ઝારખંડ ચૂંટણી: RJD નારાજ છતાં કોંગ્રેસનો મોટો નિર્ણય, 18 બેઠકો પર નામ કર્યા નક્કી, 11 બેઠકો પર ખડગે લેશે નિર્ણય

Jharkhand Election : ઝારખંડ વિધાનસભા ચૂંટણી માટે કોંગ્રેસની કેન્દ્રીય ચૂંટણી સમિતિની આજે સોમવારે (21 ઑક્ટોબર) બેઠક મળી હતી. જેમાં ઉમેદવારોના નામની ચર્ચા થઈ હતી. મીડિયા અહેવાલ પ્રમાણે, કોંગ્રેસના ક્વોટાની 29 બેઠકો પર ચર્ચા થઈ હતી. જેમાં 18 બેઠકો માટે નામ ફાઈનલ કરવામાં આવ્યા છે. બાકીની 11 બેઠકો પર કોંગ્રેસ અધ્યક્ષ નિર્ણય લેશે. જ્યારે મહારાષ્ટ્રમાં 25 ઑક્ટોબરે CECની બેઠકો પર ચર્ચા કરશે. હાલમાં ઝારખંડને લઈને આગામી CEC બેઠક યોજવાની કોઈ શક્યતા નથી.

RJDએ 12 બેઠકોની માગ કરી

ઝારખંડ મુક્તિ મોરચા અને કોંગ્રેસે શનિવારે જાહેરાત કરી હતી કે, બંને પક્ષો રાજ્યની 81 વિધાનસભા બેઠકોમાંથી 70 બેઠકો પર તેમના ઉમેદવારો ઉભા કરશે. જ્યારે ગઠબંધન ભાગીદારો બાકીની બેઠકો પર તેમના ઉમેદવારો ઉતારશે. કોંગ્રેસના આ નિર્ણયથી RJD નારાજ છે. તેને રવિવારે કહ્યું હતું કે, તે 12થી ઓછી બેઠકો પર કોઈ સમાધાન નહીં કરે. આટલું જ નહીં, RJDએ જાહેરાત કરી છે કે, જો કામ નહીં થાય તો તે એકલા હાથે ચૂંટણી લડશે.

આ પણ વાંચો : ગરીબી રેખા નીચે જીવતાં સૌથી વધુ લોકો ભારતમાં, 25 કરોડ લોકોને ગરીબીમાંથી બહાર કાઢ્યાનો સરકારી દાવો પોકળ

આ નેતાએ બેઠકમાં હાજર આપી

આવી સ્થિતિમાં ભારત ગઠબંધનને નુકસાન થઈ શકે છે. ઝારખંડમાં 13 અને 20 નવેમ્બરે બે તબક્કામાં મતદાન થશે. પરિણામ 23મી નવેમ્બરે આવશે. આ તમામ રાજકીય સમીકરણોને ધ્યાનમાં લેતા કોંગ્રેસમાં મંથનનો સમયગાળો ચાલી રહ્યો છે. કોંગ્રેસ અધ્યક્ષ મલ્લિકાર્જુન ખડગે, સોનિયા ગાંધી, પૂર્વ કોંગ્રેસ અધ્યક્ષ રાહુલ ગાંધી, કેસી વેણુગોપાલ, ગુલામ અહેમદ મીર, કેશવ મહતો અને ઝારખંડના અન્ય વરિષ્ઠ નેતાઓએ સોમવારે યોજાયેલી બેઠકમાં હાજરી આપી હતી.

આ પણ વાંચો : મહારાષ્ટ્રમાં લૉરેન્સ બિશ્નોઈને ચૂંટણી લડવા માટે આ પાર્ટીએ કરી ઑફર, કહ્યું- ‘તમારામાં શહીદ ભગત સિંહ દેખાય છે’

હેમંત સોરેનના ભાજપ પર પ્રહાર

રાજકીય ઘમાસાણ વચ્ચે ઝારખંડના મુખ્યમંત્રી હેમંત સોરેને સોમવારે (21 ઑક્ટોબર) ભાજપ પર પ્રહાર કર્યા હતા. તેમણે આરોપ લગાવ્યો કે, 'બંધારણીય સંસ્થાઓ ભાજપ માટે કામ કરી રહી છે. આ સંસ્થાઓ કેન્દ્ર સરકારના ઇશારે કામ કરે છે. આ વિધાનસભા ચૂંટણી ઝારખંડ અને અહીંના લોકોના અધિકારો અને સન્માન સાથે જોડાયેલી છે. ચૂંટણીની તારીખોનું એલાન કરાયું. રાજ્ય સરકારનું કાર્યકાળ પણ પૂર્ણ ન કરવા દેવાયું. ભાજપ વિરૂદ્ધ થતા અવાજોને દબાવવામાં આવે છે, હું તેનો જીવંત ઉદાહરણ છું.'