'અન્ય પક્ષોના કાર્યકર-નેતાના ભાજપમાં આગમનથી સમસ્યા, તેનો ઈલાજ..' ગડકરીનું ચોંકાવનારું નિવેદન

Nitin Gadkari News  | ભાજપના વરિષ્ઠ નેતા નીતિન ગડકરી તેમના બેધડક નિવેદનો માટે જાણીતા છે. ભાજપની વર્તમાન સ્થિતિ અને અનેક મહત્ત્વના મુદ્દાઓ પર વાત કરતાં તેમણે કહ્યું કે ભાજપમાં અલગ અલગ પાર્ટીના નેતાઓ અને કાર્યકારોનું આગમન હજુ યથાવત્ છે. ભાજપ કાર્યકરોની પાર્ટી છે. નવા લોકો અલગ અલગ કારણોસર આવી રહ્યા છે.

ગડકરીએ કહી મોટી વાત...

તેમને ટ્રેઈન કરવા, વિચારધારા શીખવવી અને તેમને અમારા કાર્યકર બનાવવા તે અમારી જવાબદારી છે. અમારો પ્રયાસ એ છે કે હજારો કાર્યકરો મહેનત કરે છે પણ ક્યારેક એક કાર્યકરની કોઈ ખોટી વાત એ હજારોની મહેનત પર પાણી ફેરવી નાખે છે.  

ગડકરીએ દેશની સમસ્યા જણાવી.. 

ગડકરીએ કહ્યું કે આપણા દેશમાં મતભેદ કોઈ સમસ્યા નથી પણ વિચારવાનો અભાવ એક મોટી સમસ્યા છે. સુવિધાજનક રાજકારણ મહત્ત્વપૂર્ણ નથી પણ વિચારધારા સાથે જવાનું રાજકારણ મહત્ત્વપૂર્ણ છે. ભાજપમાં અન્ય પક્ષોના નેતા-કાર્યકરોના આગમનને લીધે અનેક સમસ્યા પેદા થાય છે. જેમ જેમ પાક વધે છે, બીમારીઓ પણ વધે છે એ જ રીતે ભાજપમાં પાક ઘણો છે જે અમુક સારા અનાજ સાથે કેટલીક બીમારીઓને પણ આમંત્રિત કરે છે એટલા માટે અમારે આવા બીમાર પાક પર કીટનાશકનો છંટકાવ કરવો પડે છે.