મહારાષ્ટ્રમાં ઉથલપાથલ! શિવસેનાના દિગ્ગજ નેતાએ આપ્યું રાજીનામું, કેબિનેટમાં સામેલ ન કરાતા નારાજ
Updated: Dec 15th, 2024
Maharashtra Politics: મહારાષ્ટ્રમાં કેબિનેટ વિસ્તરણ પહેલા મોટા સમાચાર સામે આવી રહ્યા છે. શિવસેના શિંદે જૂથના ધારાસભ્ય નરેન્દ્ર ભોંડેકરે તેમના પદ પરથી રાજીનામું આપી દીધું છે. આ સંબંધમાં તેમણે નાયબ મુખ્યમંત્રી એકનાથ શિંદેને પત્ર લખ્યો છે, જેમાં તેમણે રાજીનામાની જાણકારી આપી છે. નરેન્દ્ર ભોંડેકરે પાર્ટીના ઉપનેતા અને શિવસેના વિભાગીય સંયોજક પદ પરથી રાજીનામું આપી દીધું છે. ભંડારા સીટના ધારાસભ્ય નરેન્દ્ર નવી કેબિનેટમાં મંત્રી પદ ન મળવાથી નારાજ છે.
મળતી માહિતી મુજબ, વર્ષ 2009માં નરેન્દ્રએ શિવસેનાની ટિકિટ પર કર ભંડારા વિધાનસભા સીટ પરથી પહેલીવાર ચૂંટણી જીતી હતી, તે સમયે તેમની ઉંમર માત્ર 30 વર્ષની હતી. વિસ્તાર પર મજબૂત પક્કડ ધરાવતા નરેન્દ્ર તેમના વિસ્તારમાં ઈન્ફ્રાસ્ટ્રક્ચર કામો અને વિકાસ કાર્યો માટે જાણીતા છે.
આ પણ વાંચો: 'માત્ર અઢી વર્ષ માટે બનાવીશું મંત્રી...', કેબિનેટની રચના પહેલા રેલીમાં અજિત પવારનું એલાન
2022ના બળવા દરમિયાન એકનાથ શિંદેને ટેકો આપ્યો હતો
વર્ષ 2019માં શિવસેનાએ નરેન્દ્રને ટિકિટ આપી ન હતી. જે બાદ તેઓ ભંડારા બેઠક પરથી અપક્ષ તરીકે ઉભા રહ્યા અને ચૂંટણી જીતીને વિધાનસભા પહોંચ્યા. આ પછી, વર્ષ 2022માં જ્યારે શિવસેનામાં બળવો થયો અને એકનાથ શિંદે અલગ થયા, ત્યારે નરેન્દ્ર શિંદે જૂથને ટેકો આપનારા સ્વતંત્ર ધારાસભ્યોમાં હતા. આ જ કારણ છે કે તેઓ 2024માં શિંદેની પાર્ટીની ભંડારા બેઠક પરથી ચૂંટણી લડ્યા હતા અને ફરીથી જીત્યા હતા.
ખેડૂત પરિવારમાંથી આવતા નરેન્દ્ર શિક્ષિત નેતાની છાપ ધરાવે છે
નરેન્દ્ર ભોંડેકરનો જન્મ ભંડારા વિસ્તારમાં થયો હતો. તેમણે પોતાના ઘરની નજીકની શાળામાં અભ્યાસ કર્યો. માહિતી અનુસાર, તે એક ખેડૂત પરિવાર સાથે સંબંધ ધરાવે છે અને તે વિસ્તારના શિક્ષિત અને સરળતાથી ઉપલબ્ધ નેતાઓમાંથી એક માનવામાં આવે છે. સમાજના તમામ પક્ષો અને લોકો પર તેમનો પ્રભાવ છે.
