‘BJP-RSS ઈચ્છે છે કે, ગરીબો સપનાં ન જુએ, અબજપતિઓ હિન્દુસ્તાનને ચલાવશે’, રાહુલ ગાંધીના પ્રહાર

Rahul Gandhi Attack On BJP-RSS : કોંગ્રેસ દ્વારા મધ્યપ્રદેશના મહૂ (Madhya Pradesh, Mhow)માં યોજાયેલી ‘જય બાપુ, જય ભીમ, જય સંવિધાન’ રેલીમાં કોંગ્રેસના સાંસદ રાહુલ ગાંધીએ ભાજપ, વડાપ્રધાન નરેન્દ્ર મોદી અને આરએસએસ પર આકરા પ્રહારો કર્યા છે. તેમણે કહ્યું કે, ‘જે દિવસે આપણું બંધારણ બદલાઈ જશે, તે દિવસથી દેશમાં દલિતો, પછાત લોકો અને આદિવાસીઓ માટે કંઈપણ નહીં બચે. BJP-RSS દેશમાં આઝાદી પહેલા જેવી સ્થિતિ ઊભી કરવા માંગે છે, જેમાં ગરીબો પાસે અધિકાર હોતા નથી, માત્ર અમીરો પાસે હોય છે. દલિતો, પછાત લોકો, આદિવાસીઓ અને ગરીબોને ફરી એકવાર ગુલામ બનાવવામાં આવી રહ્યા છે.

BJP-RSS બંધારણના વિરુદ્ધમાં : રાહુલ ગાંધી

તેમણે સમર્થકોને સંબોધન કરતા કહ્યું કે, ‘ભારતમાં વિચારધારાની લડાઈ ચાલી રહી છે. એકતરફ કોંગ્રેસ છે, જે બંધારણને માને છે અને તે માટે લડી રહી છે, જ્યારે બીજીતરફ ભાજપ છે, જેઓ બંધારણના વિરુદ્ધમાં છે, તેઓ તેને નબળું પાડવા તેમજ ખતમ કરાવ માંગે છે. બંધારણ માત્ર એક પુસ્તક નથી. તેમાં ભારતના હજારો વર્ષ જૂના વિચારો છે. તેમાં આંબેડકરજી, મહાત્મા ગાંધીજી, ભગવાન બુદ્ધ, ફુલેજી જેવા મહાપુરુષોનો અવાજ છે.’

રાહુલ ગાંધીએ PM મોદી પર સાધ્યું નિશાન

કોંગ્રેસ નેતાએ કહ્યું કે, ‘ભાજપે લોકસભા પહેલા પણ બંધારણ ખતમ કરવાની વાત કહી હતી. તેમણે કહ્યું હતું કે, જો 400 બેઠકો આવશે તો બંધારણ બદલી નાખીશું. પરંતુ તેમની વિરુદ્ધ કોંગ્રેસ, INDIA ગઠબંધનના નેતાઓ અને કાર્યકર્તાઓ ઊભા છે. પરિણામ એવું આવ્યું કે, વડાપ્રધાન નરેન્દ્ર મોદી (PM Narendra Modi)એ લોકસભામાં બંધારણ પાસે માથું ટેકાવવું પડ્યું.’

‘બંધારણ ખતમ થશે તો ગરીબો માટે કંઈપણ નહીં બચે’

તેમણે વધુમાં કહ્યું કે, ‘યાદ રાખજો... જે દિવસે બંધારણ ખતમ થઈ જશે, તે દિવસથી દેશમાં ગરીબો માટે કંઈપણ નહીં બચે. આઝાદી પહેલા ગરીબો, દલિતો, પછાત લોકો, આદિવાસીઓ પાસે કોઈપણ અધિકાર ન હતા. માત્ર રાજા-મહારાજાઓ પાસે અધિકાર હતા. આઝાદી બાદ બંધારણ સ્થપાયા બાદ તમામને અધિકાર મળ્યા છે.’

રાહુલે અદાણી-અંબાણીનો પણ કર્યો ઉલ્લેખ

રાહુલ ગાંધીએ સંબોધન દરમિયાન અદાણી-અંબાણી (Adani-Ambani)નો પણ ઉલ્લેખ કર્યો. તેમણે કહ્યું કે, ભાજપ-આરએસએસના લોકો દેશમાં આઝાદી પહેલાનું હિન્દુસ્તાન બનાવવા ઈચ્છે છે, જેમાં કોઈપણ અધિકાર હોતા નથી, માત્ર અદાણી-અંબાણી જેવા અબજોપતિઓ પાસે તમામ અધિકાર હોય છે. ભાજપ-આરએસએસ ઈચ્છે છે કે, ગરીબો ચુપ રહે, ભૂખ્યા મરી જાય, કોઈ સપના ન જુએ અને અબજોપતિઓ ભારત ચલાવે.’

આ પણ વાંચો : ભાજપના ધારાસભ્ય નિર્મલ અખાડાના મહામંડલેશ્વર બન્યાં, પિંડદાન બાદ સંતોની હાજરીમાં પટ્ટાભિષેક

‘અબજોપતિઓની લોન માફ કરી, ખેડૂતો-મજૂરો-વિદ્યાર્થીઓના પૈસા માફ ન કર્યા’

કોંગ્રેસ નેતાએ કહ્યું કે, ‘નરેન્દ્ર મોદીએ અબજોપતિઓની 16 લાખ કરોડ રૂપિયાની લોન માફ કરી છે, પરંતુ દેશના ખેડૂતો, મજૂરો અને વિદ્યાર્થીઓના પૈસા માફ કર્યા નથી. તમે લોકો GST ભરો છો, તમે મહેનત કરો છો અને ભારતમાં ચાઈનીઝ માલ અદાણી-અંબાણી વેચે છે. ચીનના યુવાનોને રોજગાર મળે છે. અદાણી-અંબાણીનો ફાયદો થાય છે અને તમારા બાળકોના હાથમાં રોજગાર રહેતો નથી. જનતાના ખિસ્સામાંથી પૈસા નીકળીને સીધા અદાણી-અંબાણીઓના ખિસ્સામાં જાય છે.’

આ પણ વાંચો : વક્ફ સંશોધન બિલને JPCની મંજૂરી: 14 બદલાવ સ્વીકારાયાં, બજેટ સત્રમાં રજૂ કરાશે રિપોર્ટ