CBI-EDનો ડર બતાવ્યો, વિદેશ મંત્રાલયના પૂર્વ અધિકારીની પત્ની સાથે 1 કરોડથી વધુનો સાયબર ફ્રોડ

Digital Arrest In Gurugram: હરિયાણાના ગુરુગ્રામમાં સાયબર છેતરપિંડી કરનારાઓએ વિદેશ મંત્રાલયના પૂર્વ અધિકારીની પત્નીને એક મહિના સુધી ડિજિટલ ધરપકડ કરીને 1 કરોડ 42 લાખ રૂપિયાની છેતરપિંડી કરી. છેતરપિંડી કરનારાઓ હજુ પણ તેમને મેસેજ કરી રહ્યા છે. તે તેની પાસેથી બીજા 3 કરોડ રૂપિયા પડાવવા માંગે છે. માલિબુ ટાઉનની રહેવાસી 80 વર્ષીય વૃદ્ધાએ પોલીસને જણાવ્યું કે, 'હું એક નોકરાણી સાથે રહું છું. મારા બાળકો વિદેશમાં રહે છે. ગયા વર્ષે 25મી ઓક્ટોબરે તેમના વોટ્સએપ નંબર પર એક મહિલાનો ફોન આવ્યો હતો. તેણે પોતાને કુરિયર કંપનીના કર્મચારી તરીકે ઓળખાવ્યો અને કહ્યું કે મારા નામે ચીનમાં એક પાર્સલ મોકલવામાં આવી રહ્યું હતું, જેમાં પૈસા અને ડ્રગ્સ હતા.'

વૃદ્ધાને આતંકવાદી પ્રવૃત્તિમાં સામેલ થવાની ધમકી આપી

અહેવાલો અનુસાર, છેતરપિંડી કરનારાઓએ વૃદ્ધાને CBI અને EDનો ડર બતાવીને ધરપકડ વોરંટ જારી કરાવ્યું. વૃદ્ધાએ મ્યુચ્યુઅલ ફંડમાંથી 1.75 કરોડ રૂપિયા ઉપાડ્યા અને તેને ઉલ્લેખિત ખાતાઓમાં ટ્રાન્સફર કર્યા હતી. આતંકવાદી પ્રવૃત્તિમાં સામેલ થવાની ધમકી આપીને વધુ 3 કરોડ રૂપિયાની માંગણી કરવામાં આવી હતી. પૈસા એકઠા કરવા માટે વૃદ્ધાએ પોતાનું ઘર પણ વેચી દીધું હતું. જ્યારે પરિવારના સભ્યોને આ અંગે માહિતી મળી, ત્યારે છેતરપિંડીનો ઘટસ્ફોટ થયો. આ ઘટનાની તપાસ કરનારા અધિકારીએ જણાવ્યું હતુ કે, 'કેસ નોંધવામાં આવ્યો છે અને તપાસ શરૂ કરવામાં આવી છે. જે ખાતાઓમાં પૈસા ટ્રાન્સફર કરવામાં આવ્યા હતા તે ખાતા જપ્ત કરવામાં આવ્યા છે.'

એક મહિના સુધી વૃદ્ધાને ડિજિટલ અરેસ્ટ રાખવામાં આવી

છેતરપિંડી કરનારાઓએ 25મી ઓક્ટોબર 2024 ના રોજ વૃદ્ધ મહિલાને ફોન કર્યો અને તેમને ખોટા કેસમાં ફસાવી દીધા. 24 કલાક વોટ્સએપ પર વાત કર્યા પછી, સ્કાયપે પર એકાઉન્ટ બનાવ્યા બાદ 26મી ઓક્ટોબરના રોજ તેમને ડિજિટલ એરેસ્ટ કરવામાં આવ્યા હતા. 26મી નવેમ્બર 2024 સુધી ડિજિટલ અરેસ્ટ હેઠળ રાખવામાં આવ્યા હતા. આ દરમિયાન છેતરપિંડી કરનારાઓ સીબીઆઈ અને ઈડી અધિકારીઓ તરીકે સાદા કપડામાં તેમની સાથે વાત કરતા હતા. ક્યારેક પોલીસ યુનિફોર્મ પહેરેલો એક યુવાન પણ જોવા મળતો હતો. તે તેમના પર નજર રાખવાની વાત કરતો હતો.

આ પણ વાંચો: 17 દિવસમાં 1100 કિ.મી. દોડી મહાકુંભ પહોંચ્યો 'અગ્નિવીર' રૂપેશ, મિત્રો અધવચ્ચે સાથ છોડી ગયા હતા

નોકરાણીને બહાર મોકલવાનું દબાણ કરતા હતા

પીડિત વૃદ્ધ મહિલાના જણાવ્યાનુસાર, ડિજિટલ અરેસ્ટ દરમિયાન, જ્યારે પણ નોકરાણી રૂમમાં આવતી, ત્યારે છેતરપિંડી કરનારાઓ તેને બહાર મોકલી દેવાનું કહેતા. તે નોકરાણીને રૂમમાં આવવાની ના પાડતી હતી. ડિજિટલ અરેસ્ટ દ્વારા આ પ્રકારની છેતરપિંડી વિશે વૃદ્ધાને ખબર નહોતી. જો કોઈએ તેને આ અંગે કોઈ માહિતી આપી હોત, તો તે છેતરપિંડીથી બચી ગઈ હોત.

આ ઘટનાનો ઘટસ્ફોટ કેવી રીતે થયો?

ગભરાયેલી વૃદ્ધ મહિલાએ છેતરપિંડી કરનારાઓને 3 કરોડ રૂપિયા આપવા માટે પોતાનું ઘર વેચી દીધું. વૃદ્ધા કાગળકામ કરવા માટે તેની ભાભીના દીકરાનો સંપર્ક કર્યો. ઘર વેચવા વિશે પૂછવામાં આવતા, મહિલા રડવા લાગી અને આખી વાર્તા કહી. તે ટૂંક સમયમાં ગુરુગ્રામમાં બીજા ઘરમાં શિફ્ટ થવાની યોજના બનાવી રહી છે.

ડિજિટલ એરેસ્ટ શું છે?

ડિજિટલ અરેસ્ટમાં છેતરપિંડી કરનારાઓ પીડિતને ફોન કરે છે અને કહે છે કે તેનું નામ ડ્રગ્સ હેરફેર, મની લોન્ડરિંગ અને માનવ અંગોની તસ્કરીના કેસમાં સામે આવ્યું છે. છેતરપિંડી કરનારાઓ નકલી અધિકારીઓ તરીકે ઓળખાવે છે અને પીડિતને વીડિયો કોલથી જોડે છે. આ પછી તેઓ કેસનો ઉકેલ આવી જશે એમ કહીને પીડિતાના ખાતામાંથી પૈસા ટ્રાન્સફર કરાવે છે.