VIDEO: PM મોદી ઔર અદાણી એક હૈ, તો સૈફ હૈ... મહારાષ્ટ્રના રાજકારણ પર રાહુલ ગાંધીનો કટાક્ષ

Image Source: Twitter

Rahul Gandhi On Pm Modi And Adani: મહારાષ્ટ્ર વિધાનસભાની ચૂંટણી માટે હવે માત્ર બે દિવસનો સમય રહ્યો છે. રાજ્યમાં 20 નવેમ્બરના રોજ મતદાન થશે અને 23 નવેમ્બરના રોજ ચૂંટણીના પરિણામો જાહેર કરવામાં આવશે. આજે મહારાષ્ટ્ર વિધાનસભા ચૂંટણીના પ્રચાર પડઘમ શાંત થઈ જશે. રાહુલ ગાંધી આજે મહારાષ્ટ્રમાં ચૂંટણી પ્રચાર કરી રહ્યા છે. આ દરમિયાન મુંબઈમાં બીકેસમાં આયોજિત એક પ્રેસ કોન્ફરન્સમાં તેમણે અદાણી અને પીએમ મોદી પર નિશાન સાધ્યું હતું.  

રાહુલ ગાંધીએ રાજ્યની મહાયુતિ તથા કેન્દ્રની NDA સરકાર પર આરોપ લગાવતાં કહ્યું હતું, કે 'મહારાષ્ટ્રની વર્તમાન સરકારે ફોક્સકોન, એરબસ જેવા સાત લાખ કરોડ રૂપિયાના રોકાણ મહારાષ્ટ્રથી ઝૂંટવીને ગુજરાત ટ્રાન્સફર કર્યા. જેના કારણે મહારાષ્ટ્રના લોકોની નોકરી છીનવાઈ ગઈ છે.' 

'એક હૈ તો સૈફ હૈ'નો અર્થ જણાવ્યો

રાહુલ ગાંધીએ આ દરમિયાન અદાણી અને પીએમ મોદી પર નિશાન સાધતાં કહ્યું કે, ‘પીએમ મોદીએ ચૂંટણીનો નારો આપ્યો છે. તેમણે કહ્યું છે કે, એક હૈ તો સૈફ હૈ. તેમના આ નારાથી માત્ર એક જ વ્યક્તિ સાથે મતલબ છે.’

આટલું બોલીને તેમણે પીએમ મોદી અને અદાણીનું પોસ્ટર બતાવીને કટાક્ષ કર્યો હતો. આમ ફરી એક વખત કોંગ્રેસે વડાપ્રધાન મોદીના ‘હમ એક હૈ, તો સેફ હૈ’ નિવેદનને યાદ કરી ભાજપને આડે હાથ લીધી હતી.  

આ પણ વાંચો: કોંગ્રેસ પ્રમુખ ખડગેએ ભાજપ-RSSને ઝેરી સાપ ગણાવ્યા, કહ્યું- મહારાષ્ટ્રની ચૂંટણીમાં મારી નાખો

ધારાવી રિડેવલપમેન્ટ પ્રોજેક્ટ મુદ્દે પણ રાહુલ ગાંધીએ વડાપ્રધાન મોદી પર નિશાન સાધતાં કહ્યું કે, ‘ભાજપ મુંબઈમાં ધારાવીની જમીન માત્ર એક જ વ્યક્તિને આપવા માગે છે. આ જ કારણોસર તે આ પ્રોજેક્ટને લઈને આવી રહી છે. ભાજપ અહીં સ્થિત નાના ઉદ્યોગોને ખતમ કરવાનો પ્રયાસ કરી રહી છે. તેઓ બધું માત્ર એક જ વ્યક્તિના હાથમાં આપવા માગે છે.’ 

ધારાવીના વિકાસને લઈને રાહુલ ગાંધીએ કહ્યું કે, ‘અમારી પાસે ધારાવીના વિકાસને લઈને યોજના છે. અમે અહીંના લોકોને ધ્યાનમાં રાખીને પ્લાન બનાવીશું. અમે માત્ર કોઈ એક વ્યક્તિના કહેવા પર પ્લાન નહીં બનાવીએ. અહીં પૂરનો મુદ્દો પણ છે. આપણે તેના પર પણ કામ કરવાનું છે.’