લો બોલો! વંદે ભારત ટ્રેન રસ્તો ભટકી ગઈ, જવાનું હતું ગોવા પહોંચી ગઈ કલ્યાણ

Vande Bharat Train Lost its way: મુંબઈના છત્રપતિ શિવાજી મહારાજ ટર્મિનલ(CSMT)થી માર્ગોવ સુધી દોડતી દેશની આધુનિક ટ્રેન વંદે ભારત એક્સપ્રેસ કે જે મહારાષ્ટ્રના થાણે જિલ્લામાં તેનો રસ્તો ભટકી ગઈ હતી. દિવા સ્ટેશનથી આ ટ્રેન પનવેલ તરફ જવાને બદલે કલ્યાણ તરફ વળી હતી.

આ પણ વાંચો : સંસદમાં ધક્કામુક્કી મામલે મોટા સમાચાર, CISFએ કહ્યું- અમારા તરફથી કોઈ ચૂક નહીં

90 મિનિટ મોડી પહોંચી

આ સમાચાર મળતાં રેલવે અધિકારીઓમાં ખળભળાટ મચી ગયો હતો. ઉતાવળમાં આ ટ્રેનને કલ્યાણ સ્ટેશન પર લઈ જવામાં આવી હતી. જે બાદ આ ટ્રેન દિવા સ્ટેશને પરત લાવવામાં આવી હતી અને ફરી દોડાવવામાં આવી હતી. આ ખામીને કારણે ટ્રેન તેના ગંતવ્ય સ્થાન પર 90 મિનિટ મોડી પહોંચી હતી.

ટેલિકોમ્યુનિકેશન સિસ્ટમમાં ટેકનિકલ ખામી થઈ હતી

આ અંગે રેલવે અધિકારીઓએ જણાવ્યું હતું કે, આ ટ્રેન દિવા-પનવેલ રૂટ પર જવાની હતી. જે કોંકણ જતી ટ્રેનો માટે નિર્ધારિત રૂટ છે. પરંતુ આ ટ્રેન સવારે 6.10 કલાકે દિવા સ્ટેશનથી આગળ કલ્યાણ તરફ વળી હતી. સેન્ટ્રલ રેલ્વેના મુખ્ય જનસંપર્ક અધિકારી સ્વપ્નિલ નીલાના જણાવ્યા પ્રમાણે સિગ્નલની ખામીને કારણે આ પ્રોબલેમ સર્જાયો હતો. હકીકતમાં દિવા જંક્શન ખાતે ડાઉન ફાસ્ટ લાઇન અને પાંચમી લાઇન વચ્ચે પોઇન્ટ નંબર 103 પર સિગ્નલિંગ અને ટેલિકોમ્યુનિકેશન સિસ્ટમમાં ટેકનિકલ ખામી થઈ હતી.

આ પણ વાંચો : ‘નોકરીના ફોર્મ પર 18% GST, પેપર લીક, યુવાઓના નાણાં ડૂબ્યાં’ કેન્દ્ર પર ભડક્યા પ્રિયંકા ગાંધી

દિવા સ્ટેશન પર ટ્રેન 35 મિનિટ રોકાઈ

આ ઘટનાને કારણે મધ્ય રેલવેની મુંબઈ લોકલ ટ્રેન સેવાઓ ખોરવાઈ ગઈ હતી. દિવા પહોંચ્યા પછી આ ટ્રેન નિયત રૂટ દિવા-પનવેલ રૂટ પર મડગાંવ માટે રવાના કરવામાં આવી હતી. મુખ્ય જનસંપર્ક અધિકારીના જણાવ્યા પ્રમાણે ટ્રેનને દિવા જંક્શન પર સવારે 6.10થી 7.45 સુધી લગભગ 35 મિનિટ માટે રોકવામાં આવી હતી.