શહેરના મીણબત્તી સર્કલ નજીક કાર અડફેટે યુવાનનું કરૂણ મોત

- બાઈક લઈ યુવાન ઓફિસે જવા નીકળ્યા ત્યાં રસ્તામાં કાળનો ભેટો થયો

- બેભાન અવસ્થામાં હોસ્પિટલ ખસેડાયેલા ઈજાગ્રસ્તે ટૂંકી સારવારમાં જ દમ તોડી દીધો : કારચાલક ફરાર

કરૂણ ઘટનાની મળતી વિગત અનુસાર શહેરના કાળુભા રોડ, ડો.લાલશંકરની ચાલી, માધવ જ્યોતની બાજુમાં રહેતા હાર્દિકભાઈ બળવંતભાઈ ડાભી (ઉ.વ.૩૮) આજે શુક્રવારે સવારના સમયે નિત્યક્રમ મુજબ તેમનું બાઈક નં.જીજે.૦૪.બીએન.૫૮૫૮નું લઈ જવેલર્સ સર્કલ, આર.કે. પોઈન્ટમાં આવેલ મંથક કેબલ નેટવર્ક નામની ઓફિસે જવા નીકળ્યા હતા. ત્યારે સવારે ૯-૩૦ કલાકે મીણબત્તી સર્કલથી જવેલર્સ સર્કલ વચ્ચે જોગર્સ પાકના પહેલા ગેટ પાસે પહોંચતા પાછળથી પુરપાટ ઝડપે આવી રહેલ કાર નં.જીજે.૧૪.બીડી.૭૪૫૬ના ચાલકે બાઈક સાથે અકસ્માત સર્જતા હાર્દિકભાઈ ડાભીને પગના પંજા, ટચલી આંગણી, પેટ અને માથાના ભાગે ગંભીર ઈજા અને મોઢામાંથી લોહી નીકળી જવાથી ગંભીર હાલતમાં સર ટી.હોસ્પિટલના એસઆઈસીયુ વોર્ડમાં દાખલ કરાયા હતા. જ્યાં સારવાર દરમિયાન આશાસ્પદ યુવાન હાર્દિકભાઈનું બપોરે ૨-૪૦ કલાકે મૃત્યુ થયું હોવાનું હોસ્પિટલ પોલીસે જણાવ્યું હતું. બનાવ અંગે મૃતકના પિતા બળવંતભાઈ હેમુભાઈ ડાભી (ઉ.વ.૬૯)એ અકસ્માત સર્જી નાસી છૂટેલા કારના ચાલક સામે નિલમબાગ પોલીસમાં ફરિયાદ નોંધાવી છે.