આસામમાં ભયાનક અકસ્માત, બોલેરોની ટક્કરથી રિક્ષાનો કચ્ચરઘાણ, 5 મોત, રોષે ભરાયેલા સ્થાનિકોએ રસ્તો જામ કર્યો

Asam Accident Incident : આસામના કછાર જિલ્લામાં બોલેરો અને રિક્ષા વચ્ચે ભયાનક અકસ્માતની ઘટનામાં એક જ પરિવારના ચાર લોકોના મોત નીપજ્યા છે. આજે સોમવારે સવારે સિલચર નજીક રાનીઘાટ વિસ્તારમાં ઘટના સર્જાઈ હતી. આ ઘટનાને લઈને વહીવટીતંત્ર પર સ્થાનિકોએ રોષ ઠાલવીને રોડ ચક્કાજામ કર્યો હતો અને ઘટના મામલે યોગ્ય કાર્યવાહીની માગ કરી હતી.

ભયાનક અકસ્માતમાં પાંચ લોકોના મોત

સ્થાનિક પોલીસ અનુસાર, અકસ્માતની ઘટનામાં બંને વાહનોની સ્પિડ વધુ હોવાનું જણાયું હતું. જેમાં બોલેરોની ટક્કરથી રિક્ષાનો કચ્ચરઘાણ થયો હતો, જેથી કછાર જિલ્લાના કલેન વિસ્તારમાં મેડિકલ હોસ્પિટલ જઈ રહેલા રિક્ષામાં સવાર એક જ પરિવારના ચાર લોકોનું ઘટના સ્થળ પર અને એક વ્યક્તિનું હોસ્પિટલ લઈ જતી વખતે મોત નીપજ્યું. જ્યારે બોલેરોમાં સવાર વ્યક્તિનો કોઈ પ્રકારના જાનહાનિ થઈ ન હતી.

અકસ્માતમાં બે બાળકો સહિત એક જ પરિવારના ચાર લોકોના મોત

સ્થાનિકોના જણાવ્યાં પ્રમાણે, મૃતક જાકિર ઉદ્દીન તેની પત્ની રજિયા સહિત બે બાળકો સાથે હોસ્પિટલ જઈ રહ્યાં હતા. આ સાથે તેમનો પાડોસી તાહિર પણ જોડે હતો. આમ તેઓ હોસ્પિટલ જતી વખતે જ અકસ્માતની ઘટના બની હતી.

આ પણ વાંચો : મણિપુરમાં CRPFની મોટી કાર્યવાહી, પોલીસ સ્ટેશન સળગાવવા આવેલા 10 કુકી ઉગ્રવાદીઓ ઠાર

ઘટના સ્થળ પર હાજર લોકોનું કહેવું છે કે, બંને વાહનો પૂરઝડપે જઈ રહ્યા હતા, ત્યારે વળાંકમાં બંને વાહનોની ટક્કર થઈ હતી. જેમાં રસ્તા પર મોટી સંખ્યામાં વૃક્ષો હોવાના કારણે સામેથી આવતા વાહનો દેખાયા ન હતા, જેથી અકસ્માત પાછળનો સૌથી મોટી કારણ આ હોવાનું સામે આવ્યું છે. સમગ્ર ઘટનાને પગલે લોકોએ રસ્તો જામ કર્યો હતો અને તાત્કાલિક કાર્ચવાહી કરવાની માગ કરી હતી. જ્યારે જિલ્લા વહીવટીતંત્ર અને પોલીસના વરિષ્ઠ અધિકારીએ યોગ્ય કાર્યવાહી કરવાનું આશ્વાસન આપીને ભીડ વિખેરી હતી.