હોસ્પિટલ મૃતદેહોથી ઉભરાઇ, આખી રાત પોસ્ટમોર્ટમ ચાલ્યું, હાથરસ નાસભાગ બાદ સર્જાયા ભયાનક દ્રશ્યો

Hathras: ઉત્તર પ્રદેશના હાથરસમાં સત્સંગ દરમિયાન થયેલી નાસભાગમાં મહિલા, બાળકો સહિત 121 થી વધુ લોકોના મોત થયા છે. હાથરસમાં થયેલા અકસ્માત બાદ, મૃતકો/ઈજાગ્રસ્તોને એટાહ, અલીગઢ અને તેની નજીકના જિલ્લાઓની હોસ્પિટલોમાં મોકલવામાં આવ્યા હતા. કુલ મૃત્યુઆંક 121 પર પહોંચી ગયો છે. ઇટાહની જિલ્લા હોસ્પિટલમાં તૈનાત એક ડૉક્ટરે કહ્યું કે, અહીં લાવવામાં આવેલા મોટાભાગના મૃતદેહો ગૂંગળામણને કારણે મૃત્યુ પામ્યા હતા. 

એટાહ હોસ્પિટલના ડૉક્ટરે જણાવ્યું કે, હાથરસ અકસ્માત બાદ અહીંની જિલ્લા હોસ્પિટલમાં સામાન્ય દિવસો કરતાં ચાર ગણા વધુ પોસ્ટમોર્ટમ કરવામાં આવ્યા હતા. મંગળવારે હાથરસના ફુલરાઈ ગામમાં નાસભાગ બાદ 27 મૃતદેહોને એટા જિલ્લા હોસ્પિટલના શબઘરમાં લાવવામાં આવ્યા હતા.

એઓટાના એડિશનલ ચીફ મેડિકલ ઓફિસર ડૉ. રામ મોહન તિવારીએ જણાવ્યું હતું કે, "અહીં લાવવામાં આવેલા 27 મૃતદેહોમાંથી 19નું પોસ્ટમોર્ટમ કરવામાં આવ્યું છે, જ્યારે શબગૃહનો સ્ટાફ અડધી રાત્રે 20મા મૃતદેહના પોસ્ટમોર્ટમની તૈયારી કરી રહ્યો હતો. હાલમાં, છ મૃતદેહોની ઓળક કરવાની બાકી છે. 

ડો. રામ મોહન તિવારીએ વધુમાં જણાવ્યું કે, "લગભગ તમામ કેસોમાં મૃત્યુનું કારણ દબાણને કારણે ગૂંગળામણ હોવાનું જણાયું હતું. પીડિતોમાં મોટાભાગની 40-50 વર્ષની વયની મહિલાઓ હતી. જિલ્લામાં દરરોજ સરેરાશ ચારથી પાંચ પોસ્ટમોર્ટમ થાય છે પરંતુ ઘટનાના દિવસે મૃતદેહોની સંખ્યા સરેરાશ કરતા ઘણી વધુ હતી. જેના કારણે હોસ્પિટલના કર્મચારીઓ અને અધિકારીઓને નિયમિત સમય કરતા વધુ કામ કરવું પડ્યું હતું.

સારવાર હેઠળ પીડિત લોકો વિશે મુખ્ય તબીબી અધિકારીએ જણાવ્યું હતું કે, અહીં ચાર દર્દીઓ લાવવામાં આવ્યા હતા, જેમાંથી એકને પ્રાથમિક સારવાર બાદ જ રજા આપવામાં આવી હતી. અન્ય બે ખતરાની બહાર છે અને એક સગર્ભા મહિલાની સારવાર ચાલી રહી છે, પરંતુ તેની હાલત સ્થિર છે.

આ મામલામાં પોલીસ અધિકારી સંજય કુમાર સિંહે જણાવ્યું કે, મૃત્યુ પામેલાઓમાં મોટાભાગની મહિલાઓ હતી. શ્વાસ રૂંધાવાથી ભક્તોના મોત થયા છે. હોસ્પિટલમાં લાવવામાં આવેલા 27 મૃતદેહોમાંથી 21ની ઓળખ મધરાત સુધીમાં થઈ હતી. મૃતદેહોની ઓળખ થયા બાદ યોગ્ય કાર્યવાહી બાદ પરિવારજનોને સોંપવામાં આવશે. 

પોલીસે જણાવ્યું કે, હાથરસ જિલ્લાના ફુલરાઈ ગામમાં 'સત્સંગ' માટે લગભગ 2.5 લાખ ભક્તો એકઠા થયા હતા, જે અપેક્ષિત સંખ્યા કરતા ઘણા વધુ હતા. 'સત્સંગ' પૂરો થઈ રહ્યો હતો ત્યારે નાસભાગ મચી ગઈ. ઉપદેશક 'ભોલે બાબા'ની કાર પાછળ ભીડ દોડી રહી હતી, તે જ સમયે લોકો કાદવમાં લપસી પડ્યા અને એક બીજાના માથે પડ્યા હતા. જેના કારણે નાસભાગ મચી ગઈ હતી અને સોથી વધુ લોકોએ જીવ ગુમાવ્યો હતો. 

મહત્વનું છે કે, આખી ઘટનાને લઇને CM યોગી આદિત્યનાથ બુધવારે હાથરસ પહોંચ્યા હતા અને સત્સંગ અકસ્માતમાં ઘાયલ થયેલા લોકોને મળ્યા હતા. 

સીએમએ કહ્યું કે, આ ઘટનાની તપાસ માટે એડિશનલ ડાયરેક્ટર જનરલ ઓફ પોલીસ (આગ્રા) અને અલીગઢ ડિવિઝનલ કમિશનરની એક ટીમ બનાવવામાં આવી છે. એક નિવેદનમાં કહેવામાં આવ્યું છે કે, તપાસ રિપોર્ટ 24 કલાકની અંદર સબમિટ કરવાનો છે. સરકાર આ ઘટનાના તળિયે જશે અને કાવતરાખોરો અને જવાબદારોને યોગ્ય સજા કરશે.