'BOB World'મોબાઈલ એપ પર નવા ગ્રાહકો જોડવા પર RBIએ લગાવ્યો હાલ પુરતો પ્રતિબંધ

તા. 10 ઓક્ટોબર 2023, મંગળવાર 

ભારતીય રિઝર્વ બેંક (RBI)એ જાહેર ક્ષેત્રની બેંક ઓફ બરોડો(BOB)ની મોબાઈલ એપ 'BOB World' પર નવા ગ્રાહકોને જોડવા પર તાત્કાલિક અસરથી પ્રતિબંધ લગાવ્યો છે.

RBIને એપ પર કેટલીક ખામીઓ જોવા મળી હોવાનુ સામે આવ્યું

RBIએ કહ્યું કે, એપ્લિકેશન પર ગ્રાહકોને ઓનબોર્ડ કરવાની પ્રક્રિયામાં કેટલીક ખામીઓ જોવા મળી હોવાથી આ કાર્યવાહી એટલા માટે કરવામાં આવી છે. તેનો મતલબ એવો થયો કે, હવે નવા ગ્રાહકો BoBની આ એપમાં જોડાઈ શકશે નહીં. વધુમાં આરબીઆઈએ કહ્યું કે, ગ્રાહકોને જોડવાની પ્રકિયામાં જે ખામીઓ છે તેને દુર કર્યા પછી એપ શરુ કરવામાં આવે તેવી સુચના આપવામાં આવી છે.

RBI  દ્વારા તાત્કાલિક અસરથી  BOB World પર પ્રતિબંધ લગાવવામાં આવ્યો

RBએ આપેલા નિવેદન પ્રમાણે, ભારતીય રિઝર્વ બેંકના બેંકિંગ વ્યવહાર અધિનિયમ, 1949 ની કલમ નંબર 35A હેઠળ તેના અધિકારનો ઉપયોગ કરતા બેંક ઓફ બરોડાની 'BOB World' મોબાઈલ એપ પર ગ્રાહકોને જોડવાની પ્રક્રિયા પર તાત્કાલિક અસરથી પ્રતિબંધ લગાવવાની સુચના આપી છે.