મહારાષ્ટ્રમાં પાર્ટીઓમાં તોડફોડ લોકસભામાં ભાજપનો ખેલ બગાડશે! I.N.D.I.A ને બમ્પર ફાયદો

Parliament Election 2024 | આગામી લોકસભા ચૂંટણી દરમિયાન સૌથી વધુ લોકોની નજર મહારાષ્ટ્ર પર રહેશે. તેનું મુખ્ય કારણ રાજ્યની રાજકીય ગતિવિધિઓ છે. મહારાષ્ટ્ર એકમાત્ર એવું રાજ્ય છે જેણે 2019ની સામાન્ય ચૂંટણી પછી ગઠબંધનની રાજનીતિમાં મોટો ફેરફાર જોયો છે. શિવસેના અને એનસીપી વચ્ચેના વિભાજનથી લઈને આ પક્ષોની 'માલિકીના અધિકારો' અંગે તાજેતરમાં મહારાષ્ટ્રમાં ભારે હોબાળો થયો. આવી સ્થિતિમાં સવાલ એ ઊભો થાય છે કે શું મહારાષ્ટ્રનું બદલાયેલું રાજકીય વાતાવરણ સંસદીય ચૂંટણીમાં ભાજપની આગેવાની હેઠળના નેશનલ ડેમોક્રેટિક એલાયન્સ (NDA)ને મદદ કરશે કે તેની વિપરીત અસર જશે? ચાલો સમજીએ.

I.N.D.I.A હવે બમ્પર ફાયદો થવાની શક્યતા! 

એક સરવે અનુસાર જો જાન્યુઆરીમાં ચૂંટણી યોજાઈ હોત તો ભાજપ અને તેના સહયોગીઓને ભારે નુકસાન થયું હોત. સર્વે અનુસાર મહારાષ્ટ્રની કુલ 48 લોકસભા બેઠકોમાંથી ભાજપ અને તેના સહયોગી પક્ષોને 22 બેઠકો મળી શકી હોત. એનડીએને 2019માં મળેલી બેઠકો કરતાં આ 19 બેઠકો ઓછી છે. સર્વે અનુસાર, જો 2024ની લોકસભાની ચૂંટણી જાન્યુઆરીમાં યોજાઈ હોત તો કોંગ્રેસની આગેવાની હેઠળના I.N.D.I.A ગઠબંધનને મહારાષ્ટ્રમાં 26 બેઠકો મળી હોત. જેના પરથી કહી શકાય કે 2019ની સરખામણીમાં કોંગ્રેસ અને તેના ગઠબંધનને 21 સીટોનો સીધો ફાયદો થયો હોત. 

કોનો કેટલો વોટ શેર? 

સર્વે મુજબ એનડીએ (NDA) નો વોટ શેર 40 ટકા રહ્યો હોત. જ્યારે કોંગ્રેસને 12 બેઠકો મળી હોત. આ સિવાય શરદ પવારની આગેવાની હેઠળના NCP જૂથ અને ઉદ્ધવ ઠાકરેની શિવ સેનાને 14 બેઠકો મળી શકે તેમ હતી. જ્યારે વિપક્ષી I.N.D.I.A ગઠબંધનનો વોટ શેર 45 ટકા રહેવાનો અંદાજ હતો.

2019 પછી તોડફોડ વધી 

2019ની લોકસભા ચૂંટણી પછી મહારાષ્ટ્રમાં રાજકીય ગતિવિધિઓ ઝડપથી બદલાઈ. પાર્ટીઓની અંદર અને બહાર ઘણું બધું થયું. શિવસેના અને રાષ્ટ્રવાદી કોંગ્રેસ (NCP) વચ્ચે વિભાજન થયું હતું અને હવે ચૂંટણી પંચ દ્વારા જાહેર 'અસલ પક્ષો' ભાજપ સાથે છે. લગભગ આવી જ સ્થિતિ બિહારમાં પણ છે. પરંતુ મહારાષ્ટ્રમાં જે સમીકરણો છે તે ભાજપ અને તેના સાથી પક્ષો માટે યોગ્ય નથી દેખાતા.