Indiaભાજપના સાથી પક્ષો પર ભારે પડ્યું વક્ફ બિલ! JDU બાદ હવે RLDમાં ખળભળાટ
Updated: Apr 4th, 2025
Wakf bill: રાષ્ટ્રીય લોક દળ(RLD)ના રાજ્ય મહાસચિવ શાહઝેબ રિઝવીએ વક્ફ બિલને પાર્ટીના સમર્થનથી નારાજ થઈને તેમના પદેથી રાજીનામું આપી દીધું છે. તેમણે એક વીડિયો જાહેર કરીને જાહેરાત કરી અને પાર્ટી પ્રમુખ જયંત ચૌધરી પર આકરા પ્રહારો કરતાં કહ્યું કે, 'તેઓ ભટકી ગયા છે. મુસ્લિમોએ જયંત ચૌધરીને પૂરા દિલથી ટેકો આપ્યો હતો, પરંતુ તેમણે સમુદાય સાથે ન્યાય ન કર્યો.
રિઝવીએ આરોપ લગાવ્યો હતો કે, 'જયંત ચૌધરી ધર્મનિરપેક્ષતાના માર્ગથી ભટકી ગયા છે અને હવે તેમની નીતિઓ સમુદાયના હિતોની વિરુદ્ધ છે. મુસ્લિમોએ મોટી સંખ્યામાં જયંત ચૌધરીને મત આપ્યા હતા, પરંતુ તેઓએ અમારી સાથે ઉભા રહેવાને બદલે વકફ બિલને સમર્થન આપ્યું છે. જે અમારી લાગણીઓ અને અધિકારોની વિરુદ્ધ છે.'
'તેમણે મુસ્લિમો સાથે દગો કર્યો'
રિઝવીએ તેમના વીડિયોમાં એમ પણ કહ્યું કે,'જે પક્ષોને મુસ્લિમોએ સમર્થન આપ્યું હતું, અને મુખ્યધારામાં લાવ્યા હતા, આજે એ જ પાર્ટીઓ તેમની વિરુદ્ધ બનેલા કાયદાઓનું સમર્થન કરી રહી છે.' તેમણે ખાસ કરીને જયંત ચૌધરીનું નામ લેતાં કહ્યું કે, 'જે નેતાઓ પોતાને ધર્મનિરપેક્ષ કહેતા હતા તેમણે આજે મુસ્લિમો સાથે દગો કર્યો છે. પશ્ચિમ ઉત્તર પ્રદેશમાં રાષ્ટ્રીય લોક દળ(RLD)ના 10 ધારાસભ્યો ચૂંટાયા હતા, જેમાં મુસ્લિમોનું મોટું યોગદાન હતું. મુસ્લિમોએ સર્વાનુમતે મતદાન કરીને આ પાર્ટીને મજબૂત બનાવી હતી, પરંતુ હવે જ્યારે તેમને જરૂર હતી ત્યારે પાર્ટીએ તેમને સાથ ન આપ્યો.
સિદ્ધાંતો સાથે સમાધાન ન કરવું જોઈએ
તેમણે એમ પણ કહ્યું કે, 'સરકારો તો આવતી અને જતી રહશે, પરંતુ સિદ્ધાંતો સાથે સમાધાન ન કરવું જોઈએ. ચૌધરી ચરણ સિંહે બતાવેલા માર્ગથી ભટકવું યોગ્ય નથી. મુસ્લિમોના મનમાં વિશ્વાસ હતો કે આ પાર્ટી તેમના અધિકારોની વાત કરશે, પરંતુ હવે તેઓ છેતરાયા હોવાનો અનુભવ કરી રહ્યા છે.'
આ ઉપરાંત તેમણે નીતિશ કુમાર, ચંદ્રબાબુ નાયડુ અને પપ્પુ યાદવ જેવા નેતાઓ પર પણ આકરા પ્રહારો કરતાં કહ્યું કે, 'આ નેતાઓ પોતાને ધર્મનિરપેક્ષ કહે છે, પરંતુ જ્યારે મુસ્લિમોને તેમની જરૂર હોય છે ત્યારે તેઓ મૌન સેવી લે છે.'
રિઝવી આ નવા કાયદાનો વિરોધ કરતાં કહ્યું કે, આ કાયદાથી સમાજમાં ભાઈચારો ખતમ થઈ જશે, જે દેશ માટે યોગ્ય નથી. અને હું રાષ્ટ્રીય લોકદળમાંથી રાજીનામું આપું છું, કારણ કે પાર્ટી મારી સાથે ન ઊભી રહે તો તેને છોડી દેવી સારી છે. તેમજ હું મુસ્લિમોને અપીલ કરું છું કે, ચૂંટણી દરમિયાન સમજદારીપૂર્વક નિર્ણયો લેવા અને દગો આપનારાઓ પર વિશ્વાસ ન કરવો.'
આ પણ વાંચો : યુનુસ સાથેની બેઠકમાં PM મોદીએ હિન્દુઓની સુરક્ષાનો મુદ્દો ઉઠાવ્યો, ઘૂસણખોરી પર પણ ચર્ચા
વકફ બિલ પર વિવાદ
ઉલ્લેખનીય છે કે, વક્ફ બિલને લઈને ઘણા મુસ્લિમ સંગઠનોમાં પહેલેથી જ અસંતોષ હતો, પરંતુ આરએલડીના સમર્થન બાદ પાર્ટીની અંદર પણ વિરોધના અવાજો ઉઠવા લાગ્યા છે. બિહારના મુખ્યમંત્રી નીતિશ કુમારની પાર્ટી જેડીયુ દ્વારા વક્ફ બિલને સમર્થન આપ્યા બાદ પાર્ટીના ઘણા મુસ્લિમ નેતાઓએ પણ રાજીનામા ધરી દીધા છે.
JDUના અત્યાર સુધી 5 નેતાઓએ રાજીનામું આપ્યું
1. લઘુમતી સંઘના રાજ્ય સચિવ મોહમ્મદ શાહનવાઝ મોહમ્મદ
2. રાજ્ય મહામંત્રી મોહમ્મદ. તબરીઝ અલીગ.
3. ભોજપુરથી પાર્ટીના સભ્ય મોહમ્મદ. દિલશાન રૈના.
4. પૂર્વ ચિંતા મોહમ્મદ કાસિમ અન્સારીએ પાર્ટી સાથેના સંબંધો તોડી નાખ્યા.
5. યુવા મોરચાના ભૂતપૂર્વ રાજ્ય ઉપાધ્યક્ષ તબરેઝ હસને પાર્ટીમાંથી રાજીનામું આપ્યું છે.
