'કોઈપણ નેતા પાર્ટીથી મોટા નથી', કોંગ્રેસની બેઠકમાં સુખવિંદર સિંહ રંધાવાએ કોને કરી ટકોર?

Rajasthan Congress: રાજસ્થાનના કોંગ્રેસ પ્રભારી સુખવિંદર સિંહ રંધાવાએ રવિવારે (16 માર્ચ) કહ્યું કે, કોઈ પણ નેતા ગમે એટલા મોટા કેમ ન હોય, પાર્ટીથી મોટા નથી. તેમણે ગુજરાતમાં રાહુલ ગાંધીના નિવેદનનો પણ ઉલ્લેખ કર્યો, જેમાં પાર્ટીના પૂર્વ અધ્યક્ષે જમીની સ્તરના કાર્યકર્તાઓને ભવિષ્યની સફળતાઓ માટે તૈયાર કરવાના મહત્ત્વ પર પ્રકાશ પાડ્યો હતો. રંધાવાએ પાર્ટીની વિસ્તૃત રાજ્ય કારોબારીની બેઠકમાં કહ્યું, 'કોઈપણ પક્ષથી ઉપર નથી, ભલે તે ગમે તેટલો મોટો નેતા હોય.'

રાહુલ ગાંધીના ગુજરાત પ્રવાસનો કર્યો ઉલ્લેખ

આ બેઠકમાં અલગ અલગ સંગઠનાત્મક મુદ્દાઓ પર ચર્ચા કરવામાં આવી. રંધાવાએ કહ્યું કે, તેમણે તમામ નેતાઓને બેઠકમાં જરૂર સામેલ થવું જોઈએ. સહ-પ્રભારીઓ અને જિલ્લા પ્રમુખોને પણ નિર્દેશ આપ્યા છે કે તેઓ બેઠકમાં સામેલ ન થનારા નેતાઓનો રિપોર્ટ તૈયાર કરે અને તેને કોંગ્રેસના પ્રદેશ એકમ કાર્યાલયને મોકલે. કોંગ્રેસ નેતાએ ઉલ્લેખ કર્યો કે, રાહુલ ગાંધીએ ગુજરાતમાં આ વાત પર ભાર આપ્યો હતો કે, પાર્ટીને સક્રિય કરવાની જરૂર છે અને તેના માટે જમીની સ્તરના કાર્યકર્તાઓને તૈયાર કરવા જોઈએ. તેમણે નિષ્ક્રિય પદાધિકારીઓને નોટિસ જાહેર કરવાનું આહ્વાન કર્યું, ભલે તેમનું પદ કે પાર્ટીમાં પ્રભાવ ગમે એટલો હોય.

કોંગ્રેસની પ્રદેશ એકમના અધ્યક્ષ ગોવિંદ સિંહ ડોટાસરાએ કહ્યું કે, 'તેમનું ધ્યાન એક મજબૂત અને સ્થાયી પાર્ટી સંગઠન બનાવવા પર છે. આજે હું અહીં છું, કાલે મારી જગ્યા ક્યાંક બીજે હશે અને ત્યારબાદ ક્યાંક બીજે હશે. મહત્ત્વનું એ નથી કે મેં શું મેળવ્યું, પરંતુ મહત્ત્વનું એ છે કે ભવિષ્ય માટે એક મજબૂત સંગઠન બનાવવાની જરૂર છે.'

પૂર્વ નાયબ મુખ્યમંત્રી સચિન પાયલોટે આ પ્રસંગે સંગઠનને મજબૂત કરવા અને આગામી ચૂંટણીની તૈયારીના મહત્ત્વ પર પ્રકાશ પાડ્યો. તેમણે કહ્યું કે, 'અમે એકજૂટ છીએ અને મજબૂત ભવિષ્ય માટે મળીને કામ કરશે.'