'પતિ દ્વારા તેની માતાને સમય અને પૈસા આપવા એ ઘરેલું હિંસા નથી', કોર્ટે મહિલાની અરજી ફગાવી

Man Giving Time And Money To Mother is not Domestic Violence: મુંબઈની સેશન્સ કોર્ટે કહ્યું છે કે જે પતિ તેની માતાને સમય અને પૈસા આપે છે તે ઘરેલું હિંસા નથી. કોર્ટે તેના પતિ અને સાસરિયાઓ સામેની ફરિયાદ પર મેજિસ્ટ્રેટ કોર્ટના આદેશને પડકારતી મહિલાની અરજીને ફગાવી દીધી છે.

પ્રોટેક્શન ઑફ વિમેન ફ્રોમ ડોમેસ્ટિક વાયોલન્સ એક્ટ હેઠળ કરી અરજી 

મંત્રાલય (રાજ્ય સચિવાલય) માં સહાયક તરીકે કામ કરતી એક મહિલાએ પ્રોટેક્શન ઑફ વિમેન ફ્રોમ ડોમેસ્ટિક વાયોલન્સ એક્ટ હેઠળ મેજિસ્ટ્રેટ કોર્ટ સમક્ષ સુરક્ષા અને ભરણપોષણની માંગણી કરતી ફરિયાદ દાખલ કરી હતી. મહિલાનો આરોપ છે કે તેના પતિએ પોતાની માતાની માનસિક બીમારીની હકીકત છુપાવીને તેને છેતરીને તેની સાથે લગ્ન કર્યા હતા. મહિલાએ એવો પણ દાવો કર્યો હતો કે તેની સાસુ તેની નોકરીની વિરુદ્ધ હતા અને તેનો પતિ અને સાસુ તેની સાથે મારપીટ કરતા હતા.

ફેમિલી કોર્ટમાં કરી છૂટાછેડાની અરજી 

મહિલાએ જણાવ્યું કે તેનો પતિ સપ્ટેમ્બર 1993થી ડિસેમ્બર 2004 સુધી નોકરીના કારણે વિદેશમાં રહ્યો હતો. જ્યારે પણ તે રજા પર ભારત આવતો ત્યારે તે તેની માતાને મળવા આવતો અને દર વર્ષે તેની માતાને રૂ.10,000 મોકલતો. મહિલાએ કહ્યું કે પતિએ પોતાની માતાના આંખના ઓપરેશન માટે પણ પૈસા ખર્ચ્યા હતા. તેણીએ તેના સાસરી પરિવારના અન્ય સભ્યો દ્વારા સતામણીનો દાવો પણ કર્યો હતો. જોકે, સાસરિયાઓએ તમામ આરોપોને નકારી કાઢ્યા હતા. 

પતિ લગાવ્યા આ આરોપ 

તેમજ આ બાબતે પતિએ એવો દાવો કર્યો હતો કે પત્નીએ તેને ક્યારેય પતિ તરીકે સ્વીકાર્યો નથી અને તેના પર ખોટા આરોપો લગાવતી રહી છે. પતિના કહેવા પ્રમાણે, તેની ક્રૂરતાને કારણે તેણે ફેમિલી કોર્ટમાં છૂટાછેડાની અરજી કરી હતી. આ ઉપરાંત પતિનો એવો પણ આરોપ હતો કે તેની પત્નીએ તેના એનઆરઆઈ ખાતામાંથી કોઈપણ જાણકારી વગર રૂ. 21.68 લાખ ઉપાડી લીધા અને તે રકમથી ફ્લેટ ખરીદ્યો. 

કોર્ટે આપ્યો આ ચુકાદો 

પતિ માતાને સમય અને પૈસા આપવો એ ઘરેલું હિંસા નથી. મુંબઈની એક કોર્ટે પત્નીની અરજીને ફગાવી દેતા આ ચુકાદો આપ્યો છે. મુંબઈ સેશન્સ કોર્ટે કહ્યું કે પતિ દ્વારા માતાને સમય અને પૈસા આપવાને ઘરેલુ હિંસા ગણી શકાય નહીં. એડિશનલ સેશન્સ જજ આશિષ અયાચિતે પોતાના આદેશમાં કહ્યું કે આ આરોપો અસ્પષ્ટ અને શંકાસ્પદ છે. આ કેસમાં મહિલા અરજદાર સામે ઘરેલુ હિંસા થઇ હોવાનું કશું જ કારણ નથી. 

મેજિસ્ટ્રેટ કોર્ટના નિર્ણયમાં સેશન્સ કોર્ટના હસ્તક્ષેપની જરૂર નથી

ન્યાયાધીશે કહ્યું કે મેજિસ્ટ્રેટ કોર્ટના નિર્ણયમાં સેશન્સ કોર્ટના હસ્તક્ષેપની જરૂર નથી. જ્યારે મહિલાની અરજી પેન્ડિંગ હતી, ત્યારે મેજિસ્ટ્રેટ કોર્ટે તેને દર મહિને 3,000 રૂપિયા વચગાળાનું ભરણપોષણ ભથ્થું ચૂકવવાનો આદેશ આપ્યો હતો. મહિલાના અને અન્ય પુરાવા નોંધ્યા પછી, મેજિસ્ટ્રેટ કોર્ટે તેની અરજી ફગાવી દીધી હતી અને કાર્યવાહીની પેન્ડન્સી દરમિયાન તેને આપવામાં આવેલી વચગાળાની રાહત રદ કરી હતી. બાદમાં મહિલાએ સેશન્સ કોર્ટમાં ફોજદારી અપીલ દાખલ કરી હતી.

સેશન્સ કોર્ટમાં અપીલ દાખલ, અહીં પણ અરજી ફગાવી

આ અરજી પર મળતા પુરાવાઓની તપાસ કર્યા પછી, સેશન્સ કોર્ટે જણાવ્યું હતું કે પતિ પર લગાવેલા આરોપો 'અસ્પષ્ટ' છે અને એવું સાબિત કરવા માટે કંઈ નથી કે તેઓએ મહિલા પર ઘરેલું હિંસા કરી હતી. કોર્ટે કહ્યું કે પતિ પોતાની માતાને સમય અને પૈસા આપે છે, જે ઘરેલું હિંસા નથી. કોર્ટે એમ પણ કહ્યું હતું કે મહિલાના પતિએ છૂટાછેડા માંગતી નોટિસ જારી કર્યા બાદ જ કાર્યવાહી શરૂ કરવામાં આવી હતી. મહિલાને ઘરેલું હિંસા અધિનિયમ હેઠળ મહિલાઓની સુરક્ષા હેઠળ કોઈ રાહત મળવા પાત્ર નથી.