આ બિહારનું બજેટ હતું કે કેન્દ્રનું? કોંગ્રેસે કર્યો કટાક્ષ તો એનડીએએ ગણાવ્યો ઐતિહાસિક

Budget 2025: કેન્દ્રીય નાણામંત્રી નિર્મલા સીતારમણે શનિવારે (પહેલી ફેબ્રુઆરી) લોકસભામાં બજેટ રજૂ કર્યું. આ વખતે બજેટમાં મધ્યમ વર્ગને મોટી રાહત આપવામાં આવી છે. બિહાર પર પણ ધ્યાન કેન્દ્રિત કરવામાં આવ્યું હતું. નાણામંત્રીએ બિહાર માટે અનેક જાહેરાતો કરી, જેમાં મખાના બોર્ડની સ્થાપના, પશ્ચિમ કોસી નહેર માટે નાણાકીય સહાય અને IIT પટનાની ક્ષમતા વધારવા માટે ભંડોળનો સમાવેશ થાય છે. બજેટ અંગે શાસક અને વિપક્ષ તરફથી પ્રતિક્રિયાઓ આવી રહી છે. વિપક્ષે બજેટની ટીકા કરી છે, જ્યારે સરકારે બજેટને ઐતિહાસિક ગણાવ્યું છે.

કોંગ્રેસે કેન્દ્ર સરકાર પર કટાક્ષ કર્યો

કેન્દ્રીય બજેટમાં વિકાસના ચાર એન્જિનની વાત કરવા બદલ કોંગ્રેસે કેન્દ્ર સરકાર પર કટાક્ષ કર્યો અને કોંગ્રેસના મહાસચિવ અને  સંચાર વિભાગના પ્રભારી જયરામ રમેશે સોશિયલ મીડિયા પ્લેટફોર્મ 'X' પર પોસ્ટ કરીને લખ્યું કે, 'નાણામંત્રીએ ચાર એન્જિન વિશે વાત કરી, કૃષિ, MSME, રોકાણ અને નિકાસ એટલા બધા એન્જિન છે કે બજેટ સંપૂર્ણપણે પાટા પરથી ઉતરી ગયું છે.'

કોંગ્રેસના સાંસદ મનીષ તિવારીએ બજેટ પર કટાક્ષ કરતા કહ્યું કે, 'મને સમજાતું નથી કે આ બિહાર સરકારનું બજેટ છે કે કેન્દ્ર સરકારનું? બિહાર સિવાય બીજા કોઈ રાજ્યનું નામ સાંભળવામાં આવ્યું ન હતું.

વિકસિત ભારતનું સ્વપ્ન પણ બહુજનના હિતમાં હોવું જોઈએ: માયાવતી

બહુજન સમાજ પાર્ટી (BSP)ના વડા માયાવતીએ સોશિયલ મીડિયા પ્લેટફોર્મ 'X' પર લખ્યું હતું કે, 'વર્તમાન ભાજપ સરકારનું બજેટ, કોંગ્રેસની જેમ, રાજકીય હિત પર વધુ કેન્દ્રિત અને જાહેર અને રાષ્ટ્રીય હિત પર ઓછું કેન્દ્રિત લાગે છે. જો આવું નથી, તો આ સરકારના શાસનમાં પણ લોકોના જીવન સતત મુશ્કેલીમાં, દુઃખી અને નાખુશ કેમ છે? વિકસિત ભારતનું સ્વપ્ન પણ બહુજનના હિતમાં હોવું જોઈએ.'

આ પણ વાંચો: આ બજેટ મધ્યમવર્ગના ખિસ્સા ભરનારું, લોકોના સપના પૂરા કરશે: પીએમ મોદી

એનડીએના નેતાઓએ બજેટને ઐતિહાસિક ગણાવ્યું

બજેટ 2025 અંગે કેન્દ્રીય મંત્રી જ્યોતિરાદિત્ય સિંધિયાએ જણાવ્યું હતું કે, 'આ બજેટ ભારતના વિકાસ અને પ્રધાનમંત્રીના નવા અને ઉર્જાવાન ભારતના સ્વપ્નને પૂર્ણ કરવાના સંકલ્પ માટે છે. દરેક વિસ્તારનો યોગ્ય અભ્યાસ કર્યા પછી, એક નવો નકશો તૈયાર કરવામાં આવ્યો છે. આ એક વ્યાપક બજેટ છે જે ભારતને આગળ લઈ જશે અને ભારતને માત્ર આત્મનિર્ભર બનાવશે જ નહીં પરંતુ તેને વિશ્વ નેતા તરીકે સ્થાપિત કરશે.

મહારાષ્ટ્રના મુખ્યમંત્રી દેવેન્દ્ર ફડણવીસે જણાવ્યું હતું કે, 'નાણામંત્રી નિર્મલા સીતારમણે એક શાનદાર બજેટ રજૂ કર્યું છે. આ મધ્યમ વર્ગ માટેનું સ્વપ્ન બજેટ કહી શકાય. આવકવેરા મુક્તિ સ્લેબમાં ફેરફાર કરવામાં આવ્યો છે અને આવકવેરા મુક્તિ વધારીને 12 લાખ રૂપિયા કરવામાં આવી છે. આ જાહેરાત ભારતના અર્થતંત્રમાં એક સીમાચિહ્નરૂપ સાબિત થશે. આનાથી લોકોના મોટા વર્ગને ખર્ચપાત્ર આવક મળશે, ખરીદી થશે, માંગ વધશે અને MSMEને ફાયદો થશે, રોજગારીનું સર્જન થશે.