રામ મંદિર માટે નેપાળથી લાવ્યા બે દિવ્ય શાલિગ્રામ પથ્થર, અયોધ્યામાં પૂજા-અર્ચના

નવી દિલ્હી,તા.02 ફેબ્રુઆરી 2023,ગુરૂવાર 

નેપાળના પ્રખ્યાત ધાર્મિક સ્થળ જનકપુરથી અયોધ્યા લાવવામાં આવેલી દેવશિલાની પૂજા કરવામાં આવી હતી. નેપાળના પૂર્વ નાયબ વડાપ્રધાન જાનકી મંદિરના મહંતે પૂજા અર્ચના કરી હતી. વૈદિક વિધિ અનુસાર પૂજા બાદ શાલિગ્રામ શિલા શ્રી રામ જન્મભૂમિ તીર્થ ક્ષેત્ર ટ્રસ્ટને સોંપવામાં આવી હતી. આ પહેલા નેપાળના જનકપુરથી ચાલીને શાલિગ્રામ શિલા બુધવારે મોડી રાત્રે રામનગરી પહોંચી હતી. ભગવાન વિષ્ણુનું રૂપ ગણાતા આ શિલાનું રામનગરીમાં ભવ્ય સ્વાગત કરવામાં આવ્યું હતું. મોડી રાત્રે શાલિગ્રામ યાત્રા હાઇવે પરથી પ્રવેશતાંની સાથે જ જય શ્રી રામના નારા ગૂંજી ઉઠ્યા હતા. અયોધ્યા પહોંચીને શ્રી રામ જન્મભૂમિ તીર્થ ક્ષેત્ર ટ્રસ્ટના મહાસચિવ ચંપત રાય, ટ્રસ્ટી ડો.અનિલ મિશ્રા, વિદાય લઈ રહેલા મેયર ઋષિકેશ ઉપાધ્યાય અને ભાજપના અન્ય નેતાઓએ શાલિગ્રામ શિલા ખાતે ફૂલોથી તેમનું સ્વાગત કર્યું હતું.

આ પછી શાલિગ્રામ યાત્રા સેંકડો વાહનોના કાફલા સાથે રામસેવક પુરમ વર્કશોપમાં પહોંચી હતી. શ્રી રામ જન્મભૂમિ તીર્થ ક્ષેત્ર ટ્રસ્ટના ખજાનચી ગોવિંદ દેવ ગિરી અને મહંત દિનેન્દ્ર દાસે શાલિગ્રામ શિલા પર ફૂલની પાંખડીઓ વરસાવીને મંદિરનું સ્વાગત કર્યું હતું.

આ પથ્થરોને નેપાળની પવિત્ર કાલી ગંડકી નદીમાંથી કાઢવામાં આવ્યા છે. નેપાળની શાલિગ્રામી નદીમાંથી કાઢવામાં આવેલા બે મોટા પથ્થરોને બે ટ્રકમાં ભરીને ભારત લાવવામાં આવ્યા હતા. શાલિગ્રામ શિલા યાત્રાનું નેતૃત્વ રામ જાનકી મંદિર નેપાળના મહંત રામ પટેશ્વર દાસ, નેપાળ સરકારના પૂર્વ ગૃહમંત્રી વિમલેન્દ્ર નિધિ, વિશ્વ હિન્દુ પરિષદના કેન્દ્રીય મંત્રી રાજેન્દ્ર સિંહ પંકજ અને રામ મંદિરના ટ્રસ્ટી કામેશ્વર ચૌપાલે કર્યું હતું. યાત્રા સાથે નેપાળથી પણ 200 જેટલા શ્રદ્ધાળુઓ અયોધ્યા પહોંચી ગયા છે.

અયોધ્યાના સંતો રામસેવકપુરમમાં શાલિગ્રામ પત્થરોની પૂજા કરશે અને તેમને રામ મંદિરમાં રજૂ કરશે. આ માટે અયોધ્યાના 100 જેટલા મહંતોને આમંત્રણ આપવામાં આવ્યું છે. સીએમ યોગી આદિત્યનાથ પણ આવી શકે છે.

કળયુગમાં શાલિગ્રામ શિલા યાત્રા સાથે દ્વાપર-ત્રેતા વચ્ચેના સંબંધો વધુ મજબૂત થઈ રહ્યા છે. તેમણે કહ્યું કે, "અમે નેપાળ અને ભારત સરકાર પાસે માંગ કરીએ છીએ કે જનકપુર અને અયોધ્યા વચ્ચે એક રેલ સેવા પણ શરૂ કરવામાં આવે, જેનાથી અવરજવર સરળ બનશે અને પર્યટનને પણ પ્રોત્સાહન મળશે."