અડધી ડિગ્રી તાપમાન વધશે તો અમેરિકા જેવડો પ્રદેશ માનવ વસવાટ લાયક નહીં રહે

ઔદ્યોગિક યુગ પૂર્વેના સરેરાશ તાપમાનમાં બે ડિગ્રીનો વધારો ઘાતક બનશે

૨૧મી સદીની ઘાતક ગરમીની ત્રણ મોટી ઘટનાઓમાં  કુલ બે લાખ કરતાં વધારે લોકોનાં મોત નોંધાયા છે   

વિજ્ઞાાનીઓના  આંતરરાષ્ટ્રીય ગુ્રપના જણાવ્યા અનુસાર ઔદ્યોગિક યુગ પૂર્વેના પૃથ્વીના સરેરાશ તાપમાનમાં અડધી ડિગ્રીનો પણ વધારો થાય તો પૃથ્વીની જમીન એટલી બધી ગરમ થઇ જશે કે ૧૮થી ૬૦ વર્ષના તંદુરસ્ત માણસો માટે પણ તે ખૂબ ગરમ હવામાન બની રહેશે. ઔદ્યોગિક યુગ પૂર્વેના પૃથ્વીના સરેરાશ તાપમાનમાં માત્ર બે ડિગ્રીનો વધારો થશે તો પણ  ગ્લોબલ વોર્મિંગના કારણે આ જીવી ન શકાય તેવો વિસ્તાર લગભગ યુએસ જેટલો થઇ જશે. 

૨૦૨૪માં તાપમાનના તમામ વિક્રમો તુટી ગયા હતા. ૨૦૨૪માં દુનિયાનું તાપમાન ઔદ્યોગિક યુગ પૂર્વેના પૃથ્વીના સરેરાશ તાપમાન કરતાં ૧.૫ ડિગ્રી વધારે રહ્યું હતું.

આ અભ્યાસના મુખ્ય સંશોધક ડો.ટોમ મેથ્યુએ જણાવ્યું હતું કે ઔદ્યોગિક યુગ પૂર્વેના પૃથ્વીના સરેરાશ તાપમાનમા જો ૪ ડિગ્રીનો વધારો થાય તો તેની આરોગ્ય પર અતિઘાતક અસરો પડી શકે છે.

સહારા આફ્રિકા અને દક્ષિણ એશિયામાં લોકોને અત્યંત ગરમ હવામાનનો સામનો કરવો પડે તેવી શક્યતાઓ છે. છ કલાકમાં શરીરનું તાપમાન ૪૨ ડિગ્રી સેન્ટીગ્રેડનો આંક વટાવી જાય તો આ ગરમીમાં અસ્તિત્વ ટકી શકે નહીં. 

સંશોધકોની ટીમે નોંધ્યું હતું કે ૨૧મી સદીની ત્રણ ઘાતક ગરમીની ઘટનાઓમાં  કુલ બે લાખ લોકો કરતાં પણ વધારે લોકોના મોત થયા હતા. જેમાં ૨૦૦૩માં યુરોપમાં ૭૨,૦૦૦ જણાંના, ૨૦૨૨માં સમગ્ર યુરોપમાં ૬૨,૦૦૦ જણાંના અને ૨૦૧૦માં રશિયામાં આવેલાં હીટવેવમાં ૫૬,૦૦૦ જણાંના મોત થયા હતા.