'પહેલા ખબર હોત તો 'I.N.D.I.A.' ગઠબંધનમાં જ ન જોડાયા હોત....', એવું શા માટે બોલ્યા ઓમર અબ્દુલ્લા?

Lok Sabha Election 2024: લોકસભા ચૂંટણી પહેલા I.N.D.I.A ગઠબંધને વધુ એક ઝટકો લાગ્યો છે. શુક્રવારે નેશનલ કોન્ફરન્સના  નેતા ઓમર અબ્દુલ્લા કહ્યું કે, 'જમ્મુ અને કાશ્મીરમાં પીપલ્સ ડેમોક્રેટિક પાર્ટી (PDP) સાથે બેઠક વહેંચણીની વ્યવસ્થા માટે સંમત થશે નહીં. મેં તમને કહ્યું છે. જે પાર્ટી ત્રીજા સ્થાને છે તેને બેઠક માગવાનો કોઈ અધિકાર નથી. જો મને I.N.D.I.A ગઠબંધનમાં જોડાતા પહેલા કહેવામાં આવ્યું હોત કે અમારે બીજાઓ માટે પોતાને નબળો બનાવવો પડશે, તો હું ક્યારેય તેમાં જોડાયો ન હોત.' આ બંને પક્ષો કોંગ્રેસ સાથે રાષ્ટ્રીય સ્તરે રચાયેલા I.N.D.I.A ગઠબંધનનો ભાગ છે. 

નેશનલ કોન્ફરન્સ એકલા હાથે ચૂંટણી લડશે!

નેશનલ કોન્ફરન્સના નેતા ઓમર અબ્દુલ્લાએ કહ્યું, 'જ્યાં સુધી બેઠકનો સંબંધ છે, અમે સ્પષ્ટ કરવા માગીએ છીએ કે અમે એકલા હાથે ચૂંટણી લડીશું. આના પર કોઈ પ્રશ્ન ન હોવો જોઈએ. નેશનલ કોન્ફરન્સ ભાજપના નેતૃત્વ હેઠળના એનડીએનો ભાગ બને તેવું કોઈ દૃશ્ય નથી.'

તાજેતરમાં પીડીપીના વડા મહેબૂબા મુફ્તીએ કહ્યું હતું કે, 'પીડીપી જમ્મુ અને કાશ્મીરની પાંચ અને લદ્દાખની એક બેઠક માટે ઉમેદવારો નક્કી કરશે.' 

ઉલ્લેખનીય છે કે, 'વર્ષ 2019ની લોકસભા ચૂંટણીમાં ભાજપે જમ્મુ-કાશ્મીરમાં ત્રણ બેઠક જીતી હતી. તેણે કુલ મતોના 46 ટકાથી વધુ મત મેળવ્યા હતા, જ્યારે નેશનલ કોન્ફરન્સને ત્રણ બેઠકો મળી હતી. કોંગ્રેસને ચોક્કસપણે 28 ટકા વોટ મળ્યા છે, પરંતુ એકપણ સીટ જીતવામાં સફળ રહી નથી. આ સિવાય પીડીપી પણ છેલ્લી લોકસભા ચૂંટણીમાં એક પણ સીટ મેળવી શકી ન હતી.