અજમેર પાસે મોડી રાતે ગંભીર ટ્રેન અકસ્માત, એન્જિન સહિત 4 કોચ પાટા પરથી ઊતર્યા, અનેક ઈજાગ્રસ્ત

Agra Cant Train Accident news | છેલ્લા ઘણા સમયથી દેશમાં ટ્રેન અકસ્માતની ઘટનાઓ સામે આવી રહી છે. આવી જ એક ઘટના અમદાવાદથી આગ્રા કેન્ટ જનાર ટ્રેન નંબર 12548 સાથે બની છે. ટ્રેન રાત્રે લગભગ 1:00 વાગ્યે અજમેર જંકશન અને જયપુર વચ્ચે ગેગલ પાસે પાટા પરથી ખડી પડી હતી. 

4 કોચ પાટા પરથી ખડી પડ્યાં... 

આ ટ્રેન દુર્ઘટનાને લીધે ટ્રેનના એન્જિન સહિત આગળના 4 કોચ પાટા પરથી ઉતરી ગયા હતા. આ અકસ્માતમાં ઘણા લોકોને ઈજા થઈ છે. ટ્રેન જે રૂટ પર હતી તે જ રૂટ પર આગળ માલગાડી ઊભી હતી. ટ્રેન અને માલગાડી વચ્ચે ટક્કર થતાં બચી ગઈ હતી. ડ્રાઈવરને ખોટું સિગ્નલ મળ્યું કે કેમ તેની હજુ કોઈ માહિતી મળી નથી.

ટ્રેન અજમેર જંક્શન લઈ જવાઈ 

બીજા એન્જિન દ્વારા ટ્રેનને પાછળ ખેંચવામાં આવી હતી. ત્યારપછી ટ્રેનને ફરી અજમેર જંકશન લઈ જવામાં આવી હતી. આ અકસ્માતમાં કોઈ જાનહાનિ થઈ નથી. અકસ્માતની જાણ થતાં અધિકારીઓ ઘટનાસ્થળે પહોંચ્યા હતા. અધિકારીઓ દ્વારા તપાસ હાથ ધરવામાં આવી છે.