ધો.9 ના વિદ્યાર્થીઓની પ્રખરતા શોધ કસોટીનું પરિણામ જાહેર

- 9 ફેબુ્રઆરીમાં ગુજરાત બોર્ડ દ્વારા લેવાયેલ

- ભાવનગર જિલ્લામાંથી 5889 વિદ્યાર્થીઓએ પરીક્ષા આપી હતી : સ્વા. ગુરૂકુળનો વિદ્યાર્થી સાતમાં ક્રમે

ગુજરાત શિક્ષણ બોર્ડ દ્વારા ગઇ તા.૯ ફેબુ્રઆરીના રોજ ધો.૧૦ પૂર્વે વિદ્યાર્થીનું મૂલ્યાંકન કરવા અને તેની પ્રતિભાને બહાર લાવવા ઉપરાંત રોકડ પુરસ્કાર મેળવવા પ્રખરતા શોધ કસોટીનું ભાવનગર ખાતે ૧૦ કેન્દ્રો પરના ૨૭ બિલ્ડીંગમાં પરીક્ષા લેવામાં આવી હતી. જેમાં નોંધાયેલ ગુજરાતી માધ્યમમાં ૫૪૪૮ અને અંગ્રેજી માધ્યમના ૭૭૮ વિદ્યાર્થીઓમાંથી કુલ ૫૮૮૯ વિદ્યાર્થીઓએ પરીક્ષા આપી હતી.

આ પ્રખરતા શોધ કસોટી-૨૦૨૪માં મેરીટ (પર્સેન્ટાઇલ રેન્ક)ના આધારે રાજ્યના પ્રથમ ૧૦૦૨ વિદ્યાર્થીઓની યાદી આજરોજ બોર્ડની વેબસાઇટ પર મૂકવામાં આવેલ છે. પરીક્ષા આપેલ તમામ વિદ્યાર્થીઓના ગુણ પત્રકો અને મેરીટ યાદીમાં સમાવેશ થયેલ વિદ્યાર્થીઓના પ્રશસ્તિપત્ર સંબંધિત શાળાઓને ધો.૧૦ અથવા ધો.૧૨ના ગુણપત્રક વિતરણ સાથે મોકલી આપવામાં આવશએ. ઉક્ત સાહિત્ય મળ્યેથી શાળાએ તેના પ્રખરતા શોધ કસોટી-૨૦૨૪ (ટીએસટી)ના પરીક્ષાર્થીઓની ખરાઇ કર્યાં બાદ સંબંધિત વિદ્યાર્થીને ગુણપત્રક, પ્રશસ્તિપત્ર સમયસર વિતરણ કરવાના રહેશે. આ કસોટીમાં ગણેશ શાળા ટીમાણાની વિદ્યાર્થિની કોતર નિશાબેન મુળજીભાઇએ ૧૮૨.૭૧ માર્કસ અને ૯૯.૯૯ પીઆર સાથે સમગ્ર ગુજરાત રાજ્યમાં પ્રથમ ક્રમ મેળવી સાબીત કરી દીધું છે કે શિક્ષણ માટે સંપત્તિ અને સગવડ નહીં પણ શિક્ષણની પ્રબળ ભૂખ અને સખત મહેનતની તમન્ના થકી ઉચ્ચ પરિણામ લાવી શકાય છે. ગણેશ શાળાના કુલ ૪૮ બાળકો પસંદગી પામ્યા છે. આ સાથે ભાવનગરના સ્વામિનારાયણ ગુરૂકુળના ૫૪ વિદ્યાર્થીઓએ સિદ્ધિ પ્રાપ્ત કરી છે. સ્વામિનારાયણ ગુરૂકુળના મકવાણા યક્ષ જયેશભાઇએ ૧૭૮.૦૨ માર્કસ તેમજ ૯૯.૯૮ પીઆર રેન્ક સાથે સમગ્ર રાજ્યમાં ૭મો ક્રમ પ્રાપ્ત કરી અદ્વિતીય સિદ્ધિ પ્રાપ્ત કરી છે. આ ઉપરાંત પંડિત દર્શિલ અનિલભાઇએ ૧૭૫.૦૪ માર્ક સાથે ૧૧મું સ્થાન પ્રાપ્ત કરેલ છે.