'ઢોલીડા' સોંગ પર નવસારીની વૃધ્ધાનો નજાકત ભર્યા ડાન્સનો વિડીયો વાયરલ

-સિનિયર સીટીઝનના મહિલા દિનના સાંસ્કૃતિક કાર્યક્રમમાં 74 વર્ષના જશોદાબેન પટેલે દિલ ડોલાવતો ડાન્સ કર્યો

નવસારી,બુધવાર

નવસારીનાં ૭૪ વર્ષનાં વૃધ્ધાએ 'વુમન્સ ડે' ના સાંસ્કૃતિક કાર્યક્રમમાં ગંગુબાઈ કાઠીયાવાડી ફિલ્મનાં ઢોલીડા ગીત પર યુવાનોને શરમાવે તેવા ડાન્સ કરતો વિડીયો સોશિયલ મીડિયામાં વાયરલ થતાં સૌ કોઈ ચક્તિ થયા છે.

નવસારી ડિસ્ટ્રીક્ટ સિનિયર સીટીઝન ટ્રસ્ટ દ્વારા ગત તા.૮-૩-૨૦૨૨નાં રોજ 'વર્લ્ડ વુમન્સ ડે' નિમિત્તે એક સાંસ્કૃતિક કાર્યક્રમ થયો હતો. જેમાં નવસારીનાં ઈટાળવા ખાતે પતિ સાથે નિવૃત્તિમય જીવન ગુજારતા જશોદાબેન રમેશભાઈ પટેલ (ઉ.વ.૭૪)એ હિંદી ફિલ્મ ગંગુબાઈ કાઠીયાવાડીમાં અભિનેત્રી આલિયા ભટ્ટએ કરેલો 'ઢોલીડા' ગીત પરનો ડાન્સ ખૂબ જ ચપળતા અને નઝાકતભરી રીતે રજુ કરતાં જોનારા લોકો મોંઢામાં આગળા નાંખી ગયા હતા. ૭૪ વર્ષની જૈફ ઉંમરે નવા જમાનાનાં ગીત ઉપર અઘરા સ્ટેપવાળો ડાન્સનો વિડીયો સોશિયલ મીડિયામાં જોરદાર વાયરલ થયો છે. જેને સૌ કોઈ લાઈક કરી રહ્યા છે. સોલો ડાંસથી સોશિયલ મીડિયા પર ચર્ચામાં આવેલી જશોદાબેનનાં પતિ દાંતના ડોક્ટર છે. તેમને બે સંતાનો છે. જે વિદેશમાં રહે છે. નિવૃત્તિમય જીવન જીવતાં આ દંપતી નવા જમાનાનાં ગીતોને પણ પસંદ કરે છે. જશોદાબેનએ 'વુમન્સ ડે' નાં કાર્યક્રમ માટે ઢોલીડા ગીત પર ડાન્સ કરવા તેના અઘરા સ્ટેપ માત્ર પાંચ દિવસમાં શીખ્યા હતા. અને કાર્યક્રમમાં અદ્દભૂત ડાંસ રજુ કરીને સૌની વાહ વાહી મેળવી હતી. જશોદાબેને જણાવ્યું કે, વૃધ્ધોએ જે પ્રવૃત્તિઓમાં રસ હોય તે પ્રવૃત્તિમાં આગળ વધવુ જોઈએ. પોતાના મનના આનંદ માટે જીવન જીવવું જોઈએ!