રાહુલ ગાંધીએ કેજરીવાલની દુઃખતી નસ પર હાથ મૂક્યો, દિલ્હીમાં કોંગ્રેસ માટે સેટ કર્યો એજન્ડા

Delhi Election: કોંગ્રેસ નેતા રાહુલ ગાંધીએ સોમવારે દિલ્હીમાં પોતાની પ્રથમ રેલી કરી હતી. પરંતુ આ રેલીમાં તેમણે અરવિંદ કેજરીવાલ પર ભાજપ કરતા વધુ પ્રહાર કર્યા હતા. તેમજ રાહુલ ગાંધીએ શીલા દીક્ષિત પર લાગેલા આરોપોની ગણતરી કરાવતા પૂછ્યું, 'આમ આદમી પાર્ટી ભ્રષ્ટાચારની ઘણી વાતો કરતી હતી, પરંતુ દિલ્હીમાં થયેલા ભ્રષ્ટાચારનો જવાબ ક્યારે આપશે. તમે કહેતા હતા કે હું દિલ્હીને સાફ કરીશ, ભ્રષ્ટાચાર ખતમ કરીશ, પેરિસ બનાવીશ, એ વચનોનું શું થયું?'

રાહુલ ગાંધીએ પ્રદૂષણ, મોંઘવારી સહિત તે તમામ મુદ્દાઓ પર ધ્યાન દોર્યું હતું કે જેના પર આમ આદમી પાર્ટી વાત કરવાનું પસંદ કરતી નથી. આ રેલી સાથે રાહુલ ગાંધીએ કોંગ્રેસનો ચૂંટણી એજન્ડા નક્કી કર્યો. રાહુલ ગાંધીના પ્રહારો બાદ અરવિંદ કેજરીવાલે પણ જવાબ આપ્યો હતો.

રાહુલ ગાંધીએ કેજરીવાલ પર પ્રહારો કર્યા 

રાહુલ ગાંધીએ કહ્યું, અરવિંદ કેજરીવાલે ભ્રષ્ટાચાર દૂર કરવાની વાત કરી હતી. શું તેમણે ભ્રષ્ટાચાર દૂર કર્યો છે? દિલ્હીમાં પ્રદૂષણ, ભ્રષ્ટાચાર અને મોંઘવારી વધી રહી છે. કેજરીવાલ આવ્યા ત્યારે તેમણે કહ્યું કે તેઓ દિલ્હીને સાફ કરી દેશે, ભ્રષ્ટાચાર ખતમ કરી દેશે અને દિલ્હીને પેરિસ બનાવી દેશે. પરંતુ હવે સ્થિતિ એવી છે કે ભયંકર પ્રદૂષણ છે. લોકો બીમાર રહે છે. લોકો બહાર નીકળી શકતા નથી. કેજરીવાલે મોંઘવારી ઘટાડવાનું કહ્યું હતું. મોંઘવારી ઘટી નથી, બલ્કે વધુ વધી રહી છે. કોંગ્રેસ નેતાએ કહ્યું કે શીલા દીક્ષિત જ્યારે દિલ્હીના મુખ્યમંત્રી હતા ત્યારે જે સરકાર ચલાવતી હતી તેની કોઈ સરખામણી ન થઈ શકે.

અમારી સરકાર બનશે ત્યારે અમે જાતિ આધારિત વસ્તી ગણતરી કરાવીશું: રાહુલ ગાંધી 

જાતિ ગણતરીના બહાને મતદારોને સીધો સંદેશ સીલમપુરમાં રાહુલ ગાંધીએ કહ્યું, જ્યારે હું જાતિ ગણતરીની વાત કરું છું ત્યારે પીએમ મોદી અને અરવિંદ કેજરીવાલના મોંમાંથી એક પણ શબ્દ નથી નીકળતો કારણ કે બંને ઈચ્છે છે કે પછાત વર્ગ, દલિત, આદિવાસીઓ અને લઘુમતીઓને ભાગીદારી ન મળે. શું તમે ક્યારેય તેમને પૂછો છો કે તેઓ જાતિ ગણતરી સાથે છે કે નહીં?… મેં સંસદમાં પીએમ મોદીને કહ્યું હતું કે તમે કરો કે ન કરો, પરંતુ જે દિવસે અમારી સરકાર બનશે, અમે અનામતને 50%થી વધુ વધારીશું અને જાતિ આધારિત વસ્તી ગણતરી લોકસભામાં કરવામાં આવશે અને તેને રાજ્યસભામાં પસાર કરવામાં આવશે. દિલ્હીમાં કોંગ્રેસની સરકાર બનશે તો જાતિ ગણતરી કરવામાં આવશે. આ દ્વારા કોંગ્રેસે OBC અને દલિત મતદારોને સીધો સંદેશો આપ્યો છે.

આ પણ વાંચો: ગુજરાતમાં તો બધા આજે ધાબા પર જ હશે: PM મોદીએ ઉત્તરાયણને ગણાવ્યો પ્રિય તહેવાર

રાહુલ ગાંધીના પ્રહારો પર કેજરીવાલની પ્રતિક્રિયા

અરવિંદ કેજરીવાલે પણ રાહુલ ગાંધીના પ્રહારોનો જવાબ આપ્યો હતો. કેજરીવાલે X પર લખ્યું, 'આજે રાહુલ ગાંધી દિલ્હી આવ્યા. તેણે મારી સાથે ખૂબ દુર્વ્યવહાર કર્યો પરંતુ હું તેના નિવેદનો પર ટિપ્પણી નહીં કરું. તેમની લડાઈ કોંગ્રેસને બચાવવાની છે, મારી લડાઈ દેશ બચાવવાની છે. કોંગ્રેસ અને આમ આદમી પાર્ટી બંને વિપક્ષી ગઠબંધન ઇન્ડીયાનો ભાગ છે અને ગયા વર્ષે લોકસભા ચૂંટણીમાં સાથે મળીને લડ્યા હતા. જો કે વિધાનસભાની ચૂંટણીમાં બંને પક્ષો સામસામે છે. પહેલા એવું માનવામાં આવતું હતું કે કોંગ્રેસ કેજરીવાલ પર સીધો હુમલો નહીં કરે, પરંતુ હવે રાહુલ ગાંધીએ મોરચો ખોલ્યો છે, આ લડાઈ વધુ તીવ્ર બનશે.