લાલાવદરમાં તળાવમાં ન્હાવા પડેલા ૧૨ વર્ષીય તરૃણનું મોત

ચિતલના રાંઢિયા ગામે ડૂબી જવાની ઘટના બાદ

રવિવારની રજા હોવાથી ૫ થી ૬ બાળકો તળાવે ન્હાવા ગયા અને દુર્ઘટના બની

અમરેલી તાલુકાના લાલાવ દર ગામે તળાવમાં ૫થી ૬ જેટલા વિદ્યાર્થીઓ ન્હાવા માટે ગયા હતા તેમાં તળાવના ઉંડા ખાડામાં ડૂબી જવાથી આદિવાસી પરિવારના બાળકનું મોત થતાં શોકનો માહોલ છવાયો હતો.

અમરેલી તાલુકાના લાલાવદર ગામે રહેતા આદિવાસી અર્જુન બારૈયા (ઉ.વ.૧૧) ધો. ૬માં અભ્યાસ કરતો હતો તે અને તેના મિત્રો લાલાવદર ગામે આવેલા તળાવમાં ન્હાવા માટે ગયા હતા. ત્યારે અર્જુન બારૈયા નામનાં બાળક તળાવમાં આવેલ ઉંડા ખાડામાં ડૂબી જતાં મોત થયું હતું. આ ઘટનાની જાણ લાલાવદર ગામમાં થતા ગામલોકો આ તળાવ પાસે આવી અર્જુનના મૃતદેહને બહાર કાઢી અમરેલી સિવિલ હોસ્પિટલ ખાતે પીએમ માટે લઇ જવામાં આવ્યો હતો.  ઘટનાની જાણ અમરેલી પોલીસમાં થતાં અમરેલી પોલીસે આગળની કાર્યવાહી હાથ ધરી હતી.