાં રહેલી તિજોરીમાંથી સોનાના ત્રણ ચેન, સોનાનું બિસ્કીટ, પર્સમાં રાખવામાં આવેલા રૂપિયા ૨૦૦૦ ચોરી કરીને લઇ ગયા હોવાનું ખુલવા પામ્યું છે.

આમ, દાગીના રોકડ સહિત કુલ રૂા. ૭૨ હજારનાં મુદ્દામાલની ચોરી થવા સબબ  ખંભાળિયા પોલીસે ભાવેશભાઈની ફરિયાદ પરથી ગુનો નોંધી તસ્કરોને ઝડપી લેવા માટેના ચક્રો ગતિમાન કર્યાં છે.