બાળકોને સોશિયલ મીડિયાની 'કૂટેવ' પડી, તેના ઉપયોગ માટે સરકાર વયમર્યાદા નક્કી કરે : કર્ણાટક હાઈકોર્ટ

કર્ણાટક હાઈકોર્ટે એક મહત્ત્વપૂર્ણ કેસમાં ટિપ્પણી કરતાં કહ્યું કે જો યુવાનો અને ખાસ કરીને સ્કૂલના બાળકો માટે સોશિયલ મીડિયાના ઉપયોગ પર પ્રતિબંધ મૂકી દેવામાં આવે તો આ દેશ માટે સારું રહેશે.  તેની સાથે કોર્ટે એવું પણ સૂચન કર્યું કે જે વયે યુવાઓને વોટ કરવાનો અધિકાર મળે છે ત્યારે જ તેમને સોશિયલ મીડિયાના ઉપયોગની પરવાનગી મળવી જોઈએ. આ વય 18 કે 21 હોઈ શકે છે. 

એક્સ કોર્પ (અગાઉ ટ્વિટર) ની અરજી પર કરાઈ સુનાવણી 

જસ્ટિસ જી.નરેન્દ્ર અને જસ્ટિસ વિજય કુમાર એ.પાટિલની બેન્ચે એક્સ કોર્પની અરજી પર સુનાવણી હાથ ધરી હતી. આ દરમિયાન આ ટિપ્પણી કરતાં બેન્ચે કહ્યું કે સ્કૂલ જનારા બાળકોને સોશિયલ મીડિયાની લત લાગી ગઈ છે અને આ દેશ માટે સારું રહેશે કે તેના પર પ્રતિબંધ મૂકવામાં આવે. 

બેન્ચે કરી મહત્ત્વપૂર્ણ ટિપ્પણી 

કોર્ટે આ મામલે એક ધારદાર સવાલ પૂછ્યો કે બાળકો 17 કે 18 વર્ષના હોઈ શકે છે પણ શું તેમનામાં નિર્ણયો લેવાની પરિપક્વતા છે કે દેશના હિતમાં શું (સારું) છે અને શું નથી? ન ફક્ત સોશિયલ મીડિયા પરંતુ ઈન્ટરનેટ ઉપરથી એવી દરેક વસ્તુને હટાવી દેવી જોઈએ જે મનમાં ઝેર ભરતી હોય. સરકારે સોશિયલ મીડિયાના ઉપયોગ માટે એક વયમર્યાદા નક્કી કરવા વિચારવું જોઈએ.