કિચન ટિપ્સ .

* એક કિલોગ્રામ સાધારણ ચાની ભૂકીમાં ૨૫૦ ગ્રામ લાંબી પાંદડાંવાળી ચા મિક્સ કરીને રાખો. ચાનો સ્વાદ વધી જશે.

* ચોખા બાફતી વખતે એમાં અડધી ચમચી ઘી કે તેલ મિક્સ કરો. ચોખા બરાબર ફૂલી જશે.

* સાદા અને શાહી શાકને એક અલગ સ્વાદ આપવા માટે એમાં માવો મિક્સ કરો. જો માવો મિક્સ કરવાનું મુશ્કેલ હોય તો ચીઝ સ્લાઈસ મિલાવો.

* રોટલી વણતી વખતે અટામણને બદલે મેંદાનો ઉપયોગ કરો. રોટલી વધારે સરસ બનશે.

* વાસણ માંજતી વખતે રાખના બદલે ચળામણનો ઉપયોગ કરો.

* લોખંડની મોટી કઢાઈ સાફ કરવા માટે એની પર હાર્પિક લગાવી અડધો કલાક રાખી મૂકો. પછી ઘસી કાઢો. કઢાઈ ચમકવા લાગશે.

* ગેસની સગડી નીચે રેક્ઝીનનો ટુકડો પાથરી દો અને થોડા થોડા સમયના અંતરે  સાફ કરતાં રહો. આમ કરવાથી નીચેની જગ્યા ગંદી નહીં થાય.

* જે જગ્યાએ ગેસ મૂક્યો હોય એની પાછળની દીવાલ પણ નિયમિત રીતે સાફ કરતાં રહો.

* જો સેલડમાં ટામેટાં, ડુંગળી, બીટ અને કાકડીના ટૂકડા  વધ્યા હોય તો બે લીલાં મરચાં, ચાટ મસાલો, શેકેલા જીરાનો પાઉડર અને દહીં નાખી મિક્સરમાં પીસી લો. આ એક સ્વાદિષ્ટ રાયતું છે.

* જો સમયનો અભાવ હોય અને લોટ બાંધવાનું ન ગમતું હોય તો લોટ બાંધવાનું મશીન લઈ લો. આ મશીન લોટ બાંધવા ઉપરાંત માખણ પણ કાઢી શકશે અને ભજિયાં માટેનું સરસ ખીરું પણ થોડી જ વારમાં તૈયાર થઈ શકે છે.

* માઈક્રોવેવ એક અત્યંત આજ્ઞાાંકિત નોકરની જેમ કામ કરે છે. તેને તમારા કિચનમાં જરૂર રાખો.

* તમે જ્યારે માઈક્રોવેવ ખરીદો ત્યારે એનો નાનોમોટો કોર્સ જરૂર કરી લો. આમ કરવાથી તમે શરૂઆતથી જ એનો વધુ સારો ઉપયોગ કરી શકશો.

* માઈક્રોવેવે ખરીદવાની સાથે કેટલાંક પ્લાસ્ટિકના બાઉલ, વાટકી અને કઢાઈ પણ જરૂર ખરીદી લો.

* એક સ્પ્રે ક્લીનર હંમેશાં કિચનમાં રાખો. જો કપડાં પર કંઈ ઢોળાઈ જાય તો જરૂર સ્પ્રે કરો, એનાથી ડાઘ તરત નીકળી જશે.

* સિંક પાસે એક વાટકી મૂકી રાખો, જેમાં વપરાયેલી ચા ભેગી કરો અને પછીથી પાણીમાં ઉકાળી છોડમાં ખાતર તરીકે વાપરો.