રીલ લાઈફમાં ફેમસ થવાની ખેવનામાં રિયલ લાઈફ ગુમાવી દીધી

લુધિયાણા,તા.12 ઓક્ટોબર 2022,બુધવાર

સોશિયલ મીડિયાના વિવિધ માધ્યમોમાં પોતાનું ટેલેન્ટ અને સાહસોના વીડિયો અને રિલ્સ મૂકીને લોકોની વાહવાહી મેળવવાની ફિરાકમાં યુવાનો જીવને પણ જોખમમાં મુકતા ખચકાતા નથી. આવા અવિચારી સાહસોના કારમે ક્યારેક જીવ ગુમાવીને પણ કિંમત ચૂકવવાનો વારો આવે છે. આવી જ એક ઘટના તાજેતરમાં પંજાબના લુધિયાણા ખાતે થઈ. પંજાબના લુધિયાણામાં ટ્રેનમાં સ્ટંટ કરતી વખતે યુવકે જીવ ગુમાવ્યો છે. યુવકનો વીડિયો સામે આવ્યો છે. ચાલતી ટ્રેનમાં બહાર લટકીને પોતાના સાહસની ક્ષમતા બતાવવા જતા યુવાન થાંભલા સાથે અથડાયો અને નીચે પટકાયો હતો. તેનું ઘટનાસ્થળે જ મોત થયું હતું. ઉલ્લેખનીય છે કે, આ પહેલી ઘટના નથી, જેમાં થોડીક સેકન્ડની રીલ અને સોશિયલ મીડિયા ફેમની કિંમત લોકોએ જીવ આપી ચૂકવી છે. આવી દુર્ઘટના અટકવાનું નામ નથી લેતી.

મૃતકની ઓળખ થઈ નથી

પોલીસના જણાવ્યા પ્રમાણે વીડિયોમાં દેખાઈ રહ્યું છે કે યુવક ટ્રેનના દરવાજા પાસે ઊભો છે. બહારની તરફ લટકાઈને સ્ટંટ કરી રહ્યો છે. બીજો યુવક મોબાઈલથી વીડિયો ઉતારી રહ્યો છે. આ દરમિયાન તે થાંભલા સાથે અથડાય છે. તેનું માથું થાંભલા સાથે એટલું ખરાબ રીતે અથડાયું કે તેનો હાથ ટ્રેનનો દરવાજો છૂટી ગયો અને તે ઊછળી નીચે પડી ગયો હતો. વીડિયો બનાવી રહેલા યુવકે અન્ય યાત્રીઓને ઘટનાની જાણ કરી. તે લોકોએ સ્ટેશન માસ્ટર સાથે સંપર્ક કર્યો અને ટ્રેન રોકવામાં આવી. યુવાન ત્યારે મૃત્યુ પામ્યો હતો. પોલીસે જણાવ્યું કે, યુવકના મૃતદેહને ખન્નાની હોસ્પિટલના શબઘરમાં રાખવામાં આવ્યો છે. 

પોલીસ મૃતકની ઓળખની રાહ જોઈ રહી છે. ત્યાર બાદ જ આગળની કાર્યવાહી કરવામાં આવશે. મહત્ત્વની વાત એ છે કે, યુવક પાસેથી મોબાઈલ, ID જેવી કોઈ વસ્તુ મળી નથી, આથી હજુ સુધી તેની ઓળખ થઈ શકી નથી. યુવક દિલ્હી જઈ રહેલી માલવા એક્સપ્રેસમાં ચઢ્યો હતો.