'ChatGPT અને DeepSeekનો ઉપયોગ ન કરશો...', સરકારી કર્મચારીઓને કેન્દ્રની ચેતવણી

Not to use Chatgpt DeepSeek AI Platform: ભારતમાં AI ટૅક્નોલૉજીની અસર ઝડપથી વધી રહી છે. ChatGPT, DeepSeek, Google Gemini જેવા પ્લેટફોર્મ કન્ટેન્ટ રાઇટીંગ, ડેટા એનાલિસિસ, કોડિંગ અને ટ્રાન્સલેશનમાં મદદરૂપ સાબિત થઈ રહ્યા છે. વિદ્યાર્થીઓ, વ્યાવસાયિકો અને ઉદ્યોગપતિઓ આ પ્લેટફોર્મનો વ્યાપકપણે ઉપયોગ કરી રહ્યા છે. પરંતુ, સરકાર માને છે કે તેમનો અનિયંત્રિત ઉપયોગ રાષ્ટ્રીય સુરક્ષા માટે ગંભીર ખતરો બની શકે છે. ડેટા પ્રાઇવસીને ધ્યાનમાં રાખીને, AI પ્લેટફોર્મના ઉપયોગને લઈને કડક માર્ગદર્શિકા જારી કરવામાં આવી છે.

સરકારી કર્મચારીઓ માટે AI પ્લેટફોર્મના ઉપયોગ પર પ્રતિબંધ 

ભારત સરકારે સરકારી કર્મચારીઓ માટે ChatGPT, DeepSeek અને અન્ય AI પ્લેટફોર્મના ઉપયોગ પર પ્રતિબંધ મૂક્યો છે. નાણા મંત્રાલય દ્વારા 5 ફેબ્રુઆરી જારી કરવામાં આવેલા આદેશમાં કહેવામાં આવ્યું છે કે, 'સરકારી કચેરીઓમાં કામ કરતાં કર્મચારીઓએ ChatGPT, DeepSeek અને અન્ય AI પ્લેટફોર્મનો ઉપયોગ ન કરવો જોઈએ. સરકારનું કહેવું છે કે આ AI પ્લેટફોર્મ દ્વારા સંવેદનશીલ માહિતી લીક થવાનું જોખમ વધી શકે છે.' કેન્દ્ર સરકારના સર્ક્યુલરમાં કહેવામાં આવ્યું છે કે, સરકારી કોમ્પ્યુટર અને લેપટોપ આ AI પ્લેટફોર્મનો ઉપયોગ રાષ્ટ્રીય સુરક્ષા અને ગોપનીયતાને નુકસાન પહોંચાડી શકે છે. આથી કર્મચારીઓને AI પ્લેટફોર્મથી દૂર રહેવાની કડક ચેતવણી આપવામાં આવી છે.

સરકારી કર્મચારીઓ માટે નવી માર્ગદર્શિકા

નાણા મંત્રાલય દ્વારા તમામ મંત્રાલયો અને વિભાગોને તેમના કર્મચારીઓને ChatGPT અને અન્ય AI પ્લેટફોર્મનો ઉપયોગ ન કરવાની સૂચનાઓ જારી કરી છે. આદેશમાં કહેવામાં આવ્યું છે કે સરકારી કચેરીઓમાં AI પ્લેટફોર્મની અવગણના કરવી જરૂરી છે. જો કે, જો કર્મચારીઓ ઇચ્છે તો તેનો ઉપયોગ તેમના અંગત ડિવાઇસ પર કરી શકે છે. સરકારે ટૂંક સમયમાં સરકારી કામમાં AI પ્લેટફોર્મના ઉપયોગને લગતી એક વ્યાપક નીતિ લાવવાની તૈયારીઓ શરુ કરી દીધી છે. આ નીતિમાં ડેટા સંરક્ષણ ધોરણો સ્પષ્ટપણે જણાવવામાં આવશે.

આ પણ વાંચો: 'દેશમાં નોનવેજ આરોગવા પર પ્રતિબંધ મૂકો...' શત્રુઘ્ન સિન્હાએ UCCને પણ કર્યું સમર્થન

AI એપ્સના ઉપયોગથી ડેટા લીક થવાનું જોખમ

ભારતમાં ઘણી વિદેશી AI એપ્સ ઉપલબ્ધ છે, જેમાં ChatGPT, DeepSeek અને Google Gemini વગેરે સામેલ છે. ભારતમાં ઘણા લોકો તેમના કામને સરળ બનાવવા માટે આ AI પ્લેટફોર્મનો ઉપયોગ કરે છે. ડિવાઇસમાં AI એપ્સ અથવા ટૂલ્સ ઇન્સ્ટોલ કર્યા પછી, આ એપ્સ વિવિધ ઍક્સેસ માટે પૂછે છે. આવી સ્થિતિમાં સરકારી ફાઇલના ડેટા લીક થવાનું જોખમ રહે છે.