‘હું મૂર્ખ નથી કે, વિપક્ષી નેતાની હોટલમાં રોકડ વહેંચવા જાઉં?’ કેશ ફૉર વોટ કાંડ ફસાયેલા વિનોદ તાવડેની દલીલ

Maharashtra Election 2024 : મહારાષ્ટ્ર વિધાનસભા ચૂંટણીમાં મતદારોને લલચાવવા માટેના ‘કેશ ફૉર વોટ’ કાંડ મુદ્દે હજુ પણ રાજકીય ઘમસાણ જોવા મળી રહ્યું છે. આ કાંડમાં બરાબરના ફસાયેલા ભારતીય જનતા પાર્ટીના કદાવર નેતા અને રાષ્ટ્રીય મહા સચિવ વિનોદ તાવડે પર પૈસા વહેંચવાનો ગંભીર આક્ષેપ લાગ્યા બાદ તેમણે સ્પષ્ટતા કરી છે. તેમણે સ્પષ્ટ શબ્દોમાં કહ્યું કે, ‘શું હું એટલો મૂર્ખ છું કે વિપક્ષી નેતાની હોટેલમાં રોકડ લઈ જઈ ત્યાં પૈસા વહેંચીશ?’

મેં આવું કંઈ પણ કર્યું નથી : વિનોદ તાવડે

તેમણે કહ્યું કે, ‘હું નિયમો જાણું છું અને મેં આવું કંઈ પણ કર્યું નથી.’ ઉલ્લેખનીય છે કે, બહુજન વિકાસ અઘાડીના નેતા હિતેન્દ્ર ઠાકુરે મંગળવારે (તા.19 નવેમ્બર) તાવડે પર આક્ષેપ કર્યો હતો કે, ‘તાવડે વિરારની એક હોટલમાં પાંચ કરોડ રૂપિયા લઈને પહોંચ્યા હતા. તેમની સાથે તેમના કાર્યકર્તાઓ પણ હતા. આ દરમિયાન જોરદાર હંગામો થયો હતો. આ હોટલ મુંબઈથી લગભગ 60 કિલોમીટર દૂર આવેલી છે. આ કાંડ સામે આવ્યા બાદ કોંગ્રેસ અને શિવસેના સહિતની વિપક્ષી પાર્ટીઓ પણ તાવડે પર આક્રમક બની હતી.

આ પણ વાંચો : મહારાષ્ટ્ર: ભાજપ નેતા વિનોદ તાવડે પર 5 કરોડ વહેંચવાનો આરોપ, વિપક્ષ ચૂંટણી પંચ સામે આક્રમક

‘કેશ ફૉર વોટ’ કાંડ ફસાયેલા તાવડે વિરુદ્ધ FIR

‘કેશ ફૉર વોટ’ કાંડ મુદ્દો ચગ્યા બાદ ચૂંટણી પંચે જનપ્રતિનિધિત્વ અધિનિયમ હેઠળ તાવડે સામે FIR નોંધાવી છે. કુલ ત્રણ ફરિયાદો નોંધાઈ છે, જેમાંથી બેમાં ભાજપ ઉમેદવાર અને એકમાં વિનોદ તાડવેનું નામ સામેલ છે. મહારાષ્ટ્રના અધિક મુખ્ય ચૂંટણી અધિકારી કિરણ કુલકર્ણીએ જણાવ્યું કે, 'નાલાસોપારામાં સૂચના મળ્યા બાદ પોલીસ ઘટનાસ્થળે પહોંચી હતી. આચારસંહિતાના પાલન માટે રચાયેલી ચૂંટણી તંત્રની ફ્લાઈંગ સ્કવોડ પણ ઘટનાસ્થળે પહોંચી ગઈ હતી. ફ્લાઈંગ સ્ક્વોડે પરિસરનો તાગ મેળવ્યો હતો અને કેટલીક જપ્તી પણ કરી હતી. બધું નિયંત્રણમાં છે અને જે કોઈ આચાર સંહિતાનું ઉલ્લંઘન કરશે તેની સામે કાયદા મુજબ કાર્યવાહી કરવામાં આવશે.'

