કર્ણાટક : આંબેડકરની પૂજામાં ગેરહાજર રહેતા વિદ્યાર્થીઓએ સગીરને નગ્ન પરેડ કરાવી

karnataka kalburgi news | કર્ણાટકના કલબુર્ગી જિલ્લામાંથી એક હચમચાવતી ઘટના સામે આવી હતી. અહીં એક સગીર છોકરાને કેટલાક વિદ્યાર્થીઓના એક સમૂહ દ્વારા નગ્ન પરેડ કરાવવામાં આવી હતી. પીડિત સગીરને  ડૉ. બી.આર.આંબેડકરના ફોટાની પ્રાર્થનામાં સામેલ ન થવાને કારણે આ સજા આપવામાં આવી હતી. આ ઘટનાનો સોશિયલ મીડિયા પર વીડિયો પણ વાયરલ થયો હતો.  

ક્યાં બની આ ઘટના? 

આ ઘટના કર્ણાટકના કલબુર્ગી જિલ્લામાં એક સરકારી હોસ્ટેલમાં બની હતી. આ મામલે અશોક નગર પોલીસ સ્ટેશનમાં એફઆઈઆર પણ દાખલ કરાવાઈ હતી. પીડિત છોકરાના પિતાએ આ ફરિયાદ દાખલ કરાવી હતી. પોલીસના જણાવ્યાનુસાર પીડિત છોકરો સગીર છે અને તે પ્રી યુનિવર્સિટી કોલેજમાં ભણતો હતો અને સરકારી હોસ્ટેલમાં જ રહેતો હતો. 

શું હતી ઘટના? 

સરકારી હોસ્ટેલમાં રહેતા છોકરાઓ રોજ ડૉ. બી.આર.આંબેડકરની તસવીરની પૂજા કરતા હતા. પીડિત સગીર છોકરો ગત રવિવારે આ કાર્યક્રમમાં કોઈ કારણોસર હાજર રહેવાનું ચૂકી ગયો હતો. જેના બાદ વિદ્યાર્થીઓનો સમૂહ તેને ઘેરી વળ્યો હતો અને તેની આ રીતે હેરાનગતિ કરી હતી. જ્યારે આ ઘટનાની જાણ અન્ય હોસ્ટેલના વિદ્યાર્થીઓને થઈ તો તેઓ પણ આ રીતે પીડિત સગીર છોકરાની હેરાનગતિમાં જોડાઈ ગયા હતા અને તેને નગ્ન કરીને રોડ પર પરેડ કરાવી હતી. આ સાથે છોકરાના હાથમાં ડૉ.બી.આર.આંબેડકરની તસવીર પણ થમાવી દીધી હતી.