જમ્મુ-કાશ્મીરમાં ચૂંટણીના એલાન બાદ મહેબૂબાને મોટો ઝટકો, મુખ્ય પ્રવક્તાએ જ પાર્ટીનો સાથ છોડ્યો

Jammu Kashmir Election 2024: જમ્મુ-કાશ્મીરમાં વિધાનસભાની ચૂંટણી પહેલા મહેબૂબા મુફ્તીની પાર્ટી પીડીપીને મોટો ઝટકો લાગ્યો છે. પીડીપીના મુખ્ય પ્રવક્તા સુહેલ બુખારીએ મંગળવારે પાર્ટી છોડી દીધી હતી. બુખારી દેખીતી રીતે ચૂંટણી લડવાનો આદેશ ન આપવાથી નારાજ હતા. તેઓ વગુરા-ક્રીરીથી ચૂંટણી લડે તેવી અપેક્ષા હતી, પરંતુ ગયા મહિને ભૂતપૂર્વ પ્રધાન બશારત બુખારીના પીડીપીમાં પાછા ફરતા સુહેલ બુખારીને ટિકિટ મળવાની શક્યતા ઓછી થઈ ગઈ છે. 

બુખારી મહેબૂબા મુફ્તીના નજીકના સહયોગી હતા

પત્રકારમાંથી રાજકારણી બનેલા બુખારી પીડીપી પ્રમુખ મહેબૂબા મુફ્તીના નજીકના સહયોગી હતા અને જ્યારે મહેબૂબા મુફ્તી મુખ્યમંત્રી હતા ત્યારે બુખારીએ તેમના મીડિયા સલાહકાર તરીકે પણ કામ કર્યું હતું. 

પત્રકારો સાથે વાત કરતા બુખારીએ કહ્યું કે, 'હું 2019માં પીડીપી-ભાજપ સરકારના પતન બાદ પાર્ટીમાં જોડાયો હતો. તે મુશ્કેલ સમય હતો અને છેલ્લા પાંચ વર્ષમાં મેં કાશ્મીરના લોકોની ઓળખ અને અધિકાર અપવવા માટે તેમજ પીડીપીના મૂળ વિચારને મજબૂત કરવા માટે ખરેખર સખત મહેનત કરી છે. જયારે પીડીપીને તોડવાના પ્રયાસો કરવામાં આવ્યા હતા ત્યારે પાર્ટીના કાર્યકરો તૂટ્યા ન હતા. તમામ ઉતાર-ચઢાવમાં પાર્ટી સાથે ઉભા રહ્યા તેમજ યુવા અને શિક્ષિત લોકો પણ પાર્ટીમાં જોડાયા અને તેમાં યોગદાન આપ્યું.'

આ પણ વાંચો: OBC અને SC-STના સ્ટુડન્ટ્સ જનરલ સીટ પર એડમિશનના હકદાર, સુપ્રીમકોર્ટનો મહત્ત્વપૂર્ણ આદેશ

બુખારીએ આ આરોપ લગાવ્યા 

જો કે, બુખારીએ આરોપ લગાવ્યો હતો કે લોકોનું ઉત્તમ યોગદાન હોવા છતાં તેમને દૂર કરવામાં આવી રહ્યા છે. તેમણે કહ્યું કે, 'નવા નેતાઓનું સ્વાગત કરવામાં આવી રહ્યું છે. પાર્ટીના ઘણા નેતાઓ, જેઓ હંમેશા પાર્ટી સાથે ઉભા રહ્યા છે, તેમનો સમાવેશ કરવામાં આવ્યો નથી. તેથી આવા સંજોગોમાં મારા માટે કામ કરવું મુશ્કેલ બની રહ્યું છે. તેથી, મેં ચીફને કહીને પક્ષના પ્રવક્તા અને મુખ્ય સભ્યપદે રાજીનામું આપી દીધું છે.'

હવે સુહેલનું વલણ કેવું રહેશે?

સુહેલ બુખારીના પક્ષ છોડ્યા બાદ એવી અટકળો ચાલી રહી છે કે તેઓ ફારુક અબ્દુલ્લાની પાર્ટી નેશનલ કોન્ફરન્સમાં જોડાઈ શકે છે. જો અબ્દુલ્લા તેમને વગુરા-ક્રીરી ટિકિટ આપવાનું આશ્વાસન આપે તો. જો આમ ન થાય તો તેઓ અપક્ષ પણ ચૂંટણી લડી શકે છે.

આ પણ વાંચો: પખવાડિયામાં બેક ટૂ બેક 3 નિર્ણય પાછા ખેંચ્યા, મોદી સરકારે ચર્ચા વગર જ નિર્ણય લીધાની અટકળો

મહેબૂબાની પુત્રી ઇલ્તિજાનો રાજકારણમાં પ્રવેશ 

જમ્મુ અને કાશ્મીરમાં વિધાનસભા ચૂંટણીના સંદર્ભમાં, પીપલ્સ ડેમોક્રેટિક પાર્ટીએ આઠ વિધાનસભા ક્ષેત્રોના પ્રભારીઓની યાદી જાહેર કરી. પાર્ટીના વડા મહેબૂબા મુફ્તીની પુત્રી ઇલ્તિજાને બિજબિહાર વિધાનસભા ક્ષેત્રમાંથી જવાબદારી સોંપવામાં આવી છે. ઇલ્તિજા મુફ્તી પોતાની રાજકીય કારકિર્દી વિધાનસભા ચૂંટણીથી શરૂ કરશે. માતાએ લોકસભા ચૂંટણીમાં પ્રચાર શરૂ કરતાની સાથે જ તેમના ચૂંટણી મેદાનમાં ઉતરવાની ચર્ચાઓ તેજ થઈ ગઈ હતી.