તળાજામાં વિદેશી દારૂ અને બિયરના ટીન ભરેલા ટ્રક સાથે શખ્સ ઝડપાયો

- ઈંટનાં જથ્થા તળે દારૂ-બિયર છૂપાવ્યા હતા

- લોકલ ક્રાઇમ બ્રાન્ચે વિદેશી દારૂ, બિયરના ટીન અને ટ્રક મળી કુલ રૂ. 7,40,200 નો મુદ્દામાલ કબજે લીધો

પોલીસ સૂત્રો પાસેથી પ્રાપ્ત થતી વિગતો મુજબ ભાવનગર, એલ.સી.બી. પોલીસ સ્ટાફ તળાજા વિસ્તારમાં પેટ્રોલીંગમાં હતાં. તે દરમ્યાન તળાજા ગામે મહુવા ચોકડીએ આવતાં બાતમી મળેલ કે,અશોક લેલન્ડ ટ્રક નંબર જીજે ૦૪ ડબલ્યુ ૫૮૫૩ માં ઇંટો ભરીને ભાવનગર તરફથી આવે છે.જેમાં બીયર તથા ઇગ્લીશ દારૂ ભરીને મહુવા તરફ જાય છે. જે બાતમી આધારે વોચ ગોઠવી આવી રહેલ ટ્રકને અટકાવી તલાશી લેતા ઇંટના જથ્થા તળે છુપાવેલા ઇંગ્લિશ દારૂ ૧૫૪ બોટલ અને બિયર નાં ટીન ૭૨ મળી આવતા પોલીસે મેહુલ ભુપતભાઇ બાંભણીયા ઉ.વ.૩૨ ( રહે.ગાધકડા બજાર,કબ્રસ્તાનની સામે,મહુવા જી.ભાવનગર )ને વિદેશી દારૂ,બિયરના ટીન,ટ્રક મળી કુલ રૂપિયા ૭,૪૦,૨૦૦ ના મુદ્દામાલ સાથે ધરપકડ કરી તેની વિરૂધ્ધ તળાજા પોલીસ સ્ટેશનમાં પ્રોહિબિશનની અલગ-અલગ કલમો હેઠળ ગુન્હો દાખલ કરી આગળની કાર્યવાહી હાથ ધરવામાં આવેલ છે.