હોટલના રૂમમાંથી 9.93 લાખની રોકડ મળી

આ કાંડ ઉછળ્યા બાદ ચૂંટણી પંચે હોટલના રૂમોની તપાસ કરી હતી. પંચના એક અધિકારીએ કહ્યું હતું કે, હોટલના રૂમમાંથી 9.93 લાખ રૂપિયાની રોકડ મળી આવી છે. જો કે, વિનોદ તાવડેએ આ આરોપોને સખત શબ્દોમાં નકારી કાઢ્યા છે. તેમણે કહ્યું કે, ચૂંટણી પંચે આ સમગ્ર મામલાની તપાસ કરવી જોઈએ, સીસીટીવીની તપાસ કરવી જોઈએ, ત્યારબાદ સત્ય બધાની સામે આવશે. તેમણે કહ્યું કે, નાલાસોપારાના ધારાસભ્યોની બેઠક યોજાવાની હતી. આથી તેઓ આ બેઠકમાં આદર્શ આચારસંહિતા, વોટિંગ મશીન સીલ કરવાની પદ્ધતિ વગેરે સમજાવવા આવ્યા હતા.

આ પણ વાંચો : ‘મોદીજી, તમને આ 5 કરોડ ટેમ્પોમાં કોણે મોકલ્યા?’ ‘કેશ ફૉર વોટ’ મુદ્દે રાહુલ ગાંધીના ભાજપ પર પ્રહાર

હું મૂર્ખ નથી કે, વિપક્ષી નેતાની હોટલમાં રોકડ વહેંચુ? : વિનોદ તાવડે

તાવડેએ કહ્યું કે, ‘હિતેન્દ્ર ઠાકુર અને તેમનો પરિવાર વિવાંતા હોટલના માલિક છે. શું હું એટલો મૂર્ખ છું કે વિપક્ષી નેતાની હોટેલમાં રોકડ લઈ જઈ ત્યાં પૈસા વહેંચીશ? હું 40 વર્ષથી રાજકારણમાં છું અને સંપૂર્ણ નિયમો જાણું છું કે, ચૂંટણી પ્રચાર પૂરો થયા બાદ સાઈલન્સ સમયગાળા દરમિયાન શું કરી શકાય અને શું ન કરી શકાય. હું માત્ર સામાન્ય વાતચીત કરવા માટે કાર્યકર્તાઓ પાસે આવ્યો હતો. હું પ્રચાર કરવામાં પણ ન હતો. મતદાન પ્રક્રિયા સમજાવવા માટે મારા અને કાર્યકર્તાઓ વચ્ચે મુલાકાત થયાની હતી.’

‘રાષ્ટ્રીય નેતાઓ પણ આ નાના મુદ્દામાં કુદી પડ્યા’

તેમણે કહ્યું કે, મહાવિકાસ અઘાડીના નેતાઓએ વિગતવાર તપાસો કરવાની માંગ કરી છે. આશ્ચર્યજનક બાબત એ છે કે, રાષ્ટ્રીય નેતાઓ પણ આ નાના મુદ્દામાં કુદી પડ્યા છે. ભાજપના લોકો એટલા મૂર્ખ નથી કે, વિપક્ષી નેતાની હોટલમાં જઈને રોકડની વિતરણ કરશે. તેઓએ આ બાબત સમજવી જોઈએ. આખરે મારી પાસેથી કોઈ રકમ મળી નથી. રાહુલ ગાંધી અને સુપ્રિયા સુલેએ જે પાંચ કરોડ રૂપિયા જોયા છે, મહેરબાની કરીને મને મોકલે. મારા એકાઉન્ટમાં પણ જમા કરાવી શકે છે.

આ પણ વાંચો : ભાજપનો મહાવિકાસ અઘાડી પર મોટો આરોપ, સુધાંશુ ત્રિવેદીએ કહ્યું- 'સુપ્રિયા સુલેએ બિટકોઈનથી ફંડ મેળવ્યું'