શહેરમાં ઠંડીના પારાનો હાઈજમ્પ, 24 કલાકમાં તાપમાન 2.8 ડિગ્રી ઉંચકાયું

રાત્રે ઠંડીમાં થયેલો ઘટાડો, નવેમ્બરના અંતમાં ઠંડીની વધ-ઘટનો દોર જારી

દિવસ દરમિયાન 14 કિ.મી.ની ઝડપે ઠંડો પવન ફૂંકાયો, તાપમાન 2.2 ડિગ્રી ઘટયું

ભાવનગર :  શહેરમાં ઠંડીની વધ-ઘટનો દોર જારી રહ્યો છે. ઘણાં સમય બાદ રાત્રિના સમયે ઠંડીનું જોર નહિવત પ્રમાણમાં રહેતા ઠંડીના પારાએ પોણા ત્રણ ડિગ્રીનો હાઈજંપ લગાવ્યો હતો. જ્યારે બીજી તરફ દિવસ દરમિયાન ૧૪ કિ.મી.ની ઝડપે ફૂંકાયેલા પવનના કારણે શહેરીજનોએ ગુલાબી ઠંડીનો અહેસાસ કર્યો હતો. વાતાવરણ ટાઢું રહેતા તાપમાનમાં પણ નોંધપાત્ર ૨.૨ ડિગ્રીનો ઘટાડો જોવા મળ્યો હતો.

નવેમ્બર માસનું અંતિમ સપ્તાહ ઠંડીમાં નાટકીય રીતે પરિવર્તન લાવી રહ્યું છે. થોડા દિવસ રાત્રિના સમયે ઠંડીનું જોર વધતું જોવા મળ્યું હતું. જ્યારે દિવસે ઠંડીની કોઈ અસર ન વર્તાતી હોવાથી તાપમાનમાં સતત ઉછાળો જોવા મળી રહ્યો હતો. પરંતુ છેલ્લા ૨૪ કલાકમાં સ્થિતિ બદલાઈ છે. નાટકીય રીતે રાત્રિના સમયે ઠંડીનું જોર એકદમ જ ઘટી ગયું હતું. જેના કારણે શહેરનું લઘુતમ તાપમાન પાછલા ૨૪ કલાકમાં સડસડાટ ૨.૮ ડિગ્રી ઉંચકાઈને ૧૯.૨ ડિગ્રીને આંબી ગયું હતું. છેલ્લે ૨૦મી નવેમ્બરે લઘુતમ તાપમાન ૧૯.૨ ડિગ્રી રહ્યા બાદ પ્રથમ વખત ઠંડીનો પારો ૧૯ ડિગ્રીની ઉપર પહોંચ્યો છે. રાત્રે ઠંડી નહિવત રહ્યા બાદ આજે સવારે દી' ઉગતાની સાથે જ ઠંડા વાયરા ફૂંકાતા રહેતા સવારથી સાંજ સુધી વાતાવરણમાં ઠંડક રહી હતી. સવારે ૧૨ કિ.મી. બાદ બપોરે પવનની ઝડપ ૧૪ કિ.મી. પ્રતિકલાકે પહોંચી જતાં ભાવેણાંવાસીઓએ ગુલાબી ઠંડીનો અહેસાસ કર્યો હતો. ઠંડીના પગલે મહત્તમ તાપમાન પણ ગઈકાલની તુલનામાં ૨.૨ ડિગ્રી ઘટીને ૨૯.૪ ડિગ્રીએ પહોંચી ગયું હતું. ચાલુ સપ્તાહમાં પ્રથમ વખત દિવસે ઠંડીનું પ્રમાણ અનુભવાતા તાપમાનમાં ઘટાડો નોંધાયો હતો.