પશ્ચિમ બંગાળ કોંગ્રેસના નવા અધ્યક્ષ શુભંકર સરકાર કોણ છે, જાણો અધીર રંજન ચૌધરીનું પત્તુ કેમ કપાયું?

West-Bengal New Chief: શુભંકર સરકારને પશ્ચિમ બંગાળ કોંગ્રેસના અધ્યક્ષ તરીકે નિમણૂક કરવામાં આવી છે. કોંગ્રેસે શનિવારે આ નિર્ણય લીધો અને જાહેરાત કરી કે અધીર રંજન ચૌધરીની જગ્યા હવે શુભંકર સરકાર પશ્ચિમ બંગાળ કોંગ્રેસની કમાન સંભાળશે. વર્તમાનમાં શુભંકર સરકાર અખિલ ભારતીય કોંગ્રેસ કમિટિ (એઆઈસીસી) સચિવના પદ પર કાર્યરત હતા.

કોંગ્રેસના નેતા કેસી વેણુગોપાલે એક સત્તાવાર સૂચનામાં કહ્યું હતું કે શુભંકર સરકારને પશ્ચિમ બંગાળ કોંગ્રેસના અધ્યક્ષ તરીકે નિમણૂક કરવામાં આવશે અને તેમને એઆઈસીસીના સચિવ પદેથી મુક્ત કરવામાં આવશે. તેમણે પાર્ટીના નિવર્તમાન પીસીસી અધ્યક્ષ અધીર રંજન ચૌધરીના યોગદાનની પણ પ્રશંસા કરી હતી.

કોણ છે શુભંકર સરકાર?

શુભંકર સરકારનો નાતો કોંગ્રેસ સાથે ઘણો જૂનો છે. પાર્ટીના નેતા રાહુલ ગાંધી સાથેના તેમના સંબંધ ખૂબ જ નિકટના માનવામાં આવે છે. તેમણે સમય-સમય પર પાર્ટીમાં ઘણી જવાબદારીઓ નિભાવી છે. શુભંકર સરકારને 30 ઓગસ્ટ 2024ના રોજ કોંગ્રેસ કમિટીના રાષ્ટ્રીય સચિવ બનાવવામાં આવ્યા હતા. સાથે જ તેમને ત્રણ રાજ્યોના પ્રભારી પણ બનાવવામાં આવ્યા હતા. વર્ષ 2024માં અરુણાચલ પ્રદેશ, મેઘાલય અને મિઝોરમના રાજ્ય પ્રભારી તરીકે તેમની નિમણૂક કરવામાં આવી હતી. શુભંકર સરકારે વર્ષ 2013 અને 2018 વચ્ચે કોંગ્રેસ કમિટીના રાષ્ટ્રીય સચિવ અને ઓડિશાના રાજ્ય પ્રભારીની પણ જવાબદારી નિભાવી.

કેવી રીતે શરૂઆત કરી?

શુભંકર સરકારે કોલેજના દિવસોથી જ રાજકીય દુનિયામાં પગ મૂક્યો અને વર્ષ 1993 થી 1996 સુધી તેઓ ભારતીય રાષ્ટ્રીય વિદ્યાર્થી સંઘના રાષ્ટ્રીય મહાસચિવ અને પ્રવક્તા રહ્યા હતા. વર્ષ 1996થી 2004માં તેઓ ભારતીય રાષ્ટ્રીય વિદ્યાર્થી સંઘ, પશ્ચિમ બંગાળ વિદ્યાર્થી પરિષદના પ્રદેશ અધ્યક્ષ રહ્યા હતા. વર્ષ 2004 થી 2006 સુધી તેમણે ભારતીય યુવા કોંગ્રેસના રાષ્ટ્રીય મહાસચિવની જવાબદારી પણ સંભાળી હતી.

શુભંકર સરકારે વર્ષ 2007 થી 2009 સુધી પશ્ચિમ બંગાળ પ્રદેશ કોંગ્રેસ કમિટીના સચિવની જવાબદારી ઊપાડી હતી. વર્ષ 2007થી 2013 સુધી તેમણે પશ્ચિમ બંગાળ કોંગ્રેસ કમિટીના પ્રવક્તાનું કામ સંભાળ્યું હતું. 2013માં પશ્ચિમ બંગાળ પ્રદેશ કોંગ્રેસ કમિટીના મહાસચિવના પદ પર પણ તેઓ કાર્યરત રહ્યા.

શુભંકર સરકારે શું કહ્યું?

શુભંકર સરકાર વર્ષ 2013 થી 2018 સુધી કોંગ્રેસ કમિટીના રાષ્ટ્રીય સચિવ રહ્યા હતા. વર્ષ 2024માં શુભંકર સરકાર કોંગ્રેસ કમિટીમાં રાષ્ટ્રીય સચિવ અને અરુણાચલ પ્રદેશ, મેઘાલય અને મિઝોરમના રાજ્ય પ્રભારીની જવાબદારી નિભાવી રહ્યા હતા, પરંતુ હવે પાર્ટીએ તેમના પર વિશ્વાસ મૂકીને તેમને અધીર રંજન ચૌધરીની જગ્યાએ પશ્ચિમ બંગાળના અધ્યક્ષની જવાબદારી સોંપી છે. પશ્ચિમ બંગાળ કોંગ્રેસના અધ્યક્ષ તરીકે નિમણૂક કરવામાં આવતા શુભંકર સરકારે કહ્યું હતું કે ‘કોંગ્રેસ કમિટિ પાર્ટી કાર્યકર્તાઓની ઇચ્છાઓ અનુસાર કામ કરશે. લોકોની આશાઓ અનુસાર જ પાર્ટીની આગળની દિશાનું માર્ગદર્શન પણ કરવામાં આવશે.’

અધીર રંજનનું પત્તુ કેમ કપાયું?

અધીર રંજન ચૌધરી બંગાળમાં સતત રાજ્યની સીએમ મમતા બેનર્જીની ટીકા કરતા રહ્યા છે અને તેમણે લોકસભા ચૂંટણી દરમિયાન ટીએમસી અને કોંગ્રેસ વચ્ચે ગઠબંધનનો વિરોધ પણ કર્યો હતો. આને લઈને કોંગ્રેસના અધ્યક્ષ મલ્લિકાર્જુન ખડગેએ અધીર રંજન ચૌધરીને ફટકાર પણ લગાવી હતી. લોકસભા ચૂંટણીમાં હાર પછીથી જ અધીર રંજન ચૌધરીને તેમના પદેથી હટાવવામાં આવશે એ વાતની અટકળો લગાવવામાં આવી રહી હતી. જોકે એ હવે સાચી સાબિત થઈ છે. એક તરફ અધીર રંજન ચૌધરી ટીએમસી-કોંગ્રેસ ગઠબંધનના વિરોધમાં હતા. ત્યાં, બીજી તરફ શુભંકર સરકાર આ ગઠબંધનના પક્ષમાં હતા.