રાળગોન ગામે દારૂની 348 બોટલ સાથે એક શખ્સ ઝડપાયો, 2 ફરાર

- બાવળની કાંટમાં દારૂ ઉતારતા હતા ત્યારે પોલીસ પ્રગટ થઈ

- પોલીસે ડસ્ટર કાર, બાઈક, એક મોબાઈલ ફોન અને દારૂનો જથ્થો જપ્ત કર્યો

બનાવની મળતી વિગત મુજબ તળાજાના રાળગોનની સીમમાં ખારડી નદીના ભાગે સરકારી પડતર જમીનમાં બાવળની કાંટમાં કેટલાક શખ્સો ડસ્ટર કારમાંથી વિલાયતી દારૂનો જથ્થો છૂપાવી રહ્યા હોવાની ચોક્કસ બાતમીના આધારે તળાજા પોલીસના સ્ટાફે આજે બુધવારે દરોડો પાડતા ગોપાલ સુખદેવભાઈ બારૈયા (રહે, પીપરલા રોડ, ટાવર પાસે, સથરા ગામ, તા.તળાજા) નામના શખ્સને બાવળની કાંટ અને ડસ્ટર કારમાં રાખેલી વિદેશી દારૂની નાની-મોટી બોટલ નં.૩૪૮ સાથે ઝડપી લીધો હતો. પોલીસની રેઈડમાં ભયલુભા રણજીતસિંહ ગોહિલ (રહે, રાળગોન, તા.તળાજા) અને ખુશાલ ઉર્ફે જીગર ભરતભાઈ માળી (રહે, સુભાષનગર, ભાવનગર) નામના શખ્સો બાવળની કાંટનો લાભ લઈ નાસી ગયા હતા.

પોલીસે સ્થળ પરથી વિદેશી દારૂનો જથ્થો ઉપરાંત ડસ્ટર કાર નં.જીજે.૦૧.કેઆર.૯૫૪૬, પેશન બાઈક નં.જીજે.૦૪.ડીએમ.૪૮૩, એક મોબાઈલ ફોન મળી કુલ રૂા.૩,૯૫,૦૮૦નો મુદ્દામાલ કબજે કરી ત્રણેય બુટલેગર સામે પ્રોહિ. એક્ટની કલમ ૬૫ (એ), ૬૫ (ઈ), ૧૧૬-બી, ૯૮ (ર), ૮૧ મુજબ ગુનો દાખલ કરી વધુ તપાસ હાથ ધરી છે.