પહેલીવાર ભારત આવશે એલન મસ્ક, વડાપ્રધાન મોદી સાથે કરશે મુલાકાત, પછી થશે મોટું એલાન

Elon Musk in India: ટેસ્લાના માલિક એલન મસ્ક આ મહિનાના અંતમાં વડાપ્રધાન નરેન્દ્ર મોદીને મળવા માટે ભારત આવવાની યોજના બનાવી રહ્યા છે, જે દરમિયાન ભારતમાં રોકાણ અને એક નવી ફેક્ટ્રી ખોલવાની પોતાની યોજના સંબંધિત વાત થવાની આશા છે. રૉયટર્સના રિપોર્ટમાં કહેવાયું છે કે, 22 એપ્રિલથી શરૂ થનારા અઠવાડિયામાં એલન મસ્ક ભારત પ્રવાસે રહેશે. નવી દિલ્હીમાં એલન મસ્ક ભારતના વડાપ્રધાન નરેન્દ્ર મોદી સાથે મુલાકાત કરી શકે છે.

રિપોર્ટમાં કહેવાયું છે કે, જો એવું થાય છે તો પહેલીવાર એલન મસ્ક ભારત આવશે. એલન મસ્ક પોતાની ભારત યાત્રાની ટુંક સમયમાં જ જાહેરાત કરશે. માનવામાં આવી રહ્યું છે કે, ભારત પ્રવાસ દરમિયાન એલન મસ્ક પોતાના ઈન્વેસ્ટમેન્ટ પ્લાન અને ભારતમાં ઈલેક્ટ્રિક કારના પ્લાન્ટને લઈને એલાન કરી શકે છે. ભારતીય ગ્રાહક ટેસ્લા કારની રાહ જોઈ રહ્યા છે.

પ્લાન્ટ માટે જગ્યાની શોધમાં ટેસ્લા

આ પહેલા જણાવાયું હતું કે, ટેસ્લાના અધિકારીઓ આ મહિના ભારત આવવાની આશા છે, જેથી તેઓ ટેસ્લા પ્લાન્ટ માટે એક જગ્યા જોઈ શકે. જોકે હવે એલન મસ્ક ખુદ આવવાની વાત સામે આવી છે. તેવામાં આ પ્લાન્ટ માટે લગભગ 2 બિલિયન ડોલરના રોકાણનું એલાન થઈ શકે છે.

ગત વર્ષે વડાપ્રધાનને મળ્યા હતા મસ્ક

જણાવી દઈએ કે, ગત વર્ષ જૂનમાં જ્યારે વડાપ્રધાન નરેન્દ્ર મોદી અમેરિકાની યાત્રા પર ગયા હતા, ત્યારે તેમણે એલન મસ્ક સાથે મુલાકાત કરી હતી. ત્યાં ટેસ્લા કંપનીની તરફથી કહેવાયું હતું કે તેઓ 24000 ડોલરની કિંમત વાળી ઈવીનું ઉત્પાદન કરવા માટે ભારતમાં એક પ્લાન્ટ શરૂ કરવા માટે રસ ધરાવે છે.